Ruka 11 - NOVO TESTAMENTO EM NDAU

Jesu unojijisa kukumbira

¹ Kwakaitika echikumbira ku ndau yakatikuti, apo apeja, umwe wo wajiji vake vakati kwaari: “Mambo, tijijise kukumbira, kudari ndi Johani naye wakajijisa vajiji vake.”

² Iye wakati kwavari: “Apo mwookumbira, mwoti: Baba Ngarireremejwe zina renyu. Umambo hwenyu ngahuviye. Kuda kwenyu ngakuitwe mu nyika Kudari ngo mu gore.

³ Tipenyi zuva ngo zuva kuha kwedu.

⁴ Tiregererenyi zvishaishi zvedu; ngokuti isisuvo tinoregerera vese avo vano ndava kwetiri. Musatinghwinisa mukuejwa asi mutinunure kuno uwo wakashata.”

⁵ Naye wakati kwavari: “Ndiyani kwomuri uno shamwari, kudari waenda kwoiri pakati po usiku, echiti kwaari, shamwari, ndishongejevo zvimanda zvitatu,

⁶ ngokuti shamwari yangu yaguma kwendiri yechibva muhwendo hwayo, neni andina chokuipa;

⁷ naye kudari apingura, ari mukati, echiti: Usandinesa; musuvo wakonywa zvino no vana vangu vaaneni pa mubhedhi; andingakoni kumuka kuti ndikupe.

⁸ Ndinoti kwomuri, kuti, pikija asikazomuki amupe ngokuti uri shamwari yake, asi ngo ndava yo kuvangirira kwake unozomuka, amupe zvese zvaanotama.

⁹ Ndizvo ndinoti kwomuri, kumbiranyi, kunozopuwa kwomuri; pshakanyi, nemwi munozowana; gugujiranyi nakwo kunozobewurihwa kwomuri.

¹⁰ Ngokuti mundhu wese unokumbira unoashira, no uwo unopshaka unozowana; no uwo unoguguja kunozobewurihwa kwaari.

¹¹ Ndiyani pakati penyu ari baba, apo mwana wake echikumbira chimanda, unozomupa buwe? Nokuti echikumbira hove paugaro pokumupa hove amupe nyoka here?

¹² Nokuti kudari echikumbira zanda, unozomupa chinyavada here?

¹³ Ndizvo kudari imwimwi mutori vakashata mwechiziva kupa vana venyu zvipo zvakanaka, Baba wenyu vari mu gore unozopinda kwakaitawani kupa Mweya Wakachena kwaavo vanokumbira kwaari?”

Jesu na Sathani

¹⁴ Iye waimbirimbija bzoka, rayiva mbeveve, kwakaitika bzoka rabuda, mbeveve yakavereketa. No mbungano yakashamiswa.

¹⁵ Asi vamweni vavo vakatikuti, vakati: “Iye unombirimbija mabzoka ndi Bheezebhuri muzvare wo mabzoka;

¹⁶ no vamweni, vechimueja vakapshaka kwaari chivoniso chinobva mu gore.”

¹⁷ Asi iye echiziva mirangariro yavo, wakati kwavari: “Umambo hwese hunojiparaja mukati mwahwo, hunoparara; no nyumba inojiparaja inowa pasi.

¹⁸ No kudari Sathani echijimukira ngokwake, umambo hwake hungaita maimirenyi? Ngokuti munoti kuti inini ndinombirimbija mabzoka ndi Bheezebhuri.

¹⁹ Kudari inini ndechimbirimbija mabzoka ndi Bheezebhuri, vana venyu vanoambirimbija ndiyani? Ndizvo ivo vanozoyita vatongi venyu.

²⁰ Asi kuti inini ndechimbirimbija mabzoka ngo simba ra Mwari, ngokudaro Umambo hwa Mwari hwaviya kwomuri.

²¹ Apo uwo uno simba uno zvokurwa ndizvo unongwarira nyumba yake, no mujiyo yake inozongwaririka.

²² Asi apo umweni unomupinda ngo simba unoviya panyezuru pake, amunyise, unozobvuka kwaari zvokurwa ndizvo zvake, izvo zvaaigonda ndizvo, unokovanisira zvakapokonyohwa zvake.

²³ Iye usipo neni unorwa neni; no uwo usikaunganiji neni unoparaja.”

Kuhwirira kwo mweya yakashata

²⁴ “Apo mweya unesvina wabuda ku mundhu, unofamba ndau jisina kumwa, wechipshaka kuzorora; usikakuwani, unoti ndohwirira ku nyumba yangu apo po ndakabva.

²⁵ Naapo woviyazve, unoivona yakapshaihwa, no kurongwa.

²⁶ Naapo unoenda, wotorazve mweya imweni minomwe, iyo inopinda kushata kuno uwo wo kutanga, nayo inonghwinemwo, no kugara umwo; no kupejisira kwo chiyimo chake mundhuwo chinopinda kushata kuno cho kutanga.”

Kudakara kwo gwinyiso

²⁷ Kwakaitika echivereketa izvi jimayi rakatikuti rayiva pakati po mbungano rakadanijira, rikati kwaari: “Inomuchena iyo ndani yakakubereka, no mazamu ao owakamwa.”

²⁸ Asi iye wakati: “Eya, kakurutu vanomuchena avo vanorizwa izwi ra Mwari, vechiringwarira.”

