Ruka 16 - NOVO TESTAMENTO EM NDAU

Mungwariri usikagondeki

¹ Wakatizve ku vajiji vake: “Kwayivapo mundhu wakatikuti wayiva mukhupuki, uwo wayiva no mungwariri; naye wakaitihwa ndava yokuti waiparaja upfumi hwake.

² Naye wakamudanija, akati kwaari; chinyi ichi chendinozwa ndiwe? Wechiverenga mushando wo ungwariri wako; ngokuti iwewe auchaitizve mungwariri.

³ No mungwariri wakati mukati mwake: Ndodini, ngokuti mambo wangu wabvisa kwendiri mushando wo ungwariri hwangu? Andina simba ro kurima; ndina nyowa jo kupembha.

⁴ Ndinoziva chendinozoita, kuti, apo ndambirimbijwa kubva mu mushando wo ungwariri hwangu, vanozondiashira mu nyumba javo.

⁵ Naye echidanija kwaari vese vayiva no zvikwereti kuna mambo wake umwe ngaumwe, wakati kuno uwo wo kutanga: Uno zvikwereti zvingana kuno mambo wangu?

⁶ Iye wakati: Zana (100) ro mabiya omafuta. Naye wakati kwaari: Tora tshamba yako ukasire kugara pasi utare kuti makumi mashanu.

⁷ Naapo wakatizve kuno umweni: Iwewe uno zvikwereti zvingana? Naye wakati: Zana (100) ro zvitengu zvo koroni. Naye yakati kwaari: Tora tshamba yako utare kuti makumi masere.

⁸ Na mambo wake wakamukuja mungwariri wakashata ngokuti wayinga wayita ngo kungwara, ngokuti vandhu voiyi nyika vonopinda kungwara kundanga javo kuno vandhu vo kujeka.

⁹ Neni ndinoti kwomuri: Jiyitirenyi shamwari ngo upfumi husikazivi kururama, kuti apo wapera, vangazomuashira muugaro husingaperi.

¹⁰ Iye unogondeka ngo zvidodoko unozogondekazve ngo zvakawanda; no uwo usikazivi kururama ngo zvidodoko uri usikazivi kururamazve ngo zvakawanda.

¹¹ Ndizvo kuti musikazivi kuyita vanogondeka ngo upfumi husikazivi kururama, ndiyani unozomugonda ngo upfumi hwo gwinyiso?

¹² No kudari musikazivi kuyita vanogondeka ngo izvo zvayiva zvo vamweni, ndiyani unozopa kwomuri izvo zviri zvenyu?

¹³ Apana muranda ungakona kushandira majimambo maviri; ngokuti unozonyenya umwe ade umweni, nokuti unozobatirira kwo umwe, ashore umweni, amungakoni kushandira Mwari, no upfumi.”

Mupango no Umambo hwa Mwari

¹⁴ Vafarisi, avo vaida mare, vakazwa izvi zvese; navo vakamuseka.

¹⁵ Naye wakati kwavari: “Imwimwi muri avo vanojipembeja pamberi po vandhu, asi Mwari unoziva mu mwoyo mwenyu. Ngokuti icho chinoreremejwa pakati po vandhu, chiri chinonyangaja pamberi pa Mwari.

¹⁶ Mipango no vaprofeti zvaindovapo mbhera kuguma kwa Johani; kubvira ngo uwo mukuvo Umambo hwa Mwari hunochumaihwa, no mundhu wese unonghwinemwo ngo simba.

¹⁷ Asi kunopinda kureruka kuti denga no nyika zvipinde, kuno kuti chidondhwe chimwe cho mipango chikorere kuitika.”

Ndava yo kurambana

¹⁸ “Pikija ndiyani unoramba mukaji wake, arovore umweni, iye unoomba; no uwo unomurovora uwo wakarambwa kubva kumwamuna wake, unoomba.”

Razaro no mukhupuki

¹⁹ “Kwayivapo mundhu wakatikuti, wayiva mukhupuki, naye waisimira machira akapshukuruka, no akachena, echindoha zvakanaka mazuva ese.

²⁰ Kwayivapozve mupembhi waizwi ndi Razaro waidihwa pamusuvo po mukhupuki, akazara ngo zvironda,

²¹ naye wayida kuha matshekeneswa aiwa kubva pa thafura po mukhupuki; eya no imbhwa jaiviya jechimunakata zvironda zvake.

²² Kwakatika kuti mupembhi wakafa, akatwahwa ngo ngirosi kuenda kuditi ra Abrahama; no mukhupuki wakafavo wakavigwa.

²³ Ari mu Haidhesi wakamusa majiso ake, echitambujwa, akavona Abrahama ari kuretu, na Razaro ari paditi pake.

²⁴ Naye wakadanijira, akati: Baba Abrahama, ndiyitire nyasha, utume Razaro kuti abije ku magumo echikunwe chake mu kumwa, atondhoje rurimi rwangu; ngokuti ndiri mukuhwajihwa mu murazvu uwu.

²⁵ Asi Abrahama wakati: Mwana, cherecheja kuti iwewe ngo nguva yo kupona kwako wakaashira zviro zvako zvakanaka, na Razaro ngokudaro wakaashira zviro zvakashata. Asi zvino iye unoembezehwa, newe uri mukuhwajihwa.

²⁶ No panyezuru po izvi zvese riripo rindi guru rakadihwa pakati pedu neimwimwi, kuti avo vanoda kubva kuno kuviya kwomuri, avangakoni, zve akuna angaambuka kubva kwomuri kuviya kwetiri.

²⁷ Naye wakati: Ndizvo, ndinomupota baba kuti umutume ku nyumba ya baba wangu,

²⁸ ngokuti ndine vanukuna vashanu; kuti iye apupure kwavari, kuti ivozve vachazoviya ku ndau iyi yo kutambujwa.

²⁹ Asi Abrahama wakati: Vanaye Mosi no vaprofeti, ngavavapurukire.

³⁰ Asi iye wakati: Haiwa, baba Abrahama, asi kudari umwe echienda kwavari echibva kwo vakafa, vanozotenderuka.

³¹ Asi iye wakati kwaari: Kudari vasikapurukiri Mosi no vaprofeti, avatongozozwi pikija umwe amuka kubva kwo vakafa.”