Ruka 10 - NOVO TESTAMENTO EM NDAU

Jesu wakatuma vajiji makumi manomwe na vaviri

¹ Ngosure kwo izvi Mambo wakaendesa vamweni vari makumi manomwe na vaviri, naye wakavatuma vaviri-vaviri pamberi pake ku madhoropa ese no ku ndau jese, apo paaida kuguma ambhwine.

² Naye wakati kwavari: “Mushando wo kukotora wakakura, asi vashandi vashomani; ndizvo mweshikumbira kuna mambo wo kukotora kuti atume vashandi mukukotora kwake.

³ Endanyi, vonanyi ndinomutuma muri vakadari ngo zvimabvuta mukati mwo mathika.

⁴ Musatora chikhwama, nokuti nyede, nokuti magwada: Musachungamija mundhu mu njira.

⁵ Nyumba iriyese yo munozonghwina, kutanga mwechiti; kunyarara ngakuve kune iyi nyumba.

⁶ Kuti aripo mwana wo kunyarara, kunyarara kwenyu kunozova panyezuru pake: Asi kuti asipo, kunyarara kwenyu kunozohwirira kwomuri.

⁷ Garanyi munyumbemwo mwechiha no kumwa izvo zvovanomupa; ngokuti mushandi unosisira mupochereso wake. Musati umwu mwanghwina umwu mwanghwina.

⁸ Dhoropa ririrese romunozonghwina, navo vakamuashira, ihanyi izvo zvovanodira pamberi penyu.

⁹ Rapanyi vanohwara varimwo, munozoti kwavari, kuti: Umambo hwa Mwari hwakwedera kwomuri.

¹⁰ Asi mu dhoropa umwo mwomunozonghwina, navo vasikamuashiri, budanyi muende mu makwanja aro, mwechiti.

¹¹ Eya, no bukuta ro dhoropa renyu, iro rinonamirira kutshoka jenyu, tinoripumbhujira kwomuri; asi zivanyi ichi, kuti Umambo hwa Mwari hwakwedera.

¹² Ndinoti kwomuri, kunozopinda kurerukira Sodhoma ngo iro zuva kuno iro dhoropa.”

Madhoropa akapanduka

¹³ “Ikhombo kwouri, Korazini! Ikhombo kwouri Bhetisaidha! Ngokuti kudari mishando yo simba iyo yakayitwa kwomuri, yayinga yakayitwa mu Tire no Sidhoni, vaizonga vakatenderuka karetu, vechigara mu marota vakasimira masako.

¹⁴ Kani hai, kunozopinda kurerukira Tire no Sidhoni ngo zuva ro kutongwa kuno imwimwi.

¹⁵ Iwewe Kaperanaume, unozokuriswa here mu gore? Iwewe unozobzuswa pasi muhayidhesi.

¹⁶ Iye unopurukira kwomuri, unopurukira inini; naye unomuramba unondiramba inini. No uwo unondiramba inini unoramba uwo wakandituma.”

Kupetuka kwo vajiji

¹⁷ No vari makumi manomwe na vaviri vakapetuka ngo kudakara, vechiti: “Mambo, no mabzoka aitipfavira ngo zina rako.”

¹⁸ Wakati kwavari: “Ndakamuvona Sathani echiwa kubva mu gore, wakadari ngo mbheni.

¹⁹ Vonanyi ndakamupa simba ro kutsika nyoka, no zvinyavada, no panyezuru po simba rese ro mukorore: Akuna no chiro na chimwe chinozomushaishira.

²⁰ Zvakanyadaro, musadakara ngo ichi, kuti mweya inomupfavira; asi dakaranyi ngokuti mazina enyu akatahwa mu gore.”

Mwari unojipangijira kuno vakarurama

²¹ Ngo nguva iyo iye wakadakara mu Mweya Wakachena, akati: “Ndinokubonga Baba, Mambo wo mu gore no nyika, kuti wakafisha izvi kuno vakangwara, no vanoziva, ukazvipangijira kuno vana vadoko; eya Baba ngokuti mwakazvivona izvi zvakanaka mukuvona kwenyu.

