Ruka 19 - NOVO TESTAMENTO EM NDAU

Jesu unodanija Zakeu

¹ Naye wakanghwina, echipinda ngo mu Jeriko.

² Vonanyi, mundhu zina rake raizwi ndi Zakeu; iye wayiva mukuru wo vashabisi, wayiva mukhupuki.

³ Naye wakapshaka kuda kumuvona Jesu kuti uri wakadini; asi wayinga asikakoni ngo ndava yo mbungano, ngokuti iye wayiva mufupi.

⁴ Naye wakagogoma kuenda mberi, wakakwira mumuti unozwi sukamore kuti amuvone, ngokuti iye waipinda ngo iyo njira.

⁵ Kwakati Jesu aguma apo, wakaringira nyezuru, akati kwaari: “Zakeu, kasira kubzuka; ngokuti kunodikana kuti ndigare mu nyumba yako.”

⁶ Naye wakakasira, kubzuka, wakamuashira ngo kudakara.

⁷ Naapo vavona icho vakan'un'uta vese, vechiti: “Wanghwina koogara no mundhu uri mushaishi.”

⁸ Na Zakeu wakayima, akati, kuna Mambo: “Vonayi Mambo, ndinopa bindikati ro upfumi hwangu ku varombo; no kudari ndakatora chiro ku mundhu ngo urimbwi, ndinomuhwirijira karongomuna.”

⁹ Jesu wakati kwaari: “Nyamasi ruponeso rwaguma kuno iyi nyumba, ngokuti iye uri mwana wa Abrahama.

¹⁰ Ngokuti Mwana wo Mundhu wakaviya kupshaka no kuponesa izvo zvakarashika.”

Mbiriko yo zvipuwo zvedu

¹¹ Kwakati vachazwa izvi, wakaenda mberi kuvereketa muezaniso, ngokuti wayiva phedo no Jerusarema, ngokutizve ivo vaigarira kuti Umambo hwa Mwari waizovoneka ngo kukasira.

¹² Ndizvo wakati: “Mundhu mukuru wakatikuti, wakaenda ku nyika yayiva ndhambo, kuti ajiashirire umambo, no kuviyazve.

¹³ Naye wakadanija varanda vake vari gumi, akavapa gumi ro mbondo, wakati kwavari, barisanyi mbhera ndiviye.

¹⁴ Asi vandhu vo nyika yake vakamunyenya, vakatuma vatumwa sure kwake, vechiti: Atidi kuti mundhu uwu atonge panyezuru pedu.

¹⁵ Kwakaitika apo wooviyazve, naashira umambo, wakapanga kuti avo varanda vaayinga akapa mare, vadanijwe kwaari, kuti azive zvo vakaviyihwa ngo kuibarisa.

¹⁶ Uwo wokutanga wakaviya pamberi pake, akati: Mambo mbondo yako yakaviyihwa ngo jimweni mbondo jiri gumi.

¹⁷ Naye wakati kwaari: Wakanasa iwewe muranda wakanaka; ngokuti wakagondeka ngo zvishomani, wechitonga panyezuru po madhoropa ari gumi.

¹⁸ No wo chipiri wakaviya, akati: Mambo mbondo yako yakaviyihwa ngo mbondo shanu.

¹⁹ Naye wakati kwaarizve: Wechitonga panyezuru po madhoropa mashanu.

²⁰ No umweni wakaviya, akati: Mambo, mbondo yako, iyo yondakangwarira mudhuku:

²¹ Ngokuti ndakakutya, ngokuti uri mundhu usikakwanisiki: Unobojera icho chousikazivi kudira pasi, newe unocheka icho chousikazivi kusima.

²² Wakati kwaari: Ngo zvinobuda kubva ku muromo wako ndinozokutonga, iwewe muranda wakashata. Iwewe waitoziva kuti ndiri mundhu usikakwanisiki, ndechibojera icho chendisikazivi kudira pasi, no kucheka cho ndisikazivi kukusha;

²³ ndizvo wakaregera ngenyi kupa mare yangu kwavari mubhangi, neni mukuviya kwangu ndaizoiwana iyo no kuviyihwa kwayo.

