Ruka 12 - NOVO TESTAMENTO EM NDAU

Kuziviswa ngo ndava yo kujiitisa

¹ Ngo uwo mukuvo apo vandhu vasikaverengeki vaungana pamwepo, kwokuti vaichikana, wakatanga kuvereketa kuno vajiji vake, kuti: “Ngwariranyi mumera wo vafarisi, uwo uri kujiitisa.

² Ngokuti akuna chiro chakadumaijwa chisikazovoneki; no chakafishwazve, chisikazoziviki.

³ Ndizvo icho chomwakavereketa muchidima chinozozwika mukujeka; no icho chomwakabvunjana munjeve mukati mwo makamera wo pakati, chinozoteketeswa panyezuru po chachungu cho nyumba.”

Ndiyani wotinodika kutya

⁴ “Neni ndinoti kwomuri shamwari jangu: Musatya avo vanouraya muviri, ngosure kwo uku vasina chovangayita.

⁵ Asi ndinomuzivisa ngo uwo wo munozotya: Mutyenyi uwo ngosure kwo kuuraya uno simba rokurasha mu Gehena; eya, ndinoti kwomuri mutyenyi uwo.

⁶ Zvishiri zvishanu azvitengeswi ngo makobiro maviri here? No chimwe chazvo achizokanganiki pamberi pa Mwari.

⁷ Asi no bvuji ro musoro mwenyu rakaverengwa rese. Musatya; imwimwi munopinda kudikana kuno zvishiri zvizhinji.”

Kutenda nokuti kuramba Kristu

⁸ “Neni ndinoti kwomuri, pikija ndiyani unozonditenda pamberi po vandhu, nayevo Mwana wo Mundhu unozomutenda pamberi po ngirosi ja Mwari.

⁹ Asi iye unozondiramba pamberi po vandhu, ndinozomuramba pamberi po ngirosi ja Mwari.

¹⁰ No mundhu wese unozovereketa izwi rakashata ngo Mwana wo Mundhu, rinozoregerehwa kwaari, asi kwaari uwo unotuka Mweya Wakachena akuzoregerehwi kwaari.

¹¹ Naapo voomuzisa mu nyumba jo kudira, no pamberi po vatongi, no pamberi po vano masimba, musazodembatemba ngo njira yo munozopingura ndiyo, nokuti munozopingura ngo mazwi akadini, nokuti munozovereketenyi.

¹² Ngokuti Mweya Wakachena unozomujijisa ngo iyo nguva icho chinosisira kuti muverekete.”

Ngozi yo kuva mupfumi

¹³ No umwe wakatikuti wo mbungano wakati, kwaari: “Mujijisi, bvunjai hama yangu kuti tikovane ndhaka.”

¹⁴ Asi iye wakati kwaari: “Mwanarumewe, ndiyani wandiemesa kuti ndiite mutongi nokuti mukovanisiri pakati penyu?”

¹⁵ Naye wakati kwavari: “Ngwaranyi mwechijitarausa kubva kwo kuemura kwese; ngokuti kurarama kwo mundhu akubvi kwo kuwanda kwo upfumi hwaanahwo.”

¹⁶ Wakavabvunja muezaniso, akati: “Munda wo guruja rakatikuti wakaivha zvakawanda.

¹⁷ Naro rakakarangarija mukati mwaro, rechiti: Ndinozoitenyi? Ngokuti andina ndau yo kudira mbewu jangu?

¹⁸ Naro rakati, ndinozodari: Ndopwanyira pasi nyumbu jangu, ndivake jinopinda kukura; naapo ndinozodira mbewu jangu jese no upfumi hwangu.

¹⁹ Neni ndinozoti kuno mweya wangu, uno upfumi wakawanda wakaunganijihwa kukwanisa makore mazhinji; garisikai, wechiha, wechimwa, wechidakara.

²⁰ Asi Mwari wakati kwaari. Iwe benji, ngo uhwu usiku mweya wako unozodanijwa kwouri. No izvo zvowajiunganijira zvinozoita zvani?

²¹ Zvakadaro naye uwo unojiunganijira upfumi, asi asiri mupfumi pamberi pa Mwari.”

Mwari unochengeta vana vake

²² Wakati kuno vajiji vake: “Ngo iyi ndava ndinoti kwomuri, musadembatemba ngo ndava yo kurarama kwenyu, kuti, munozohenyi? Nokuti ngo ndava yo muviri wenyu, kuti munozofukenyi?

²³ Ngokuti mweya unopinda kuha, no muviri unopinda zvokufuka.

²⁴ Rangarijanyi ngo magunguhwe, kuti aakushi aaunganiji; aana gutugutu nokuti nyumbu; na Mwari unoapakurira; imwimwi munopinda kwakaitawani kudikana kuno shiri?

²⁵ Ndiyani kwomuri ngo kudembatemba ungarebesa chiyimo chake ngo kubiti rimwe?

²⁶ Ndizvo kudari imwimwi musina simba ro kuyita icho chidodoko, munodembatemba ngenyi ngo zvimweni?

²⁷ Rangarijanyi ngo maruva, kumera kwaanoita; aashandi, zve, aaruki; asi inini ndinoti kwomuri, kuti, na Saromona mu uthende hwake hwese aazivi kumbosimira kudari ngo rimwe rawo.

²⁸ Asi kudari Mwari echisimija kudaro mwenje wo mushango, uwo uripo nyamasi, na mangwana unokandihwa muchoto, iye unozopinda kwakaitawani kumusimija, imwimwi muno kutenda kudodoko?

²⁹ Musapshaka zvokuha no zvokumwa, zve musan'un'uta.

