Ruka 2 - NOVO TESTAMENTO EM NDAU

Kubahwa kwa Jesu

¹ Kwakaitika ngaao mazuva, wakabuda mupango wechibva kuna Khesari Agustu wokuti nyika yese itarihwe mazina.

² No uku kutarihwa kwayiva kwo kutanga kwakaitika apo Kureniyo ari mutongi wo Siriya.

³ Navo vese vakaenda kwootarihwa, mundhu wese ku dhoropa raakabarihwa.

⁴ Na Josefavo wakakwira echibva Garire mu dhoropa ro Nazaretha, kuenda Judhiya, ku dhoropa ra Dhavhidha raizwi Bheterehema, ngokuti iye wayiva wo mbhuri yo vhumbo ra Dhavhidha;

⁵ kuti atarihwe pamwepo na Mariya uwo wayiva mukaji wake, iye wayinga wakurihwa ngo mimba.

⁶ Kwakaitika vachiri apo, kuti mazuva akapera okuti abare.

⁷ Naye wakabara dangwe rake ro rume; naye wakamupukutira ngo jira, wakamurajika muchijiyo cho n'ombe, ngokuti inga kusina ndau yavo mu nyumba yo vaeni.

Ngirosi no vahavisi

⁸ Kwayivapo vahavisi munyikeyo, vaigara mushango, vechingwarira mushambi wavo usiku.

⁹ No ngirosi ya Jehovha yakayima phedo pavo, no uthende hwa Jehovha hwakajeka kuvatendeneja; navo vakatya kakurutu.

¹⁰ No ngirosi yakati kwavari: “Musatya, ngokuti vonanyi ndinomuzisira masoko akanaka, anodakajisa kakurutu, ao ari ovandhu vese.

¹¹ Ngokuti mwabarihwa nyamasi muguta ra Dhavhidha Muponesi ndi Kristu Mambo.

¹² No ichi chinozoita chivoniso kwomuri, kuti: Munozovona ruchiya rwakapukutihwa ngo jira rwakarajikwa muchijiyo cho n'ombe.”

¹³ Paripo yaivapo no ngirosi mbungano huru yo hondo yo mu gore, yechikuja Mwari, yechiti:

¹⁴ “Ngaakujwe Mwari mu denga-denga, no kunyarara mu nyika pakati po vandhu, avo vaanonasa kudakara ndivo.”

¹⁵ Kwakaitika apo ngirosi jaenda mu gore kubva kwavari, vahavisi vakati umwe kwo umweni: “Ngatiende zvino Bheterehema, toovona ichi chaitika, chaazivisa Mambo kwetiri.”

¹⁶ Navo vakaviya ngo kukasira, vakavavona vese Mariya na Josefa no ruchiya rwakarajikwa muchijiyo cho n'ombe.

¹⁷ Kwakati vauvona vakazivisa masoko ao akavereketwa kwavari ngo ndava yo mwana uwu.

¹⁸ Navo vese vakazwa vakashamiswa ngo izvo zvovakabvunjwa ngo vahavisi.

¹⁹ Asi Mariya wakangwarira izvi zvese, echizvichengetesa mu mwoyo mwake.

²⁰ No vahavisi vakahwirira, vechikurisa no kukuja Mwari ngo izvo zvese zvovakazwa, no zvovakavona, kudari ngo zvakavereketwa kwavari.

Kuchekwa no kutatijwa kwa Jesu

²¹ Naapo mazuva masere apera okuti achekwe, vakamudura zina rake kuti Jesu, iro rakaduhwa ngo ngirosi isati yavapo mimba yake.

²² Kwakati apera mazuva okucheneswa kwavo, kudari ngo mupango wa Mosi, vakakwira naye Jerusarema kuti vamupire kuna Jehovha,

²³ (kudari ngo zvakatahwa mu mipango ya Jehovha, kuti: Vana vorume vese vari matangwe vanozozwi vakachena kuna Jehovha).

²⁴ No kupa mudiro kudari ngo zvakanangwa mu mipango ya Jehovha, wo magovora maviri, nokuti mapwipwi maviri onjiva.

²⁵ Vonanyi, kwayivapo mundhu mu Jerusarema zina rake raizwi ndi Simiyoni, no mundhu uwu wayiva wakarurama, no waidira Mwari, echigarira kuembezehwa kwa Israeri; no Mweya Wakachena vayiva panyezuru pake.