²⁴ Naye wakati kuna avo vaiyima phedo: Mutorerenyi, kubva kwaari iyo mbondo mupe kwaari uwo uno gumi ro mbondo.

²⁵ Navo vakati kwaari: Mambo uwo uno gumi ro mbondo.

²⁶ Ndinoti kwomuri, kuno mundhu wese unacho unozopuwa, no kwaari usina, no icho chaanacho chinozobviswa kubva kwaari.

²⁷ Asi avo vakorore vangu, vayinga vasikatendi kuti nditonge panyezuru pavo, vavisenyi pano muvauraye pamberi pangu.”

Kunghwina kwa Jesu mu Jerusarema

²⁸ Naapo avereketa izvi wakatungamira pamberi pavo, kukwira Jerusarema.

²⁹ Kwakaitika apo wakwedera ku Bhetifaje, no Bhetani, ngo pa dundhu rinozwi ro Maorivhe, wakatumira mberi vaviri vo vajiji vake,

³⁰ echiti: “Endanyi mberi mu guta iro romwakaringirana naro; umwo mwoonghwinemwo munozovona tsiru ro mbongoro rakasungwa, iro risikazivi kumbogadhwa ngo mundhu: Risunungurenyi, muviye naro;

³¹ kudari aripo unozomubvunjisa, kuti: Munorisunungurirenyi? Munozonanga kuti: Mambo unorida.”

³² Naapo vakatumwa vakaenda vakavona kudari ngo zvaakavereketa kwavari.

³³ Kwakati, vacharisunungura tsiru, veno varo vakati kwavari: “Munorisunungurirenyi tsiru?”

³⁴ Navo vakati: “Mambo unorida.”

³⁵ Navo vakarizisa kuna Jesu: Navo vakadira nguvo javo panyezuru po tsiru, vakakwija Jesu panyezuru paro.

³⁶ Echifamba, vakaaja nguvo javo mu njira.

³⁷ Naapo echikwedera pa muterero po dundhu ro Maorivhe, mbungano yese yo vajiji yakatanga kudakara, no kukuja Mwari ngo izwi guru, ngo ndava yo mishando yese ino simba yo vayinga vavona.

³⁸ Vechiti: “Unomuchena Mambo uwo unoviya ngo zina ra Jehovha! Kunyarara mu gore, no uthende mu denga-denga.”

³⁹ Vamweni vo vafarisi vayinga mukati mwo mbungano, vakati kwaari: “Mujijisi rambisa vajiji vako.”

⁴⁰ Naye wakapingura, akati kwavari: “Ndinoti kwomuri kuti, kudari ava vanganyarara, mapuwe anozodanijira.”

⁴¹ Naapo wokwedera phedo po dhoropa, echivona, wakarichemera,

⁴² echiti: “Kudari waiziva ngo zuva iri, izvo zviro zvingakupa kunyarara kwako! Asi zvino zvakafishika ku majiso ako.

⁴³ Ngokuti mazuva anozokugumira, apo vakorore vako vanozokusosera, kukutendeneja ngo rusosa, akukonyere mukati, kumativi ese,

⁴⁴ anozokupwanyira pasi, no vana vako vari mukati mwako; navo avazosiyi mukati kwako no buwe rimwe rakagajikwa panyezuru po rimweni; ngokuti iwewe auzivi kuziva mukuvo wo kufambihwa kwako.”

Jesu unochenesa themperi

⁴⁵ Naye wakanghwina mu themperi, wakatanga kuvambirimbijira kunja avo vaitengesa,

⁴⁶ echiti kwavari: “Kwakatahwa kuti; nyumba yangu inozozwi nyumba yo kudira; asi imwimwi mwaiyita bako ro mbavha.”

⁴⁷ Naye wayivajijisa mazuva no mazuva mu themperi. Asi vapristi vakuru no vatari no vakuru vo vandhu vakapshaka kumuuraya.

⁴⁸ Asi avazivi kuwana chiro chovangayita; ngokuti vandhu vese vakabatirira kwaari, vechimupurukira.