Ruka 5 - NOVO TESTAMENTO EM NDAU

Vateveri vokutanga va Jesu

¹ Kwakaitika apo mbungano yaichikinijana kuzwa mazwi a Mwari, iye vaiyima pa gandhwa ro Genesareta.

² Naye wakavona ngarava mbiri jaiyima pa gandhwa, asi vatandi vayinga vabuda kwejiri, vechisuka majuya avo.

³ Naye echinghwina kuno imwe yo ngarava, yaiva ya Simoni, wakamukumbira kuti aindundire pakati padodoko kubva kumbhiripiri. Naye wakagara pasi wakajijisa mbungano ari mu ngarava.

⁴ Kwakati wapeja kuvereketa, wakati kuna Simoni: “Ndundira kwakajika muwisire majuya enyu kwoobata hove.”

⁵ Simoni wakapingura, akati: “Mujijisi, takashanda usiku hwese, tisikazivi kubata chiro; asi ngo izwi rako ndinozowisira juya.”

⁶ Naapo vaita kudaro, vakatendeneja hove zhinji, no juya ravo rakatanga kuparuka.

⁷ Navo vakayita chivoniso chokudanija kuno shamwari javo jayiva mu ngarava imweni, kuti jiviye jivabesere. Navo vakaviya, vakazaja ngarava jese mbiri, kwokuti jakadondondomera.

⁸ Asi Simoni Pedru avona wakawa pa tshoka ja Jesu, echiti: “Ibva kwendiri, ngokuti ndiri mundhu uri mushaishi, Mambowe.”

⁹ Ngokuti iye wakashamiswa navo vese vayiva naye, ngokubatwa kwo hove jo vayinga vabata;

¹⁰ zve inga zvakadaro kuno Jakobe na Johani, vana va Zebhedhi avo vayiva shamwari ja Simoni. Na Jesu wakati kuna Simoni: “Usatya, kubvira zvino unozobata vandhu.”

¹¹ Naapo vazisa ngarava javo mumbhiripiri, vakasiya zvese, vakamutevera.

Kurapwa kwo mundhu wayiva no mapere

¹² Kwakaitika, apo ari kurimwe ro madhoropa, vonanyi, wayivapo mundhu wayinga uno mapere mu muviri wake wese: Naapo avona Jesu, wakawa pasi ngo hope yake, akamupota, echiti: “Mambo kudari wechida, ungandiponesa.”

¹³ Naye wakatambanuja nyara yake, wakamupshasa, akati: “Ndinoda; wechiponeswa.” Paripo mapere akapera.

¹⁴ Naye wakamupanga kuti asazobvunja no mundhu; asi wakati: “Enda, ujipangijire ku mupristi, upe mubairo ngo ndava yo kuponeswa kwako kudari ngo zvaakapanga Mosi, kuyita chapupu kwavari.”

¹⁵ Asi mbiri yakavangirira kuteketeswa ndiye; no mbungano huru yakaungana pamwepo kuzwa no kuponeswa ndhenda javo.

¹⁶ Asi iye wakajipaura kuenda ku bani, kwookumbira.

Kurapwa kwo mundhu waioma muviri

¹⁷ Kwakaitika ngo rimwe ro mazuva ao, echijijisa, vayivapo vafarisi no magurukota emipango vechigara apo, avo vayinga vakaviya kubva kundharaunda jese jo Garire, no yo Judhiya, no Jerusarema. No simba ra Jehovha rokurapa rayiva naye.

¹⁸ Vonanyi, vandhu vakazisa mundhu waihwara ngo ndhenda yo kuoma muviri, ari panyezuru po musengere; navo vakapshaka kuti vamunghwinise mukati no kumurajika pamberi pa Jesu.

¹⁹ Vasikavoni njira yo kumunghwinisa ndiyo mukati, ngo ndava yo mbungano, vakakwira panyezuru po denga ro nyumba, vakamubzusa ngo pa bovo ari pa musengere, ngo pakati pamberi pa Jesu.

²⁰ Iye echivona kugonda kwavo, wakati: “Mwanarume, zvishaishi zvako zvaregerehwa kwouri.”

²¹ Vatari no vafarisi vakatanga kupangana, vechiti: “Ndiyani uwu unovereketa zvituko? Ndiyani ungakona kuregerera zvishaishi, kwega Mwari?”

²² Asi Jesu echindoziva kurangarija kwavo, wakapingura, wakati kwavari: “Munobvunjana ngenyi mu mwoyo yenyu?

²³ Chinyi chinopinda kureruka, kunanga kuti: Zvishaishi zvako zvaregerehwa kwouri, nokuti kunanga kuti; mukayi ufambe?

²⁴ Asi kuti muzive kuti Mwana wo Mundhu uno simba mu nyika ro kuregerera zvishaishi.” (Wakati kuno uwo wayiva no ndhenda yo kuoma muviri), ndinoti kwouri: “Mukayi, utore musengere wako, uende ku nyumba yako.”

²⁵ Paripo wakamuka pamberi pavo, wakatora icho chaayinga akavata panyezuru pacho, akaenda ku nyumba yake, echikuja Mwari.

²⁶ Navo vese vakashamiswa, vakakuja Mwari, vakazara ngokutya, vechiti: “Tavona zvinoshamisa nyamasi.”

Jesu unodanija Revhi

²⁷ Ngosure kwo izvi wakabvapo, wakavona mushabisi zina rake ndi Revhi akagara pandau yo kushabisa, shangu wakati kwaari: “Nditevere.”

²⁸ Naye wakasiya zvese, wakamuka wakamutevera.

²⁹ Na Revhi wakamuitira dhiri guru mu nyumba yake, kwayivapo vazhinji vo vashabisi no vamweni avo vaigara navo pakuha.

³⁰ Vafarisi no vatari vavo vakan'un'utira vajiji vake vechiti: “Munoha no kumwa ngenyi no vashabisi no vashaishi?”

³¹ Jesu wakapingura, wakati kwavari: “Avo vakavanga avadi n'anga, asi avo vanohwara.

³² Andizivi kuviya kudanija vakarurama akadi, asi vashaishi kuti vatenderuke.”

Mubvunjo ngo ndava yo kuera kuha

³³ Navo vakati kwaari: “Vajiji va Johani vanoera kuha kazhinji, vechikumbira; ngokudarozve navo vo vafarisi; asi vako vanoha no kumwazve.”

³⁴ Jesu wakati kwavari: “Mungakona here kuyita kuti vo nyumba yanyamurovohwa vaere kuha apo mukwambo echinavo?

³⁵ Asi mazuva anozoviya apo mukwambo wabviswa kwavari, naapo vanozoera kuha ngaao mazuva.”

³⁶ Zve wakavereketa muezaniso kwavari, echiti: “Akuna mundhu ungacheka chiremo kujira ibza kuchitungira panguvo yasakara; echiita kudaro unozoshaishira nguvo ipsha, chiremo chipsha achizotojani no nguvo yakasakara.

³⁷ Apana mundhuzve unodira vhini ibza mukati mwo nyede jakasakara; echiita kudaro vhini ibza rinozoputisa nyede, no vhini rinozorashika, no nyede inozochakatika.

³⁸ Asi vhini ibza rinodihwa mukati mwo nyede ipsha.

³⁹ Zve apana mundhu wakambomwa vhini rokare, paripo oemura ibza: Ngokuti, unoti, rokare rakapinda kunaka.”