Ruka 4 - NOVO TESTAMENTO EM NDAU

Kuejwa kwa Jesu

¹ Na Jesu azajwa ndi Mweya Wakachena, wakahwirira kubva Jordhani wakakwehwa ndi Mweya kuenda ku ndau iri bani.

² Wakapeja mazuva ari makumi marongomuna echiejwa ndi dhiyabhorosi, naye aazivi kuha chiro ngaao mazuva; kwakati apera, wakava no njara.

³ Dhiyabhorosi wakati kwaari: “Kudari uri Mwana wa Mwari, nangai kuti buwe iri riite chimanda.”

⁴ Jesu wakapingura, wakati: “Kwakatahwa kuti: Mundhu aazorarami ngo chimanda chega.”

⁵ Na dhiyabhorosi wakamukwija pa dundhu, akamutatija umambo hwese hwo nyika ngo mukuvo mudoko.

⁶ Na dhiyabhorosi wakati kwaari: “Ndinozopa kwouri iri simba rese, no uthende hwazvo, ngokuti rakapuwa kwendiri, pikija ndiyani wendinoda ndinozomupa.

⁷ Ndizvo kudari iwewe wechizondidira, zvese zvinozoita zvako.”

⁸ Na Jesu wakapingura, akati kwaari: “Kwakatahwa kuti, unozodira Jehovha Mwari wako, umudire iye ega.”

⁹ Naye wakamukwevera Jerusarema, wakamudira panyezuru po chachungu cho themperi, wakati kwaari: “Kudari uri Mwana wa Mwari, jikandire pasi kubva pano;

¹⁰ ngokuti kwakatahwa kuti: Iye unozopanga ngirosi jake ngo ndava yako, kuti jikungwarire,

¹¹ no mu nyara jajo jinozokuhaka, kuti ngouri mukuvo usakhugunywa tshoka yako pa buwe.”

¹² Na Jesu wakapingura, akati kwaari: “Kwakatahwa kuti: Usazoeja Mambo Mwari wako.”

¹³ Naapo dhiyabhorosi ayinga apeja zviejo zvese, wakabva kwaari mbhera mukuvo umweni.

Mushando wa Jesu mu Garire

¹⁴ Jesu wakahwirira Garire ari mu simba ro Mweya. No mbiri yakateketeswa ngo ndava yake mu nyika jese jinotendeneja.

¹⁵ Naye wakajijisa mu nyumba javo jo kudira, echikujwa ngo vandhu vese.

¹⁶ Naye wakaviya Nazaretha, apo paakakurira, no kudari ngo chirovejeso chake wakanghwina mu nyumba yo kudira ngo zuva ro sabatha, wakayima kujija.

¹⁷ Kwakapuwa kwaari bhuku ra muprofeti Isaya. Naye wakabewura bhuku, wakavona apo pakatahwa, kuti:

¹⁸ “Mweya wa Jehovha uri panyezuru pangu, ngokuti iye wakandizoja kuchumayira Vhangeri ku varombo; wakandituma kuteketesa kusununguhwa kwo vakasungwa, no kupenyesa majiso emapofu. Kusunungura avo vakachikirihwa,

¹⁹ kuteketesa gore rinoashirika ra Jehovha.”

²⁰ Naye wakaripeta bhuku, wakarihwirija kuno mutungamiriri, wakagara pasi. No majiso eavo vese vayiva mu nyumba yo kudira akamuringira.

²¹ Naye wakatanga kuvereketa kwavari, kuti: “Nyamasi aya matahwa azajisika munjeve jenyu.”

²² Vese vakamupupurira zvakanaka, vakashama ngo mazwi onyasha akabva ku muromo wake, navo vakati: “Uwu andiyepi here mwana wa Josefa?”

²³ Naye wakati kwavari: “Ngozvirokwazvo munozoti kwendiri ngo aya mazwi akangwara, kuti: N'anga, jiponese iwewe. Izvo zvetakazwa kuti wazviita mu Kaperanaume chizviita panozve mu nyika yako.”

