Ruka 15 - NOVO TESTAMENTO EM NDAU

Kudakara ngo kuwanika kwo bvuta

¹ Zvino vashabisi no vashaishi vaikhwedera kwaari kumuzwa.

² No vafarisi no vatari vese vain'un'uta, vechiti: “Mundhu uwu unoashira vashaishi no kuha navo.”

³ Naye wakavereketa kwavari uwu muezaniso, echiti:

⁴ “Ndiyani mundhu kwomuri kudari uno zana ro mabvuta, no rimwe rawo rarashika, aasiyi here makumi mapfumbamwe no mapfumbamwe mushango, aende kwoopshaka iro rakarashika, mbhera ariwane?

⁵ Naapo ariwana unoripingata pamapfuji ake, ngo kudakara.

⁶ Naapo aguma kanyi, unodanija pamwepo shamwari jake no vavakihwana vake, echiti kwavari: Dakaranyi neni, ngokuti ndariwana bvuta rangu iro rayinga rakarashika.

⁷ Ndinoti kwomuri; ngokudaro kunozovapo kudakara mu gore ngo ndava yo umwe mushaishi watenderuka, kupinda kudakara ngovari makumi mapfumbamwe no vapfumbamwe vari vakarurama, vasikatami kutenderuka.”

Kudakara ngo kuwanika kwo mare

⁸ “Nokuti ndiyani mujimayi uno madrakama ari gumi, kuti akarasha rimwe rawo, avheneki ruvhenu here, apshaire nyumba no kunasa kupshakisisa mbhera ariwane?

⁹ Naapo ariwana unodanija pamwepo shamwari jake no vavakihwana vake, echiti: Dakaranyi neni, ngokuti ndariwana drakama iro rendakarasha.

¹⁰ Ngokudaro ndinoti kwomuri, kuripo kudakara pamberi po ngirosi ja Mwari ngo ndava yo umwe mushaishi wakatenderuka.”

Kuviya kwo mwana wakarashika

¹¹ Naye wakati: “Mundhu wakatikuti wayiva no vana vaviri.

¹² No mudoko wavo wakati kuna baba wake: Baba, chindikovanisirei ndhaka yechikovaniswa chendakaemesehwa. Naye wakakovanisira kwavari upfumi wake.

¹³ Ngosure kwo mazuva mashomani mwana mudoko wakaunganija zvese pamwepo, akaenda ku nyika iri ndhambo; naye wakaparaja apo upfumi hwake hwese ngo kupona kwo kushaisha.

¹⁴ Naapo ayinga apeja zvese, yakaguma njara huru mu nyikemwo, naye wakatanga kutama.

¹⁵ Naye wakaenda akajipira kuno mundhu wo nyika iyo; naye wakamutuma kuenda kumunda wake kwoohavisa nguruve.

¹⁶ Naye wayida kugutisa ndani yake ngo mateko aihiwa ngo nguruve, apana mundhu waimupa.

¹⁷ Naapo wanasa kuziva pachake, wakati: Kuwanda kwakaitawani kwo varanda va baba wangu vano chimanda chinokwana, no cho kusiya, neni ndiri kufa ngo njara.

¹⁸ Ndomuka ndiende kuna baba wangu, ndinozoti kwavari, baba ndashaisha pamberi po mu denga no pamberi penyu.

¹⁹ Neni andichasisiri kudanijwa kuti ndiri mwana wenyu: Chindiitenyi kuti ndidari ngo umwe wo varanda venyu.

²⁰ Naye wakamuka, akaviya kuna baba wake. Asi ayinga achiri ndhambo, baba wake vakamuvona, vakamuzwira unyasha, navo vakagogoma, vakamukumbatira ngo mumusipa, vakamuchungamija ngo muromo.

²¹ No mwana wakati kwaari: Baba ndakashaisha pamberi po mu denga no pamberi penyu, andichasisiri kudanijwa kuti ndiri mwana wenyu.

²² Asi baba wake vakati kuno varanda vavo: Viyisanyi ngo kukasira nguvo yakapindisisa kunaka, mumusimije; mudire mbhete muchikunwe chake, no magwada mutshoka jake,

²³ viyisanyi buru rakanuna, muriuraye, ngatihe, tidakare.

²⁴ Ngokuti uwu mwana wangu inga wafa, zvino unoponazve; wakamborashika, zvino wawanika. Navo vakatanga kudakara.

²⁵ Zvino mwana wake wo dangwe wayinga ari mu munda; kwakati echiviya echikhwedera ku nyumba wakazwa kurija no kutamba.

²⁶ Naye echidanija kwaari umwe wo varanda, wakamubvunjisa kuti izvi zvichinyi?

²⁷ Naye wakati kwaari: Munukuna wako waviya; na baba wako vamuuraira buru rakanuna, ngokuti vamuashira achangwaririka no kupona.

²⁸ Asi iye wakatseneka, akaramba kunghwinemwo. Na baba wake vakabuda kunja, vakamusembezera.

²⁹ Asi iye wakapingura, akati kuna baba wake: Vonanyi, makore aya mazhinji ndakakushandira, neni andizivi kutongogura chimwe cho mipango yako, asi auzivi kundipa chimbuji chimwe kuti ndidakare no shamwari jangu.

³⁰ Asi waviya uwu mwana wako uwo wakapeja upfumi hwako pamwepo no mambhombho, iwewe wamuuraira buru rakanuna.

³¹ Asi iye wakati kwaari: Mwana undori neni nguva jese, no izvo zvendinazvo zvindori zvako.

³² Asi kwaisisira kuti tidakare no kudakarisisa, ngokuti uwu munukuna wako wayiva akafa, naye unoponazve; wayiva akarashika, na zvino watowanika.”