Ruka 22 - NOVO TESTAMENTO EM NDAU

Bangano ro kuuraya Jesu

¹ Zvino mushongano wo kuha zvimanda zvisina mumera wakakwedera, unozwi Phasika.

² No vapristi vakuru no vatari vakapshaka kuti vangayita maitirenyi kuti vamuuraye; ngokuti vaitya vandhu.

³ Na Sathani wakanghwina kuna Judhasi uwo waizwi Isikariyoti, ari umwe wo vari gumi na vaviri.

⁴ Wakabuda kuenda kwoosongana no vapristi vakuru no makota, kuti waizomuita mapirenyi kwavari.

⁵ Navo vakadakara, vakayita chitenderano kuti vamupe mare.

⁶ Ndizvo wakatenda, akapshaka mukuvo wokumupira kwavari, pasina mbungano.

Kunasirihwa kwo Phasika rokugumisira

⁷ No zuva ro zvimanda zvisina mumera rakaguma, iro raibaihwa bvuta ro Phasika.

⁸ Naye wakatuma Pedru na Johani, echiti: “Endanyi mutinasirire Phasika, kuti tirihe.”

⁹ Navo vakati kwaari: “Unoda kuti tirinasirire kwapi?”

¹⁰ Naye wakati kwavari: “Vonanyi, apo mwoonghwina mu dhoropa, unozosongana nemwi mwanarume wakatwara chijuvi cho kumwa; muteverenyi ku nyumba yaanonghwina.

¹¹ Nemwi munozoti kumune wo nyumba, Mujijisi unoti kwouri: Riri kwapi kamera ro vaeni, apo pondinozoha Phasika no vajiji vangu?

¹² Naye unozomupangijira kamera guru ro muturika, rine mujiyo jaro: Tinasirirenyi apo.”

¹³ Navo vakaenda, vakavona kudari ngo zvaakananga kwavari: Navo vakanasirira Phasika.

Kuha kwo kugumisira

¹⁴ Naapo nguva yaguma wakagara pasi no vapostori.

¹⁵ Naye wakati, kwavari: “Ngo kudisisa ndaida kuha iri Phasika nemwi ndisati ndatambujika;

¹⁶ ngokuti ndinoti kwomuri: Andichazorihizve, mbhera rizarisike mu Umambo hwa Mwari.”

¹⁷ Naye wakatora tsani, naapo abonga, wakati: “Toranyi ichi, mukovanisirane pakati penyu.

¹⁸ Ngokuti ndinoti kwomuri, andichazomwi ku michero yo muvhini mbhera hugume Umambo hwa Mwari.”

¹⁹ Naapo wakatora chimanda, achibonga, wakachigura, akachipa kwavari, akati: “Ichi chiri muviri wangu, unopihwa ngo ndava yenyu; itanyi ichi kundicherecheja inini.”

²⁰ No tsani ngokudaro; ngosure kwokuha, echiti: “Tsani iyi iri chitenderano chipsha mungazi yangu, iyo inoparajwa ngo ndava yenyu.

²¹ Asi vonanyi, nyara yo uwo unondipira ineni pa thafura.

²² Ngokuti ngo zvirokwazvo Mwana wo Mundhu unoenda kudari ngo izvo zvaakaemesehwa; asi ikhombo kuno uwo mundhu waanozopihwa ndiye!”

²³ Navo vakatanga kubvunjisana pakati pavo kuti ndiyani kwavari waizoita ichi chiro.

Ndiyani uri mukuru mu Umambo hwa Mwari

²⁴ Kwakabudazve hasha pakati pavo, yokuti ndiyani kwavari unozoyita mukuru.

²⁵ Asi iye wakati kwavari: “Majimambo omajinja anotonga panyezuru pavo, navo vano simba panyezuru pavo vanodanijwa kuti vari vadetseri.

²⁶ Asi imwimwi amuzodaro akadi; asi iye uri mukuru pakati penyu ngaadari ngo mudoko, no uwo uri mutongi ngaadari ngo unoshandira.

²⁷ Ngokuti ndiyani mukuru, uwo unogara pa thafura, nokuti uwo unoshandira? Andiye here uwo unogara pa thafura? Asi inini ndiri pakati penyu ndinonga uwo unoshandira.

²⁸ Asi imwimwi muri avo vanogara neni mukuejwa kwangu.

²⁹ Neni ndinomuemesera umambo kudari ndi Baba wangu vakandiemesera inini,

³⁰ kuti muhe mwechimwa pa thafura rangu, mu umambo hwangu; nemwi munogara pa madendemaro, mwechitonga majinja ari gumi na maviri a Israeri.”

Kuziviswa kwa Pedru

³¹ “Simoni, Simoni, ringira Sathani wakatendehwa kuti akupuwe, kuti akupepete kudari ngo koroni.

³² Asi inini ndakakukumbirira kuti kugonda kwako kusarembejeka; newe apo watenderukazve, ugwinyise hama jako.”

³³ Naye wakati kwaari: “Mambo ndakanasirihwa kutoenda newe mu guniya, no mu kufa.”

³⁴ Naye wakati: “Ndinokubvunja iwewe Pedru, jongwe arizoriri nyamasi, usati waramba katatu kuti aundizivi.”

Chikhwama, nyede no shoti

³⁵ Naye wakati kwavari: “Apo zvandakamutuma musina chikhwama, no nyede, no magwada, mwakatama chiro here?” Navo vakati: “Atina chetakatama.”

³⁶ Naye wakati: “Asi zvino uwo uno chikhwama, ngaachitore, no uno nyede ngokudaro; no uwo usina ngaatengese bhachi rake atenge shoti.

