Ruka 23 - NOVO TESTAMENTO EM NDAU

Jesu pamberi pa Piratu

¹ No mbungano yese yavo yakamuka, yakamuendesa pamberi pa Piratu.

² Navo vakatanga kumuitira ndava, vechiti: “Takamuvona uwu mundhu echipaukisa jinja redu, echirambisa kuti kusaripwa shangu kuna Khesari, echinanga kuti iye wambhwine uri Kristu, Mambo.”

³ Na Piratu wakamubvunjisa, echiti: “Iwewe uri Mambo wo vajudha here?” Iye wakapingura, akati: “Watonanga iwewe.”

⁴ Na Piratu wakati ku vapristi vakuru no mbungano: “Andivoni ndava ku mundhu uwu.”

⁵ Asi vakapinda kuvangirira, vechiti: “Unovherusa vandhu, echijijisa mu Judhiya mwese, kutanga ngo mu Garire mbhera kuguma kuno.”

Jesu pamberi pa Herodhi

⁶ Asi Piratu azwa izvi, wakabvunjisa kuti; “mundhu uwu wayiva mu Garire here?”

⁷ Naapo waziva kuti wayiva wo umambo hwa Herodhi, wakamutumira kuna Herodhi, uwo naye wayiva mu Jerusarema ngaao mazuva.

⁸ Naapo Herodhi amuvona Jesu wakadakara kakurutu, ngokuti iye wayiva no chidisiso chokuti amuvone kubvira mukuvo wakareba, ngokuti iye wayinga azwa ndiye; naye wayida kuvona chivoniso chinoitwa ndiye.

⁹ Naye wakamubvunjisa ngo mazwi akawanda; asi aazivi kupingura chiro na chimwe.

¹⁰ No vapristi vakuru no vatari vakayima vechivangirira kumuitira ndava.

¹¹ Na Herodhi pamwepo no masocha ake vakamupsheruja, vakamuitira jee, vakamusimija nguvo inon'anikira, wakamutumirazve kuna Piratu.

¹² Herodhi na Piratu vakaiyaniswa ngo zuva iro; ngokuti ngo pasure vaiitirana ukorore pakati pavo.

Jesu unotongehwa kufa

¹³ Piratu wakadanija pamwepo vapristi vakuru, no vatongi, no vandhu.

¹⁴ Wakati kwavari: “Imwimwi mwaviyisa uwu mundhu kwendiri kudari ngo unopaukisa vandhu; vonanyi, inini ndakamubvujisisa pamberi penyu, andizivi kuwana ndava kuno mundhu uwu kwo izvo zvomunomuitira ndava ndizvo.

¹⁵ Pikija Herodhiwo: Ngokuti iye wamuhwirijazve kwetiri; vonanyi, akuna chiro chakaitwa ndiye chinosisira kuti afe.

¹⁶ Ndizvo ndinozomurova, ndimusunungure.”

¹⁷ Zvino kwaisisira kuti asunungure kwavari mubhanditi umwe kumushongano wo kuha.

¹⁸ Asi vakadanijira vese pamwepo: “Bvisai uwu mundhu, utisunungurire Bharabhasi.”

¹⁹ Uwo wakafungihwa mu guniya ngo ndava yo kumukira umambo kwaakaita mu dhoropa, na ngo ndava yo kuuraya.

²⁰ Piratu wakavereketazve kwavari, echida kumusunungura Jesu;

²¹ asi vakadanijira, vechiti: “Mukohomerei, mukohomerei.”

²² Naye wakati kwavari ngo kwo chitatu: “Ngenyi? Wakashaishenyi mundhu uwu? Andizivi kuvona kwaari ndava inosisira kuti afe; ndizvo ndinozomurova ndimusunungure.”

²³ Asi paripo vakavangirira ngo mazwi makuru, vechikumbira kuti akohomehwe. No mazwi avo akanyisa.

²⁴ Na Piratu wakagura kuti izvo zvo vakakumbira zviyitike.

²⁵ Naye wakavasunungurira uwo wayinga akafungihwa mu guniya ngo ndava yo kumukira no kuuraya, uwo wo vakakumbira; asi wakavapa Jesu kuti vayite kuda kwavo ndiye.

Kukohomehwa kwa Jesu

²⁶ Naapo vechimukweva kuenda naye, vakabata mundhu waizwi ndi Simoni wo Kureni, echibva mundharaunda, vakamutwarisa muchinjiko kuti autware ngosure kwa Jesu.

²⁷ Yakamutevera mbungano huru yo vandhu, no vanakaji avo vaimuchema no kumutsumba.