²⁶ Nakwo kwakapangijihwa kwaari ngo Mweya Wakachena, kuti, aatongozofi asati avona Kristu wa Jehovha.

²⁷ Echikweviwa ngo Mweya wakaviya mu themperi; naapo vabari vakamuzisa mwana Jesu, kuti vayite kwaari kudari ngo chirovejeso cho mupango,

²⁸ naye wakamutakura mu mukono yake, wakakuja Mwari, echiti:

²⁹ “Mambo, zvino tendera kuti muranda wako aende ngo kunyarara, kudari ngo izwi rako,

³⁰ ngokuti majiso angu avona ruponeso rwako.

³¹ Uhwo hwo wakanasirira pamberi po hope yo vandhu vese;

³² kujeka ukwo kunopangijira ku majinja, kuri uthendezve hwo vandhu vako Israeri.”

³³ Baba wake na mayi wake vakashamiswa ngo izvo zvakavereketwa ngo ndava yake.

³⁴ Na Simiyoni wakavadakajisa, wakati kuna mayi wake Mariya: “Vonayi, mwana uwu wakaemesehwa kuwa no kumukazve kwo vazhinji mu Israeri; no kuyitazve chivoniso chinorambwa.

³⁵ (Eya no shoti inozobaya mweya wako); kuti murangarijo yo mwoyo mizhinji ivoniswe.”

³⁶ Kwayivapozve Ana muprofeti wokaji mwana wa Fanueri wo jinja ra Aseri, wayinga waaharahwa, iye wayinga akagara no mwamuna makore ari manomwe sure kwo husikana hwake.

³⁷ Naye wayiva shirikaji makore ari makumi masere na marongomuna, iye aazivi kutongobuda kubva mu themperi, echidira, no kuera kuha, no kukumbira usiku no masikati.

³⁸ Naye echiviya ngo nguva iyo wakabonga Mwari, wakavereketa ndiye kwavari vese vaigarira kuripihwa kwo Jerusarema.

³⁹ Naapo vayinga vaita zvese zviro kudari ngo mipango ya Jehovha vakahwirira Garire ku dhoropa ravo Nazaretha.

⁴⁰ No mwana wakakura, wakagwinya, uno ungwaru, no nyasha ja Mwari jaiva panyezuru pake.

Jesu aano makore gumi na maviri

⁴¹ No vabari vake vakagara vechindoenda makore no makore Jerusarema ku mushongano wo kuha wo Phasika.

⁴² Kwakati iye aano makore ari gumi na maviri, vakakwira kudari ngo chirovejeso cho kuenda ku mushongano wo kuha.

⁴³ Naapo vapeja mazuva awo voopetuka, murumbwana Jesu wakasara sure mu Jerusarema; no vabari vake avazivi kuzviziva.

⁴⁴ Asi vechirangarija kuti uri mukati mwo mbungano, vakafamba mumango wo zuva rimwe; navo vakamupshaka mukati mwo hama javo no shamwari javo,

⁴⁵ naapo vasikamuwani, vakahwirira Jerusarema, vechimupshaka.

⁴⁶ Kwakaitika ngosure kwo mazuva matatu, vakamuwana ari mu themperi, akagara mukati mwemakurukota, echivazwa, no kuvabvunjisazve.

⁴⁷ Navo vese vakamuzwa vakashamiswa ngokuziva kwake, na ngo kupingura kwake.

⁴⁸ Kwakati vamuvona vakashamiswa: na mayi wake vakati kwaari: “Mwana watiitira chakadari ngenyi? Vonayi, baba wako neni takakupshaka tichisururika.”

⁴⁹ Naye wakati kwavari: “Mwaindipshaka ngenyi? Amuchaiziva here kuti kunosisira kuti ndiite zva baba wangu?”

⁵⁰ Navo avazivi kuzwisisa izwi iro raakavereketa kwavari.

⁵¹ Naye wakabzuka navo, wakaguma Nazaretha, wakavapurukira; na mayi wake vakangwarira mazwi aya mu mwoyo mwavo.

⁵² Na Jesu wakakura muungwaru, na ngo muviri, no mukudikanwa ndi Mwari no vandhu.