Jesu chivoniso cha Mwari

²⁹ Kwakati mbungano yechiungana pamwepo kwaari, iye wakatanga kuvereketa kuti: “Uwu mubarihwana uri mubarihwana wakashata; unopshaka chivoniso; asi akuna chivoniso chinozopuwa kwouri, chivoniso cha Jona chega.

³⁰ Ngokuti kudari ndi Jona wakayita chivoniso ku vaNinivha, ngokudarozve Mwana wo Mundhu unozoyita chivoniso kuno uwu mubarihwana.

³¹ Mambokaji wo nyika yo Kubani unozomuka pamwepo no vandhu vo mubarihwana uwu, ngo zuva ro kutongwa, naye unozovaparisa ndava; ngokuti iye wakabva ku magumo wo nyika, kuenda kwoozwa kungwara kwa Soromona; vonanyi, mukuru kuna Saromona uri pano.

³² Vandhu vo Ninivha vanozoima ngo zuva ro kutongwa pamwepo no uwu mubarihwana, navo vanozouparisa ndava; ngokuti ivo vakatenderuka ngo kuchumayira kwa Jona; vonanyi, Mukuru kuna Jona uri pano.”

Kujeka no chidima

³³ “Akuna mundhu apo unobwakija chibani, ochidira pandau yakachitirika, nokuti pasi po chitengu, asi pachigajikiro pacho, kuti avo vanonghwina vavone kujeka.

³⁴ Chivheneko cho muviri ijiso rako, apo jiso rako rakanaka, muviri wako wese nawo unozara ngo kujeka; asi kuti rakashata, muviri wako wese unozara ngo chidima.

³⁵ Ndizvo ngwarayi kuti kujeka ukwo kuri mukati mwako akuri chidima akadi.

³⁶ Ndizvo kudari muviri wako wese wakazara ngo kujeka, pasina divi rine chidima, muviri wese unozozarisa ngo kujeka, kudari ngo apo chivheneko chinonasa kujekisa, chinokujekisa.”

Jesu unopsheruja vafarisi no vazivi vo mupango

³⁷ Echivereketa, mufarisi wakatikuti wakamukoka kuti ahe naye; naye wakanghwina, akacheama po kuhira.

³⁸ Kwakati, apo mufarisi avona, wakashamiswa kuti iye aazivi kushamba asati aha.

³⁹ Na Mambo wakati kwaari: “Zvino imwimwi, vafarisi munosuka kunja kwo tsani no kwo ndiro; asi mukati mwenyu mwakazara ngo umbavha no kushata.

⁴⁰ Imwimwi mapenji, iye wakayita zvo kunja, aazivi kuyitazve zvo mukati here?

⁴¹ Asi ipanyi zviri mukati kuyita zvipo, zvese zvinozochena kwomuri.

⁴² Asi ikhombo kwomuri vafarisi! Ngokuti munopa chogumi cho mindi no rue no murivo yese asi munorerusa kutonga kwakwo, no rudo rwa Mwari! Asi kwaisisira kuti muite izvi, musikaregeri zvimweni.

⁴³ Ikhombo kwomuri vafarisi! Ngokuti munoda zvigaro zvo pamberi mu nyumba jo kudira, no kuchungamijwa pandau jo musika.

⁴⁴ Ikhombo kwomuri! Ngokuti mwakadari ngo makuva asikavoneki, no vandhu vanofamba panyezuru pawo vasikazivi.”

⁴⁵ No gweta rakatikuti rakapingura, rechiti kwaari: “Mujijisi, wechivereketa kudari unotitukavo nesu.”

⁴⁶ Naye wakati: “Ikhombo kwomuri nemwi magweta. Ngokuti munothikisa vandhu mitwaro inorema kuitwara, nemwi mwambhwine musikaipshasi ngo chikunwe cho zvikunwe zvenyu.

⁴⁷ Ikhombo kwomuri! Ngokuti munovaka makuva ovaprofeti, no majibaba enyu akavauraya.

⁴⁸ Ndizvo muri zvapupu no vanotenderana no mishando yo majibaba enyu: Ngokuti ivo vakavauraya, nemwi munovaka makuva avo.

⁴⁹ Ndizvozve, kungwara kwa Mwari kwakati, ndinozotuma kwavari vaprofeti no vapostori; vamweni vavo vanozovauraya, vechivatambuja no kuvateverera;

⁵⁰ kuti ngazi yo vaprofeti vese yakaparajwa kubvira kwo kusikwa kwo nyika ibvunjisiswe kuno uwu mubarihwana;

⁵¹ kubvira kungazi ya Abhera, mbhera kuguma kungazi ya Zakariya uwo wakaurawa pakati po altari no themperi; eya ndinoti kwomuri, inozobvunjisiswa kuno uwu mubarihwana.

⁵² Ikhombo kwomuri magweta! Ngokuti imwimwi mwakabvisa mugogo wo kuziva amuzivi kunghwina imwimwi mwambhwine, naavo vainghwina mwakavarambisa.”

⁵³ Kwakati echibva apo, vatari no vafarisi vakatanga kumuvangijira kakurutu, no kumuchenekera kuti averekete zviro zvakawanda;

⁵⁴ vechimuteya, kuti vamubate ngo chiro chinobva ku muromo wake.