Ruka 24 - NOVO TESTAMENTO EM NDAU

Kumuka kwa Jesu

¹ Asi ngo zuva rokutanga ro vhiki, mangwanani mavishi kwoeja, vakaenda ku guva, no mitombo ino gwema yo vayinga vakanasirira.

² Navo vakavona buwe ramburumbujwa kubva pa guva.

³ No vanghwina mukati avazivi kuwana muviri wa Mambo Jesu.

⁴ Kwakaitika vachakangaijwa ndizvo, vonanyi, vanarume vaviri vakayima phedo pavo, vakasimira zvinon'anikira:

⁵ Navo vechitya, vakasikisira pasi hope javo pa mavhu, vanarume vakati: “Munopshaka ngenyi unopona pakati po vakafa?

⁶ Iye aaripi muno, asi wamuka. Cherechejanyi chaakavereketa,

⁷ echiti: Kuti kunodikana kuti Mwana wo Mundhu apihwe mu nyara jo vandhu vakashata, akohomehwe, ngo zuva ro chitatu amuke.”

⁸ Navo vakacherecheja mazwi ake,

⁹ vechihwirira kubva ku guva, vakazivisa izvi zvese kuno vari gumi naumwe, no kuno vamweni vese.

¹⁰ Zvino ava vayiva Mariya Magadhareni, na Jowana, na Mariya mayi wa Jakobe; pamwepo no majimayi amweni, vakazivisa izvi kuno vapostori.

¹¹ No mazwi aya akavoneka kwavari ari asina shwiro; navo avazivi kuatenda.

¹² Pedru wakamuka, akagogoma kuenda ku guva; wakaguma akakotama no kuringira mukati, wakavona machira akachena ari oga; naye wakaenda kanyi kwake, echishamiswa ngo icho chakaitika.

Mu njira yo kuenda Emausi

¹³ Vonanyi, vaviri vavo vaifamba ngo iro zuva kuenda ku guta rinozwi Emausi, raida kuyita makiromitha gumi na rimwe kubva Jerusarema.

¹⁴ Navo vaivereketa umwe kuno umweni ngo zviro zvese zvakaitika.

¹⁵ Kwakati vachavereketa, vechibvunjisana, Jesu ambhwine wakakwedera kwavari, akafamba navo.

¹⁶ Asi majiso avo akaitiswa buma, kuti vasamuziva.

¹⁷ Wakati kwavari: “Ngo renyi soko iri ro munovereketa umwe kwo umweni mwechifamba?” Vakayima vano hope jakasururika.

¹⁸ Umwe wavo unozwi Kreopasi wakapingura, akati kwaari: “Unogara uri wega here mu Jerusarema usikazivi izvo zvakaitikemwo ngaaya mazuva?”

¹⁹ Naye wakati kwavari: “Zviro zvenyi?” Vakati kwaari: “Izvo zva Jesu wo Nazaretha, uwo wayiva muprofeti, uno simba ngo zviito no mazwi pamberi pa Mwari no pamberi po vandhu vese;

²⁰ no njira yo vakamupira ndiyo vapristi vakuru, no vatongi vedu, no kugura kuti aurawe, no kumukohomera.

²¹ Asi isisu taigonda kuti ndiye waizoripira Israeri. Eya ngo panyezuru po izvi zvese, nyamasi ratova zuva ro chitatu kubvira ku nguva yo zvakaitika izvi.

²² Zve majimayi amweni wo chiunga chedu akatishamisa, akafumira kuenda ku guva.

²³ Kwakati, vasikavoni muviri wake, vakaviya vechiti: Vavona chivoniso cho ngirosi, ijo jakati kuti unopona.

²⁴ No vamweni vakatikuti veavo vayiva nesu, vakaendavo ku guva, vakavona kudari ngo zvovakananga majimayi; asi iye avazivi kumuvona.”

²⁵ Iye wakati kwavari: “A! Mapenji, no vanononoka ngo mwoyo kutenda izvo zvese zvakavereketwa ngo vaprofeti!

²⁶ Kwayinga kusikasisiri here kuti Kristu atambujwe ngo izvi zvese, no kunghwina mu uthende hwake?”

