Ruka 6 - NOVO TESTAMENTO EM NDAU

Jesu no sabatha

¹ Kwakaitika ngo zuva ro sabatha echifamba ngo mukati mwo minda yo koroni, vajiji vake vakavhuna musoso yo koroni, vechiipukutira pa nyara javo vakaha.

² Asi vamweni vo Vafarisi vakati: “Munoita ngenyi icho chisikatendehwi mu mipango kuitwa ngo zuva ro sabatha?”

³ Jesu wakapingura, akati kwavari: “Amusati mwatongojija here icho chakaitwa ndi Dhavhidha, apo wayiva no njara, iye naavo vayiva naye?

⁴ Kunghwina kwaakaita mu nyumba ya Mwari, wakatora, akaha zvimanda zvakapihwa, wakapazve kuna avo vayiva naye, izvo zvisikatendehwi mu mipango kuti zvihiwe, kwega ngo vaprofeti?”

⁵ Wakati kwavari: “Mwana wo Mundhu uri Mambo no wo sabatha.”

Mundhu wayiva no nyara yakaoma

⁶ Kwakaitika ngo zuva rimwenizve ro sabatha, kuti iye wainghwina mu nyumba yo kudira, kwoojijisa; kwayivapo mundhu uwo wayiva no nyara yo kumuho yakaoma.

⁷ Vatari no vafarisi vakamuringisisa, kuti vavone kuti unozomurapa here ngo zuva ro sabatha; kuti vavone chokumuparisa ndava ndicho.

⁸ Asi iye waiziva mikarakajo yavo, wakati kuno mundhu uwo wayiva no nyara yakaoma: “Mukayi, uyime ngo pakati.” Naye wakamuka, wakayima ngo pakati.

⁹ Asi Jesu wakati kwavari: “Ndinomubvunjisa, kuti kunotendehwa here ngo zuva ro sabatha kuyita zvakanaka, nokuti kuyita zvakashata? Kuponesa ndaramo, nokuti kuiuraya?”

¹⁰ Naye wakavaringisisa vese, wakati kuno uwo: “Tambanuja nyara yako.” Naye wakayita kudaro, no nyara yake yakarapika.

¹¹ Asi avo vakazara ngo ushungu, vakapangana umwe no umweni chovangayita kuna Jesu.

Vapostori gumi na vaviri

¹² Kwakaitika ngaao mazuva kuti wakakwira pa dundhu kwookumbira; naye wakakumbira usiku hwese kuna Mwari.

¹³ Naapo kwaeja, wakadanija vajiji vake, naye wakasana kubva pakati pavo vari gumi na vaviri, avo vaakadurazve kuti vapostori:

¹⁴ Simoni uwo waakadura kuti Pedru, na Andreu munukuna wake, na Jakobe na Johani, na Firipi na Bhatoromeu,

¹⁵ na Mateu, na Tomasi, na Jakobe mwana wa Arifeu, na Simoni uwo waizwi Muzeroti.

¹⁶ Na Judhasi mwana wa Jakobe, na Judhasi Isikariyoti, uwo wakapira Mambo.

Jesu unojijisa no kurapa

¹⁷ Naye wakabzuka navo, wakayima pandau yakati chechetere, no vajiji vake vazhinji, no mbungano huru yo vandhu, vakabva Judhiya kwese, no Jerusarema, no ndharaunda jese jo ku jombe ro Tire, no ro Sidhoni,

¹⁸ avo vakaviya kwo muzwa, no kurapwa ndhenda javo; naavo vaitambujwa ngo mweya yakashata vakarapwa.

¹⁹ No mbungano yese yakaeja kumupshasa; ngokuti simba raibva kwaari, rechirapa vese.

Rudakaro rwo gwinyiso

²⁰ Naye wakamusa majiso ake kuringira vajiji vake, wakati: “Munomuchena imwimwi muri varombo, ngokuti Umambo hwa Mwari ngo hwenyu.

²¹ Munomuchena imwimwi munozwa njara zvino, ngokuti munozogutiswa. Munomuchena imwimwi munochema zvino ngokuti munozoseka.

²² Munomuchena imwimwi apo vandhu vanozomunyenya, no kuparajana nemwi no kumumbirimbija, no kushora zina renyu kudari inga rakashata, ngo ndava yo Mwana wo Mundhu.

²³ Dakaranyi ngo iro zuva, mwechinyanduka ngo kudakara; ngokuti ringiranyi, musharo wenyu mukuru mu gore, ngokuti majibaba avo vakayita kudarovo kuna vaprofeti.

²⁴ Asi ikhombo kwomuri imwimwi vapfumi! Ngokuti mwatoashira musharo wenyu.

²⁵ Ikhombo kwomuri munogutiswa zvino ngokuti munozozwa njara. Ikhombo kwomuri imwimwi munoseka zvino, ngokuti munozochumba no kuchema.

