Ruka 18 - NOVO TESTAMENTO EM NDAU

Muezaniso wo shirikaji no mutongi

¹ Wakavereketa muezaniso kwavari echiti, kunodikana kuti vandogara vechikumbira, vasazoremba.

² Wakati: “Kwayivapo mu dhoropa mutongi wakatikuti, uwo asaimutya Mwari, asikareremeji no mundhu.

³ Kwayivapo shirikaji mu dhoropa iro; nayo yakagara yechiviya kwaari, yechiti: Nditongerei ndava yangu kuno mukorore wangu.

⁴ Mutongi aazivi kutenda mukuvo wakareba: Asi ngosure kwo uku wakati mukati mwake, pikija inini ndisikamutyi Mwari, nokuti kureremeja mundhu;

⁵ asi ngokuti shirikaji iyi inondinesa, ndinozoitongera kuti isazondinesazve ngokundogara yechiviya.

⁶ Na Mambo wakati: Izwanyi chakanangwa ngo mutongi usikazivi kururama.

⁷ Mwari aazotongi ngo kururama here kuno vakatsananguhwa vake, avo vanochema kwaari masikati no usiku, naye unozononoka kuvabesera here mukuvo wakareba?

⁸ Ndinoti kwomuri, kuti unozovatongera ngo kukasira. Pikija zvakadaro apo Mwana wo Mundhu ooviya, unozovona kugonda mu nyika here?”

Kuzvininipisa pakukumbira

⁹ Wakavereketa uwu muezaniso kuno vakatikuti, avo vakajigonda kuti vari vakarurama, vechishora vamweni.

¹⁰ “Vandhu vaviri vakakwira mu themperi kwookumbira; no umweni wavo wayiva mufarisi, no umweni wayiva mushabisi.

¹¹ Mufarisi wakayima, akakumbira kudari pachake, akati: Mwari, ndinokubonga kuti andizivi kudari ngo vandhu vamweni, vanoba, vasikazivi kururama, vanoomba, kudari ngo uwu mushabisi.

¹² Ndinoera kuha kaviri ngo vhiki; ndinopa chogumi cho zviro zvese zvondinazvo.

¹³ Asi mushabisi echiyima ngo ndhambo aazivi kutenda no kumusa majiso ake kuringira mu gore, asi wakarova diti rake, echiti: Mwari, ndikungurirei inini mushaishi!

¹⁴ Ndinoti kwomuri: Uwu mundhu wakabzuka kuenda ku nyumba yake echipembejwa kuno uwo umweni: Ngokuti mundhu wese unojikurisa unozopfaviswa; asi iye unojipfavisa unozokuriswa.”

Vana vadoko no Umambo hwa Mwari

¹⁵ Navo vaiviisa kwaari chiya javo, kuti ajipshase; asi apo vajiji vavona, vakavarambisa.

¹⁶ Asi Jesu wakavadanija kwaari, echiti: “Tenderanyi vana vadoko kuti vaviye kwendiri, musavarambisa; ngokuti Umambo hwa Mwari ngo hwavakadari.

¹⁷ Ngozvirokwazvo ndinoti kwomuri; uwo usikahuashiri Umambo hwa Mwari kudari ngo mwana mudoko aatongozonghwinimwo.”

Vapfumi no Umambo hwa Mwari

¹⁸ No mutongi wakatikuti wakamubvunjisa, akati: “Mujijisi wakanaka, ndinozoitenyi kuti ndigare ndhaka yo kururama kusikaperi?”

¹⁹ Jesu wakati kwaari: “Unondidanija ngenyi kuti ndiri wakanaka? Akuna naumwe wakanaka, asi umwe ega, Mwari.

²⁰ Unoziva mipango: Usazoomba, Usazouraya, Usazoba, Usazoita chapupu cho kunyepa, Reremeja baba wako na mayi wako.”

²¹ Iye wakati: “Izvi zvese ndakazvingwarira kubvira muudoko hwangu mbhera zvino.”

²² Apo Jesu azwa ichi, wakati kwaari: “Kwasara chiro chimwe: Tengesa zvese zvounazvo upe ku varombo, newe unozova no upfumi mu gore; uviye, unditevere.”

²³ Asi apo azwa wakasururika kakurutu; ngokuti wayiva mupfumi mukuru.

²⁴ Na Jesu echimuringira wakati: “A, kunonesa zvikuru kuno avo vano upfumi kuti vanghwine mu Umambo hwa Mwari!

²⁵ Ngokuti kunopinda kureruka kuno kamera kuti ringhwine ngo pabovo ro njingano, kuno kuti mukhupuki anghwine mu Umambo hwa Mwari.”

²⁶ Asi avo vakazwa izvi, vakati: “Ndizvo ndiyani ungazoponeswa?”

²⁷ Asi iye wakati: “Izvo zvisikaitiki ku vandhu, kuna Mwari zvinoitika.”

²⁸ Na Pedru wakati: “Vonayi, isisu takasiya zvese, tikakutevera.”

²⁹ Naye wakati kwavari: “Ngozvirokwazvo ndinoti kwomuri: Akuna mundhu wakasiya nyumba, nokuti mukaji, nokuti hama, nokuti vabari, nokuti vana, ngo ndava yo Umambo hwa Mwari,

³⁰ usikazoashiri ngo uwo mukuvo zvakawanda zvakahwirijihwa, no ku nyika inoviya unozoashira kupona kusikaperi.”

Jesu unovereketazve ngo kufa no kumuka kwake

³¹ Naye wakatora vari gumi na vaviri, wakati kwavari: “Vonanyi, tinokwira kuenda Jerusarema, nazvo zvakatahwa ngo vaprofeti ngo ndava yo Mwana wo Mundhu zvinozoitika.

³² Ngokuti unozopihwa kuno vo majinja, naye unozoitihwa jee, no kutambujwa, no kupfirihwa mata;

³³ navo vanozomuuraya; na ngo zuva ro chitatu unozomukazve.”

³⁴ Navo avazivi kuzwisisa no chimwe cho izvi, no izwi iri inga rakafishika kwavari, navo avazivi kuzwisisa izvo zvakavereketwa.

Kurapwa kwo bofu

³⁵ Kwakaitika echikwedera Jeriko, bofu rakatikuti rakagara pa njira rechipembha.

³⁶ Rechizwa mbungano yechipinda, rakabvunjisa kuti: “Chinyi?”

³⁷ Navo vakarizivisa kuti Jesu wo Nazaretha arikupinda.

³⁸ Naro rakadanijira, rikati: “Jesu, iwewe Mwana wa Dhavhidha, ndiyitire nyasha.”

³⁹ Naapo vaifamba ngo pamberi vakarirambisa kuti rinyarare; asi rakapinda kudanijira kakurutu, rechiti: “Iwewe Mwana wa Dhavhidha, ndiyitire nyasha.”

⁴⁰ Na Jesu wakayima akapanga kuti riziswe kwaari; naapo rakakwedera wakaribvunjisa kuti:

⁴¹ “Unoda kuti ndikuitirenyi?” Naro rakati: “Mambo, kuti ndivone.”

⁴² Jesu wakati kweriri: “Chivona; kugonda kwako kwakuponesa.”

⁴³ Paripo iro rakavona, rakamutevera, rechikuja Mwari, no mbungano yechizvivona, yakairikija Mwari.