Ruka 21 - NOVO TESTAMENTO EM NDAU

Chipo cho shirikaji

¹ Wakaringira, akavona maguruja echikhandira zvipo zvavo mundau yo zvipo.

² Naye wakavona shirikaji yakatikuti yayiva murombo yechikhandiremwo zvimare zviviri zvaizwi marepta.

³ Naye wakati: “Ngozvirokwazvo ndinoti kwomuri, kuti iyi shirikaji iri murombo yakhandiremwo mare yakapinda kuwanda kune yavo vese.

⁴ Ngokuti avo vese vakhandiremwo muzvipo maunguhwa epfuma yavo: Asi iyo kubva kwo kutama kwayo yakhandiremwo zvese zvoinopona ndizvo.”

Jesu unovereketa ngo kuphwanywa kwo themperi

⁵ Kwakati vamweni vachavereketa ngo themperi kuti rakanemeswa ngo mapuwe akawanda, no zvipo, iye wakati:

⁶ “Ngo ndava yo izvi zvomunovona, mazuva anozoviya apo arizosiyiwi buwe rimwe rakaturikwa panyezuru po rimweni, risikazowiswi pasi.”

Kutambujika no kuteverehwa

⁷ Navo vakamubvunjisa, vechiti: “Mujijisi, izvi zvinozoitika rini? Chinyi chiri chivoniso apo zvooda kuitika?”

⁸ Wakati: “Ngwaranyi kuti musazopaukiswa; ngokuti vazhinji vanozoviya ngo zina rangu, vechiti: Inini ndiriye; nokutizve, mukuvo wakwedera; musavatevera.

⁹ Naapo mwoozwa ngokurwa, no kumukirana, musazotyiswa. Ngokuti kunosisira kuti izvi zviyitike kutanga, asi magumo aaripi zvinopano akadi.”

¹⁰ Naapo wakati kwavari: “Jinja rinozomukira jinja, no umambo unozomukira umambo,

¹¹ kunozovapo kuzungunyika kukuru kwo nyika, no ku ndau jakaparajana, njara no ndhenda; no zvinotyisa kakurutu, no zvivoniso zvakakura zvinobva mu gore.

¹² Asi izvi zvese zvisati zvaitika, vanozomubata, navo vanozomutambuja, vechimupira mu nyumba jo kudira, no mu maguniya, vechimuendesa pamberi po majimambo no po vatongi ngo ndava yo zina rangu.

¹³ Kugumisira kwazvo kunozoita uchapupu kwomuri.

¹⁴ Ndizvo nasiriranyi mu mwoyo yenyu, kuti musazodembatemba ngo pamberi kuti chinyi chomunozopingura.

¹⁵ Ngokuti ndinozomupa muromo no kungwara ukwo kwo vasikazokoni vakorore venyu kurwisana nakwo nokuti kupingurazve.

¹⁶ Asi munozopihwa ngo vabari, no vakoma, no hama, no shamwari; navo vanozoita kuti vamweni vandhu vaurawe.

¹⁷ Nemwi munozonyenywa ndivo vese ngo ndava yo zina rangu.

¹⁸ No bvuji rimwe ro musoro yenyu arizorashiki.

¹⁹ Mukusengerera kwenyu munozoponesa ndaramo jenyu.”

Kutongwa kwo Jerusarema

²⁰ “Asi apo mwoovona Jerusarema rechitendenejwa ngo hondo, mwotoziva kuti kuparajwa kwaro kwaaphedo.

²¹ Naapo vari mu Judhiya ngavatizire ku matundhu, naavo vari mukati mwaro ngavabudemwo; naavo vari mundharaunda vasazonghwinemwo.

²² Ngokuti ao ari mazuva okutambujwa, kuti zvese izvo zvakatahwa zvizarisike.

²³ Ikhombo kwavari vano mimba, naavo vanomwisa ngaao mazuva! Ngokuti kunozovapo kutambujika kukurutu panyezuru po nyika, no ushungu panyezuru po vandhu ava.

²⁴ Navo vanozowa ngo kupinja kwo shoti, vanozokweviwa kuyita hloko kuenda ku majinja ese, no Jerusarema rinozotsikwatsikwa pasi ngo vo majinja, mbhera nguva yo vo majinja izarisike.”

Kuviya kwo Mwana wo Mundhu

²⁵ “No zvivoniso zvinozoitika pa zuva, no pa mweji, no pa ndhondho; no panyezuru po nyika kunozovapo kurembejeka mukukangaijwa ngo ndava yo kutindhira kwo jombe, no mavimbi.

²⁶ No vandhu vanozozirika ngo kutya, ngo kuringira izvo zvinozoguma mu nyika: Ngokuti simba ro mu gore rinozozungunyiswa.

²⁷ Naapo vanozovona Mwana wo Mundhu echiviya mu makore ano simba no uthende hukuru.

²⁸ Asi apo izvi zvootanga kuitika, ringiranyi mu gore, mumuse musoro yenyu; ngokuti kuripihwa kwenyu kunokwedera.”

²⁹ Naye wakavereketa muezaniso kwavari, echiti: “Ringiranyi mukuyu, no miti yese.

³⁰ Kuti yoobvikitira, munoivona, nemwi munoziva mwambhwine kuti zienja zvino raaphedo.

³¹ Ngokudaro nemwi apo mwoovona izvi zvechiitika, zivanyi kuti Umambo hwa Mwari hwaaphedo.

³² Ngozvirokwazvo ndinoti kwomuri, kuti, uwu mubarihwana auzopindi akadi zvisati zvaitika izvi zvese.

³³ Gore no nyika zvinozopinda, asi mazwi angu aatongozopindi akadi.”

Garanyi mwechirinda

³⁴ “Asi mwechijingwarira imwimwi kuti pamweni mwoyo yenyu ingazozvimbihwa ngo kuhisa, no kurejera, no kudembatemba ngo zvo kupona uku, no zuva iro rimugumire ngo kukasira kudari ngo chirimbana.

³⁵ Ngokuti ngokudaro rinozogumira vese avo vanogara panyezuru po nyika yese.

³⁶ Asi rindanyi ngo nguva jese, mwechipota ngo nguva jese, kuti mukone kupokonyoka kubva kune izvi zvese zvinozoitika, no kuyima pamberi po Mwana wo Mundhu.”

³⁷ Masikati ese waijijisa mu themperi, asi usiku waibuda kuenda koovata ku dundhu ro Maorivhe.

³⁸ No vandhu vese vaifumira kuviya kwaari mu themperi, koomuzwa.