²⁶ Ikhombo kwomuri apo vandhu vese voovereketa zvakanaka ndimwi! Ngokuti majibaba avo vakavereketa kudaro kuna vaprofeti vokunyepa.”

Rudo kuna vakorore

²⁷ “Asi inini ndinoti kwomuri imwimwi munondizwa: Idanyi vakorore venyu, muite zvakanaka kwavari avo vanomunyenya.

²⁸ Dakajisanyi avo vanomutuka, muvakumbirire avo vanomutambuja.

²⁹ No kwaari unokurova padama muphindurire rimwenizve; no kwaari uwo unokutorera bhachi rako, mupe hembe yakozve.

³⁰ Ipai kwavari vese vanokumbira kwouri, no kwaari uwo unotora chiro chako, usachiteverazve.

³¹ No kudari ngo zvomunoda kuti vandhu vamuitire, itanyivo kwavari zvakadaro.

³² No kudari mwechivada avo vanomuda, munenyi cho mungazobongwa ndicho? Ngokuti no vashaishi vanovada avo vanovadavo.

³³ No kudari mwechiitira zvakanaka kwavari avo vanomuitira zvakanaka, munenyi chomungazobongwa ndicho? Ngokuti no vashaishi vanondoitavo zvakadaro.

³⁴ No kudari mwechishongesa avo vomunogonda kuzoashirazve kwavari, munenyi chomunozobongwa ndicho? Ngokuti no vashaishi vanoshongeswa ngo vashaishi kuti vazoashirevo zvakadaro kubva kwavari.

³⁵ Asi vadenyivo vakorore venyu, muvaitire zvakanaka, mwechivashongesa musikaveteri, no musharo wenyu unozoyita mukuru, nemwi munozoyita vana vo Uwo Uri panyezuru po zvese; ngokuti iye uno nyasha kwavari vasikabongi, no kwavari vakashata.

³⁶ Itanyi vano nyasha, kudari ndi Baba wenyu vano nyasha.”

Musatonga vamweni

³⁷ “Musatonga: Nemwi amuzotongwi; musaparisa ndava, nemwi amuzopariswi ndava, regereranyi, nemwi munozoregerehwa.

³⁸ Ipanyi, nakwo kunozopuwa kwomurizve, mupimo wakanaka, wakachindihwa, wakazunguzihwa, no kufashaikira, unozopuwa kwomuri: Ngokuti ngo uwo mupimo wo munozopima ndiwo, unozopimihwavo kwomuri.”

³⁹ Naye wakavereketa muezaniso kwavari, echiti: “Bofu ringatungamirira bofu here? Avazowi vese murindi here?

⁴⁰ Mujiji aari panyezuru po Mujijisi wake akadi, asi mujiji wese waperera unozodari ngo Mujijisi wake.

⁴¹ Unoringisirenyi chitsepejo chiri mu jiso ro hama yako, asi usikarangariji ngo danda riri mu jiso rako?

⁴² Ngokuti unganangisa kudini kuno hama yako kuti: Hama, tenda kuti ndibvise chitsepejo chiri mu jiso rako, apo iwewe wambhwine usikavoni danda riri mu jiso rako wambhwine? Iwewe mujiitisi, tanga kubvisa danda riri mu jiso rako, naapo unozokona kuvona pambhene kubvisa chitsepejo chiri mu jiso ro hama yako.”

Muti no michero yawo

⁴³ “Ngokuti akuna muti wakanaka ungabereka michero yakashata; nokutizve muti wakashata aungabereki michero yakanaka.

⁴⁴ Ngokuti muti wese unozivika ngo michero yawo. Ngokuti vandhu avakavi makuyu kubva pa miti yo minzwa, nokuti parukato avakavi michero yo muvhini,

⁴⁵ mundhu wakanaka kubva kwo upfumi hwakanaka hwo mu mwoyo mwake unobudisa icho chakanaka; no mundhu wakashata kubva kwo upfumi hwakashata hwo mwoyo wake unobudisa icho chakashata kubva kuno zvakawanda zviri mu mwoyo.”

Kuteveja mazwi a Mwari

⁴⁶ “Munondidanija ngenyi kuti, Mambo, Mambo, musikayiti izvo zvondinonanga?

⁴⁷ Mundhu wese unoviya kwendiri, echizwa mazwi angu, echiayita ndinozomutatija uwo waanotojana naye.

⁴⁸ Unodari ngo mundhu wakavaka nyumba, uwo wakacha, wakajikisa, wakadira tsikiro pa buwe; kwakati, ndambi yakwira, yakarova nyumba iyo, inga isina simba ro kuchukunusa; ngokuti inga yakanasa kuvakwa.

⁴⁹ Asi iye unozwa, asikayiti, unodari ngo mundhu wakavaka nyumba panyezuru po mavhu isina tsikiro; iyo ndambi yakarova kwoiri, paripo yakawa; no kuphwanyika kwo iyo nyumba inga kwakakura.”