²² Zvese zvakapuwa kwendiri ndi Baba wangu. Akuna naumwe unoziva Mwana kuti uri yani, kwega Baba; nokuti Baba kuti uri yani, kwega Mwana, no uwozve waanoda Mwana kuti amupangijire kwaari Baba.”

²³ Naye wakakunukukira kuno vajiji vake, ngo kufishika wakati: “Anomuchena majiso ao anovona zvomunovona imwimwi.

²⁴ Ngokuti ndinoti kwomuri, kuti vaprofeti vazhinji no majimambo vayiva no chidisiso chokuvona zvomunovona, navo avazivi kuzvivona; zve, no kuzwa zvomunozwa, navo avazivi kuzvizwa.”

Musamariya wakanaka

²⁵ Vonanyi gweta rakatikuti, rakamuka, richimueja, rikati: “Mujijisi, chinyi chondinozoita kuti ndigare ndhaka yo kupona kusikaperi?”

²⁶ Iye wakati kwaari: “Chinyi chakatahwa mu mipango? Unojijenyi?”

²⁷ Naro rechipingura, rakati: “Unozomuda Mambo Mwari wako ngo mwoyo wako wese, na ngo mweya wako wese, na ngo simba rako rese, na ngo kurangarira kwako kwese; no muvakihwana wako kudari ngo kujida kwako.”

²⁸ Naye wakati kwaari: “Wanasa kupingura, ita kudaro newe unozorarama.”

²⁹ Asi iro rechida kujipembeja, rakati kuna Jesu: “Ndiyani uri muvakihwana wangu?”

³⁰ Jesu wakapingura, akati: “Mundhu wakatikuti waibzuka echibva Jerusarema kuenda Jeriko; naye wakasongana no majongoni ao akamukhumura zvokufuka zvake, akamurova, akaenda, omusiya oda kufa.

³¹ Kwakaitika kuti mupristi wakatikuti waibzuka ngo njira iyo, naamuvona wakapinda ngo divi rimweni.

³² Ngokudarozve muRevhi, apo aguma naamuvona, wakapinda, ngo divi rimweni.

³³ Asi muSamariya wakatikuti, echifamba hwendo, wakaguma apo paayiva, naapo amuvona, wakamuzwira urombo.

³⁴ Wakaviya kwaari, akapomba mavonje ake, echidurura mafuta no vhini; naye wakamugajika pa chipfuyo chake, wakamuzisa ku nyumba yo vaeni, wakamungwarira.

³⁵ No kwaeja wakabudisa madhenariyo maviri, wakaapa kuno muno wo nyumba, akati, mungwarirei; no icho chounozonyengejera kuripa, inini apo ndoviyazve ndinozokuripira.

³⁶ Ngowapi kwaavo vatatu, kurangarija kwako, wakayita muvakihwana kwaari uwo wakawira pakati po majongoni?”

³⁷ Naro rakati: “Uwo wakamuitira nyasha.” Na Jesu wakati kwaari: “Enda, uite kudaro newe.”

Ku nyumba ya Marita na Mariya

³⁸ Hino vechifamba muhwendo hwavo, vakaguma ku guta rakatikuti; no mujimayi unozwi Marita wakamuashira mu muzi mwavo.

³⁹ Naye wayiva no munukuna waizwi ndi Mariya, iye wakagara patshoka ja Mambo, echizwa mazwi ake.

⁴⁰ Asi Marita wakaneseka ngo mishando yakawanda; naye wakaviya kwaari, akati: “Mambo, amuna ndava nazvo here kuti munukuna wangu wandisiya kushanda, ndiri ndega? Ndizvo mubvunjenyi kuti andidetsere.”

⁴¹ Asi Mambo wakapingura, akati kwaari: “Marita, Marita, unodembatemba, no kuneseka ngo zviro zvakawanda.

⁴² Asi chiro chimwe chinosisira: Ngokuti Mariya wasanangura rupande uhwo hwakanaka, rusikazobviswi kwaari.”