³⁷ Ngokuti ndinoti kwomuri, kuti aya matahwa kunodikana kuti azarisike ndini, kuti: Naye wakaverengwa pamwepo no vapauki. Ngokuti izvo zvakanangwa ngo ndava yangu zvinozoitika.”

³⁸ Navo vakati: “Mambo, vonayi, shoti mbiri jiri pano.” Naye wakati kwavari: “Zvakwana.”

Mukumbiro pa dundhu ro Maorivhe

³⁹ Naye wakabuda kunja, wakaenda kudari ngo chirovejeso chake ku dundhu ro Maorivhe; no vajiji vakamutevera.

⁴⁰ Naapo aguma pandau iyo, wakati kwavari: “Kumbiranyi, kuti musanghwina mukuejwa.”

⁴¹ Naye wakasiyana navo ndharauko inonga yo kukhandira buwe; wakagwadama ngo makokobvi, akakumbira,

⁴² echiti: “Baba, kudari wechida, bvisai tsani iyi kwendiri; asi, kusaita kuda kwangu, asi kuda kwako ngakuitike.”

⁴³ Yakavoneka kwaari ngirosi yechibva mu gore, yechimugwinyisa.

⁴⁴ Ari mukuhwajihwa kukuru, wakagwinyisira kukumbira, no ziya rake rayiva rakadari ngo madondhwe makuru ongazi echidondhera pa mavhu.

⁴⁵ Naapo amuka kubva mumukumbiro wake, wakaviya kuno vajiji vake, akavawana vakavata hope ngo ndava yo kusvipa mwoyo.

⁴⁶ Naye wakati kwavari: “Munovatirenyi? Mukanyi, mukumbire, kuti musazonghwina mukuejwa.”

Kusungwa kwa Jesu

⁴⁷ Kwakati achavereketa, yakaviya, mbungano, no uwo waizwi Judhasi, umwe wo vari gumi na vaviri, echivatungamirira; naye wakakwedera kuna Jesu kuti amupshonzve.

⁴⁸ Asi Jesu wakati kwaari: “Judhasi, wopira here Mwana wo Mundhu ngo kumupshonzva?”

⁴⁹ Naapo avo vaimutendeneja vavona icho chakaitika, vakati: “Mambo, tobaya here ngo shoti?”

⁵⁰ No umwe wavo wakatikuti wakatema muranda wo mupristi mukuru, akagura njeve yake yo kumuho.

⁵¹ Asi Jesu wakapingura, akati: “Regeranyi zvakwana!” Naye wakapshasa njeve yake, akamurapa.

⁵² Jesu wakati kuno vapristi vakuru no makota o themperi, no vakuru avo vakaviya kurwisana naye: “Mwabuda ngenyi kuviya munonga munorwa no mbavha, muno shoti no ndonga?

⁵³ Apo ndichinemwi mazuva no mazuva mu themperi, amuzivi kutambanuja nyara jenyu kurwa neni, asi iyi iri nguva yenyu, no yo simba ro chidima.”

Pedru unoramba Jesu

⁵⁴ Navo vakamusunga, vakamukweva kuenda naye, mu nyumba yo mupristi mukuru. Asi Pedru wakatevera ari ngo ndhambo.

⁵⁵ Naapo vabasa muriro mukati mwo ruvanje, vogara pasi pamwepo, Pedru wakagara pasi pakati pavo.

⁵⁶ No musikana wakatikuti, echimuvona akagara mukujeka kwo muriro, echimuringisisa, wakati: “Mundhu uwu naye wayiva naye.”

⁵⁷ Asi iye wakaramba, echiti: “Musikanewe andimuzivi.”

⁵⁸ Ngosure kwo mukuvo mudoko, umweni wakamuvona, akati: “Iwewe newe uri umwe wavo.” Asi Pedru wakati: “Mwanarumewe, andiri wavo akadi.”

⁵⁹ Ngosure kwo mukuvo, wayida kuyita nguva imwe, umwenizve wakagwinyisa kunanga, echiti: “Ngozvirokwazvo uwu wayiva naye, ngokuti uri mu Garire.”

⁶⁰ Asi Pedru wakati: “Mwanarumewe andizvizivi zvo unovereketa.” Paripo Pedru achavereketa, jongwe rakarira.

⁶¹ Na Mambo wakakunukuka, amuringira Pedru, na Pedru wakacherecheja izwi ra Mambo, kuti wakati kwaari: “Jongwe risati rarira nyamasi unozondiramba katatu.”

⁶² Naye wakabuda kunja, akachema kakurutu.

Masocha anoita jee Jesu

⁶³ No vanarume avo vakamusunga Jesu vakamuitira jee, vakamurova.

⁶⁴ Vakamufukijira majiso, vakamubvunjisa vechiti: “Profeta; ndiyani uwo wakurova?”

⁶⁵ Vakavereketa zviro zvimweni zvakawanda ndiye vechimutuka.

Jesu pamberi po utongi wo vajudha

⁶⁶ Naapo kwaeja, vakaunganija pamwepo vakuru vo vandhu, no vapristi vakuru, no vatari; navo vakamukweva kuenda naye kubangano ravo,

⁶⁷ vechiti: “Kuti uri Kristu, tibvunjei.” Asi iye wakati kwavari: “Kudari ndikamubvunja, amutendi;

⁶⁸ pikija ndikamubvunjisa, imwimwi amuzondipinguri.

⁶⁹ Asi kubvira zvino Mwana wo Mundhu unozogara ngo kumuho kwo simba ra Mwari.”

⁷⁰ Navo vese vakati: “Ndizvo iwewe uri Mwana wa Mwari here?” Naye wakati kwavari: “Imwimwi mwatonanga kuti ndiriye.”

⁷¹ Navo vakati: “Tichatama chapupu chimweni ngenyi? Ngokuti isisu tambhwine tazwa ngo muromo wake.”