²⁴ Wakati: “Ngozvirokwazvo ndinoti kwomuri akuna muprofeti unoashirika mu nyika yake.

²⁵ Asi ngo zvirokwazvo ndinoti kwomuri, vayiva vazhinji vayiva shirikaji mu Israeri ngo mazuva a Erija, apo denga rakakonywa makore ari matatu no mweji mitandhatu, kwakaita, njara huru panyezuru po nyika yese.

²⁶ Asi Erija aazivi kutumwa kwo umwe wavo, asi kwega Sarepta, mu nyika yo Sidhoni, kune jimayi rayiva shirikaji.

²⁷ Vaivapo vazhinji vayiva no mapere mu Israeri ngo mukuvo wa Erisha muprofeti, kwayinga kusina na umwe wavo wakarapwa asi Namani ega musiriya.”

²⁸ Navo vakazara vese ngo ushungu vayiva mu nyumba yo kudira, apo vakazwa izvi zviro.

²⁹ Navo vakamuka vakamubudisa kunja kwo dhoropa, vakamukwevera nyezuru kwo dundhu apo payinga pakavakiwa dhoropa ravo, kuti vamukandire pasi.

³⁰ Asi iye wakafamba ngo pakati pavo wakaenda.

Mundhu uno mweya ino svina

³¹ Naye wakabzuka Kaperanaume dhoropa ro Garire, wayivajijisa ngo mazuva wo sabatha.

³² Navo vakashamiswa ngo kujijisa kwake; ngokuti mazwi ake ayiva no simba.

³³ Mu nyumba yo kudira kwayivapo mundhu uno mweya wo bzoka uno mweya wakashata, naye wakamima ngo izwi guru,

³⁴ wakati: “Iya! Tinenyi isisu newe, iwewe Jesu wo Nazaretha? Waviya here kutiuraya? Ndinokuziva kuti uriyani, uri Wakachena wa Mwari.”

³⁵ Asi Jesu wakauthusa, wakati: “Nyarara, ubude kubva kwaari.” Kwakati bzoka rakamukandira pasi, pakati pavo, rakabuda kwaari, risikazivi kumuremaja.

³⁶ Vakashamiswa vese, navo vakavereketa umweni no umweni, vechiti: “Izwi iri rinorevenyi? Ngokuti unopanga mweya ine svina ngo simba no kukona, nayo inobuda.”

³⁷ Kwakateketeswa mbiri ndiye mu nyika jese jakatendeneja.

Jesu unorapa vandhu vazhinji

³⁸ Naye wakamuka wakabuda mu nyumba yo kudira, wakanghwina mu nyumba ya Simoni. Vambiya va Simoni vayiva no ndhenda yo kujiya muviri zvikuru; navo vakamupota ngo ndava yavo.

³⁹ Naye wakayima ngo pamberi pavo, wakanyaraja ndhenda, no ndhenda yo kujiya muviri yakavasiya, paripo vakamuka, vakavashandira.

⁴⁰ Kwakati zuva roobira avo vese vayiva no vanohwara ngo ndhenda jakaparajana, vakavazisa kwaari, naye wakadira nyara jake panyezuru pavo, wakavarapa.

⁴¹ No mabzoka, akabudavo kubva kuvazhinji, echimima, echiti: “Iwewe uri Kristu Mwana wa Mwari.” Iye echianyaraja aazivi kutenda kuti averekete, ngokuti iwo aimuziva kuti uri Kristu.

Jesu unochumaira masoko mapsha

⁴² Kwakati kwaeja iye wakabuda, akaenda ku ndau iri bani; no mbungano yo vandhu yakamupshaka, ikaviya kwaari, yechida kumubatirija kuti asabva kwavari,

⁴³ asi wakati kwavari: “Kunosisira kuti ndichumaire vhangeri ro Umambo hwa Mwari mu madhoropa amweni nao, ngokuti icho ndicho cho ndakaviyira.”

⁴⁴ Naye waichumaira mu nyumba jo kudira jo Garire.