³⁰ Ngokuti majinja ese onyika anozvipshaka izvi zvese; asi Baba wenyu vanoziva kuti munozvida izvi zviro.

³¹ Asi, pshakanyi umambo hwake, no izvi zvinozonyengejehwa kwomuri.

³² Musatya, imwimwi mushambi mudoko, ngokuti chiri chidisiso cha Baba wenyu kuti vamupe Umambo.

³³ Tengesanyi zvomunazvo, mukovere vanotama; mujiitire zvikwama zvisikasakari, upfumi mu gore husikaperi, apo mbavha poisikakhwederi, nokuti honye poisikaparaji.

³⁴ Ngokuti apo pohuri upfumi hwenyu, apo ndipo pano mwoyo yenyu.”

Vakanasirira kwo kuviya kwa Mambo

³⁵ “Zviunu zvenyu ngazvisungiswe, no zvivheneko zvenyu ngazvijeke;

³⁶ nemwi muite kudari ngo vandhu vanomurindira mambo wavo, apo oobva ku dhiri ro muchadho; kuti apo ooviya, no kuguguja, vamubewurire paripo.

³⁷ Vanomuchena avo varanda apo mambo ooviya unozovawana vechirinda! Ngozvirokwazvo ndinoti kwomuri, kuti unozojisimija, no kuyita kuti vagare pasi po kuha, naye unozoviya, no kuvashandira.

³⁸ Kudari echizoviya ngo murindo wo chipiri, nokuti wo chitatu, andovawana vakadaro, vanomuchena avo varanda.

³⁹ Asi zivanyi ichi, kuti kudari mune wo nyumba inga aziva nguva iyo yaizoviya ndiyo mbavha, waizorinda, usikatendi kuti nyumba yake iphwanyiwe.

⁴⁰ Ndizvo imwimwi itanyi vakanasirihwa; ngokuti Mwana wo Mundhu unoviya ngo nguva yo musikarangariji.”

Muranda unogondeka no usikagondeki

⁴¹ Pedru wakati: “Mambo unovereketa muezaniso uwu kwetiri here, nokuti kwavari vese?”

⁴² Mambo wakati: “Hino ndiyani muranda unogondeka no wakangwara, uwo mambo wake unozomuemesa panyezuru po nyumba yake, kuti avape kuha kwavo ngo mukuvo kwawo?

⁴³ Unomuchena uwo muranda apo mambo wake ooviya unozomuwana echiita kudaro.

⁴⁴ Ngozvirokwazvo ndinoti kwomuri, unozomuemesa panyezuru po zviro zvese zvaanazvo.

⁴⁵ Asi kudari uwo muranda echizoti mu mwoyo mwake: Mambo wangu unononoka kuviya, otanga kurova varanda rume no varanda kaji; ahe amwe, arejere;

⁴⁶ mambo wo muranda uwo unozoviya ngo zuva raasikamugariri, na ngo nguva yaasikazivi naye unozomugura kuyita zvigurwa zviviri, amuemesere chikovaniswa chake pamwepo no vasikatendi.

⁴⁷ No uwo muranda waiziva chiri kuda kwa mambo wake, asikazivi kunasirira, nokuti kuyita kudari ngo kuda kwake, unozosvaputwa ngo mushakwe muzhinji.

⁴⁸ Asi uwo asaiziva, oita izvo zvinosisira kuti arohwe, unozosvaputwa ngo mushakwe mushomani. No kwaari uwo wakapuwa zvakawanda unozobvunjiswa zvakawanda. No kwaari uwo wovakapa zvakawanda, vanozomubvunjisa zvakawanda.”

Jesu indava yo kuparajanisa

⁴⁹ Ndakaviya kukandira muriro panyezuru po nyika; neni ndinozodenyi kuti muriro watobwaka nazvinopano.

⁵⁰ Asi ndino rubhapatiso rwo kubhapatiswa ndirwo, ndinotambujwa kwakaitawani mbhera rozoitika!

⁵¹ Munopinimija here kuti ndakaviya kopa kunyarara mu nyika? Ndinomubvunja kuti, haiwa; asi kuparajana.

⁵² Ngokuti kubvira zvino vanozovapo vashanu mu nyumba imweyo vari vakaparajana, vatatu vakapesana no vaviri, vaviri vakapesana no vatatu.

⁵³ Baba vanozopesana no mwana, no mwana unozopesana na baba, na mayi vanozopesana no mwana wokaji, no mwana wokaji unozopesana na mayi, na mazvarira vanozopesana no nyamwana yake, no nyamwana inozopesana na mazvarira wake.

Zvivoniso zvo simba ra Jesu

⁵⁴ Zve wakati kuno mbungano: “Apo mwoovona gore rechibva ngo kumavirira, paripo munoti: Kunoda kuna mvura; nakwo kunoitika kudaro.

⁵⁵ Naapo mwoovona bepo rechivhuvhuta kubva ngo kakusi, munoti, kunozopisa; nakwo kunozoitika kudaro.

⁵⁶ Imwimwi vajiyitisi munokona kujija hope yo nyika, no yo mu denga, kunoitika ngenyi kuti amukoni kujijisa ngo nguva iyi?

⁵⁷ Amukoni ngenyi ngokwenyu kuparajanisa icho chakanaka?

⁵⁸ Ngokuti uchienda no mukorore wako pamberi po mutongi, uchiri mu njira ejai kuti usununguhwe ndiye; kuti pamweni uwo akupire ku mutongi, no mutongi akupire kuno phurisa, no phurisa rikunghwinise mu guniya.

⁵⁹ Ndinoti kwomuri kuti autongozobudimwo usati waripa sendi ro kupejisira.”