²⁸ Asi Jesu echikunukukira kwavari, wakati: “Vana vo kaji vo Jerusarema, musandichemera inini, asi jichemerenyi imwimwi no vana venyu.

²⁹ Ngokuti, vonanyi, mazuva achazoviya evanozoti, jinomuchena ngomwa, no ndani jisikazivi kumbobereka, no mazamu asikazivi kumwisa.

³⁰ Naapo vanozotanga kubvunja ku matundhu, kuti: Tiwirenyi panyezuru pedu, no kuzvimatundhu, kuti: Tidumaijenyi.

³¹ Ngokuti kudari vanoyita izvi kumiti muvishi, chinyi chinozoitwa kuno wakaoma?”

³² Zve vaviri vamweni majongoni vakakweviwa naye koourawa.

³³ Naapo vaguma pandau inozwi, Dendhenya, vakamukohomera apo, no vashaishi avo, umwe ngo kumuho, no umweni ngo kuboshwe.

³⁴ Jesu wakati: “Baba, varegererei; ngokuti avachizivi chovanoita.” Navo vechikovanisirana nguvo jake pakati pavo, vakaringijira hakata.

³⁵ No vandhu vakayima, vechiringira. No vatongi navo vakamuitira jee, vechiti: “Iye wakaponesa vamweni; ngaajiponese, kuti uwu ari Kristu wa Mwari, wakasananguhwa wake.”

³⁶ No masocha nawo akamuitira jee, vechiviya kwaari, no kumupa vhini inoshasha,

³⁷ vechiti: “Kuti iwewe uri Mambo wo vajudha jiponese.”

³⁸ Zve kwayivapo matahwa ngo panyezuru pake, aiti: “UWU NDI MAMBO WO VAJUDHA.”

³⁹ Umwe wo vashaishi avo vakakohomehwa naye, wakamutuka, echiti: “Handiwe here Kristu? Chijiponesa iwewe na isisu.”

⁴⁰ Asi umweni wakapingura echimurambisa, akati: “Aumutyi here Mwari, wechivona kuti uri mukurashwa kumweko naye?

⁴¹ Na isisu ngo zvirokwazvo tinosisira kurashwa; ngokuti tinoashira chinosisira zviito zvedu: Asi uwu mundhu aazivi kuyita chakashata.”

⁴² Naye wakati: “Jesu ndicherechejevo, apo woonghwina mu Umambo hwako.”

⁴³ Naye wakati kwaari: “Ngozvirokwazvo ndinoti kwouri, kuti; nyamasi unozovapo neni mu Paradhaisi.”

Kufa kwa Jesu

⁴⁴ Zvino kwayiva kunonga nguva yo chitandhatu, no chidima chakafukija nyika yese mbhera kuguma nguva yo chifumbhamwe.

⁴⁵ No kujeka kwo zuva kwakapera; no jira ro mu themperi rakaparuka ngo pakati.

⁴⁶ Naapo Jesu wadanijirazve ngo izwi guru, wakati: “Baba, ndinopa mweya wangu mu nyara jako.” Naapo wakavereketa kudaro, mweya wake wakabuda.

⁴⁷ Apo nduna yo zana yavona izvo zvakaitika, yakamukuja Mwari, yechiti: “Ngozvirokwazvo uwu mundhu wayiva wakarurama.”

⁴⁸ No mbungano yese iyo yakaungana pamwepo kuvona izvi, apo yavona zvakaitika, vakahwirira vechirova maditi avo.

⁴⁹ Naavo vese vaizivana naye, no majimayi ao akamutevera echibva Garire vakayima vari ndhambo, vechivona izvi zvese.

Kuvigwa kwa Jesu

⁵⁰ Kwayivapo, mundhu waizwi ndi Josefa, wayiva umwe wo vatongi, mundhu wakanaka, no wakarurama.

⁵¹ (Iye inga asikazivi kutenderana no bangano rokuyita kwavo), wayiva mundhu wo Arimatiya, dhoropa ro vajudha, waindovetera Umambo hwa Mwari.

⁵² Mundhu uwu wakaenda kuna Piratu, akakumbira muviri wa Jesu.

⁵³ Naye wakaubzusa pasi, akaupukutira ngo jira ro kuchena, akauviga mu guva rakachiwa pa buwe, umwo musikazivi kumbovigwa no mundhu.

⁵⁴ Naro rayiva zuva rokunasirira Phasika, no sabatha rakakwedera.

⁵⁵ No majimayi ao ayinga akabva naye Garire, akatevera ngosure, vakavona guva, no kuvigwa kwo muviri wake.

⁵⁶ Navo vakahwirira, vakanasirira mitombo ino gwema, no maka. Vakazorora ngo zuva ro sabatha kudari ngo zvinoreva mupango.