²⁷ Naye, echibva ngo zva Mosi, no zvo vaprofeti vese, wakapangijira kwavari mumatahwa ese, izvo zvakatahwa ngo ndava yake.

²⁸ Navo vakakwedera ku guta apo po vayienda, iye wakayita kudari ngo unopinda kuenda mberi.

²⁹ Navo vakamukoka, vechiti: “Gara nesu, ngokuti aamadekoni, no zuva roda kubira.” Naye wakanghwina koogara navo.

³⁰ Kwakati apo atseama navo pakuha, wakatora chimanda, akachibonga, akachigura, akapa kwavari.

³¹ No majiso avo akapembenuka, navo vakamuziva. Naye wakangarangara kubva mukuvona kwavo.

³² Navo vakati umwe kuno umweni: “Mwoyo yedu aizivi kupisa here mukati mwedu, apo achavereketa kwetiri mu njira, no kupangijira kwetiri zvakatahwa?”

³³ Navo vakamuka ngo nguva iyo vakahwirira Jerusarema, vakawana vari gumi naumwe vakaungana pamwepo, no vamweni vayiva navo,

³⁴ vechiti: “Mambo wamuka ngo zvirokwazvo, naye wakavoneka kuna Simoni!”

³⁵ Navo vakaverenga izvo zvakaitika vari mu njira, no kuzivikana kwaakaita ndivo ngo kugura chimanda.

Jesu wakavoneka ku vajiji

³⁶ Naapo vechiverenga izvi zvese, Jesu wambhwine wakayima pakati pavo, akati kwavari: “Kunyarara ngakuve kwomuri.”

³⁷ Asi avo vakakhazamuka, vakatya kakurutu, vakarangarira kuti vavona mujimu.

³⁸ Naye wakati kwavari: “Munotambujika ngenyi? Inovapo ngenyi mubvunjo pakati penyu?

³⁹ Vonanyi nyara jangu, no tshoka jangu, kuti ndini ndambhwine. Ndibatenyi muvone; ngokuti mujimu auna nyama no magodo kudari ngo zvomunovona kuti inini ndinazvo.”

⁴⁰ Naapo avereketa kudaro, wakavapangijira nyara jake no tshoka jake.

⁴¹ Kwakati vachagononda ngo ndava yo kudakara vechishamiswa, wakati kwavari: “Munazvo here zvokuha?”

⁴² Navo vakamupa chiguhwa cho hove chakakochwa.

⁴³ Naye wakachitora, akachiha pamberi pavo.

⁴⁴ Naye wakati kwavari: “Aya ndiwo mazwi endakavereketa kwomuri ndichinemwi, kuti kunosisira kuti zvese zvizarisike, izvo zvakatahwa mu mipango ya Mosi, no zvo vaprofeti no zvo Nduyo, ndini.”

⁴⁵ Naapo wakajekisira murangarijo yavo kuti vazwisise matahwa.

⁴⁶ Naye wakati kwavari: “Kwakatahwa kudari, kuti Kristu unozotambujwa, no kumukazve kubva kwo vakafa ngo zuva ro chitatu;

⁴⁷ nokutizve kutenderuka no kuregerehwa kwo zvishaishi kuchumaihwe ngo zina rake kune majinja ese, kutanga mu Jerusarema.

⁴⁸ Nemwi muri zvapupu zvo izvi zvese.

⁴⁹ Vonanyi, ndinotuma chigondiso cha Baba wangu panyezuru penyu; asi garanyi mu dhoropa mbhera musimijwe ngo simba rinobva mu gore.”

Kukwira kwa Jesu mu gore

⁵⁰ Naye wakavatungamirira kuenda mbhera vakayita maringwa no Bhetani. Naye wakamusa nyara jake, wakavadakajisa.

⁵¹ Kwakaitika apo achavadakajisa, wakasiyana navo, wakakwira kuenda mu gore.

⁵² Navo vakamudira, vakahwirira kuenda Jerusarema ngo kudakara kukuru.

⁵³ Navo vakavangirira kugara mu themperi, vechikuja Mwari.