Ruka 3 - NOVO TESTAMENTO EM NDAU

Chumairo ra Johani Mubhapatisi

¹ Zvino ngo gore ro chigumi na mashanu ro kutonga kwa Tibheri Khesari, Pontio Piratu ari mutongi wo Judhiya na Herodhi ari mutungamiriri wo Garire, no munukuna wake Firipi ari mutungamiriri wo nyika yo Ituriya no yo Trakoniti, na Rusanio ari mutungamiriri wo Abhireni.

² Anasi na Kaifasi vari vapristi vakuru. Izwi ra Mwari rakazwika kuna Johani mwana wa Zakariya, ari mu bani.

³ Naye wakaviya ku nyika yese inotendeneja Jordhani, echichumaira rubhapatiso rwo kutenderuka kwo kuregererwa kwo zvishaishi;

⁴ kudari ngo zvakatahwa mu tshamba yo mazwi a Isaya muprofeti, kuti: “Izwi ro unodanijira mu bani, kuti: Nasiriranyi njira ya Mambo, rungamisanyi makwanja ake.

⁵ Mapani ese anozozajwa, no matundhu ese no zvimatundhu zvinozobzuswa pasi; no zvakapeyama zvinorungamiswa, no njira jakaita marindi jinozonasirihwa;

⁶ no vandhu vese vanozovona ruponeso rwa Mwari.”

⁷ Ndizvo wakati ku vandhu avo vazhinji vakabuda kuviya kuzobhapatiswa ndiye: “Imwimwi mibarihwana yo mavhumbi, ndiyani wakamuzivisa kuti mutize ushungu hunoviya?

⁸ Ndizvo baranyi michero inosisira kutenderuka, musatanga kukarakaja mukati mwenyu, kuti: Tina Abrahama baba wedu; ngokuti ndinoti kwomuri, kuti Mwari uno simba kumusira vana kuna Abrahama ngaaya mapuwe.

⁹ Nazvino bheura ratodihwa pa muji jo miti; ndizvo miti yese isikabereki michero yakanaka inotemehwa pasi, no kukandihwa mu muriro.”

¹⁰ No mbungano yakamubvunjisa, yechiti: “Ndizvo tinozoitenyi?”

¹¹ Naye wakapingura, akati kwavari: “Iye uno mabhachi maviri, ngaape uwo usina; no uwo uno zvokuha ngaaitevo kudaro.”

¹² No vashabisi vakaviyavo kuti vabhapatiswe, vakati kwaari: “Mujijisi isisuvo tinozoitenyi?”

¹³ Wakati kwavari: “Musashabisa zviro kupinda izvo zvakaemesehwa kwomuri.”

¹⁴ Masocha nawo akamubvunjisavo, akati: “Nesuvo tinozoitenyi?” Naye wakati kwavari: “Musazotorera mundhu chiro ngo simba, musazonyepejera, asi mwechikwaniswa ngo misharo yenyu.”

¹⁵ Kwakati vandhu vachagarira, no vese vairangarira mu mwoyo mwavo ndi Johani, kuti pamweni iye wayiva Kristu;

¹⁶ Johani wakapingura echiti kwavari vese: “Inini ngo zvirokwazvo ndinomubhapatisa ngo kumwa; asi unoviya uwo unondipinda ngo simba, uwo wondisikasisihwi no kusunungura rusinga wo magwada ake, unozomubhapatisa ngo Mweya Wakachena, no muriro.

¹⁷ Uwo uno ruchero hwake mu nyara yake, kuti anase kupshaira chimbuwa chake, no kuunganija koroni mu nyumbu yake, asi makoto unozoapisa ngo muriro usikajimi.”

¹⁸ Wakachumaira ngo zviro zvimweni zvakawanda ku vandhu, echivapanga;

¹⁹ asi Herodhi mutungamiriri arambijwa ndiye ngo ndava ya Herodhiasi mukaji wo munukuna wake, na ngo ndava yo zvese zvakashata zvaainga akaita Herodhi.

²⁰ Wakanyengejera ichi panyezuru pazvo zvese kuti wakamunghwinisa Johani mu guniya.

Kubhapatiswa kwa Jesu

²¹ Kwakaitika apo vandhu vese vakabhapatiswa na Jesu wakabhapatiswavo, achakumbira, denga rakabewuhwa,

²² no Mweya Wakachena, uno muemo wakadari ngo njiva, wakabzuka panyezuru pake, no izwi, rakazwika rechibva mu gore rechiti: “Iwewe uri Mwana wangu, unodikana; wondinonasa kudakara ndiwe.”

Mibarihwana wa Jesu,

²³ Jesu wakaamba kujijisa ano makore anonga makumi matatu, ari mwana wa Josefa, mukuvona kwo vandhu, uwo wayiva mwana wa Heri,

²⁴ mwana wa Matati, mwana wa Revhi mwana wa Mereki, mwana wa Jana, mwana wa Josefa,

²⁵ mwana wa Matatiasi, mwana wa Amosi, mwana wa Nahumi, mwana wa Esiri, mwana wa Nagai,

²⁶ mwana wa Mati, mwana wa Matatiasi, mwana wa Semeini, mwana wa Joseki, mwana wa Jodha,

²⁷ mwana wa Johanani, mwana wa Adhi, mwana wa Kosami, mwana wa Saratieri, mwana wa Narai,

²⁸ mwana wa Mereki, mwana wa Adhi, mwana wa Kosami, mwana wa Erimadhami, mwana wa Eri.

²⁹ Mwana wa Jesu, mwana wa Eriezeri, mwana Jorimi, mwana wa Matati, mwana wa Revhi,

³⁰ mwana wa Simeoni, mwana wa Judha, mwana wa Josefa, mwana wa Jonani, mwana wa Eriakimu.

³¹ Mwana wa Merea, mwana wa Mena, mwana wa Matata, mwana wa Natani, mwana wa Dhavhidha,

³² mwana wa Jesi, mwana wa Obhedhi, mwana wa Bhoazi, mwana wa Sarimoni, mwana wa Nasoni,

³³ mwana wa Aminadhabhi, mwana wa Arinini, mwana wa Esroni, mwana wa Faresi, mwana wa Judha,

³⁴ mwana wa Jakobe, mwana wa Isaka, mwana wa Abrahama, mwana wa Tera, mwana wa Nahori,

³⁵ mwana wa Serugi, mwana wa Ragao, mwana wa Fareki, mwana wa Hebheri, mwana wa Sara,

³⁶ mwana wa Kenani, mwana wa Arifakisadhi, mwana wa Shemi, mwana wa Noa, mwana wa Rameki,

³⁷ mwana wa Matusara, mwana wa Enoki, mwana wa Jaredhi, mwana wa Maharaeri, mwana wa Kenani.

³⁸ Mwana wa Enosi, mwana wa Seti, mwana wa Adhamu, mwana wa Mwari.