Ruka 1 - NOVO TESTAMENTO EM NDAU

Manghwiniro

¹ Ngokuti vazhinji vakaeja kurongeja tshamba ngo ndava yo izvo zvakaitika pakati pedu,

² kudari ngo zvotakapuwa ngaavo, kubvira mukutanga vayiva zvapupu zvo majiso, no vashandi vo izwi,

³ kwakandinakira ininivo, apo ndayinga ndakaronda ngo kwakaperera zviro zvese kubvira mukutanga, kuti nditare kwouri ngo kutevererana, iwewe Tiyofiro mundhu kwaye;

⁴ kuti uzive gwinyiso ro mazwi ao owakajijiswa.

Ngirosi inozivisa kubahwa kwa Johani Mubhapatisi

⁵ Kwayivapo ngo mazuva a Herodhi mambo wo Judhiya, mupristi wakatikuti, waizwi ndi Zakariya, wo chikwata cha Abhiya, no mukaji wake wayiva mwana wo vhumbo ra Aroni, no zina rake raizwi Erizabhetha.

⁶ Navo vese vayiva vakarurama pamberi pa Mwari, vechingwarira mipango no zviemeso zvese zva Jehovha, vasina ndava.

⁷ Navo inga vasina mwana, ngokuti Erizabhetha wayiva chumba, navo vayinga vaa harahwa.

⁸ Kwakaitika apo echiita mushando wo upristi pamberi pa Mwari ngo kuteverera kwo chikwata chake,

⁹ kudari ngo chirovejeso cho upristi, chikwata chake chayiva cho kunghwina mu themperi ra Jehovha, no kupisa mutombo uno gwema rakanaka.

¹⁰ No mbungano yese yo vandhu yaikumbira ngo kunja ngo nguva yo kupisa mutombo uno gwema rakanaka.

¹¹ Kwakavoneka kwaari ngirosi ya Jehovha, yakayima ngo kumuho wo altari ro kupisira mutombo uno gwema rakanaka.

¹² Zakariya wakakakaseka ngo kuivona no kutya kwakamugumira.

¹³ Asi ngirosi yakati kwaari: “Usatya, Zakariya: Ngokuti kukumbira kwako kwakazwika, no mukaji, wako Erizabhetha unozobereka mwana, newe unozodura zina rake, kuti; Johani.

¹⁴ Newe unozodakara no kudakajihwa, no vazhinji vanozodakara ngo kubahwa kwake.

¹⁵ Ngokuti iye unozoyita mukuru mukuvona kwa Jehovha, naye aazomwi vhini nokuti zvinorejeresa, naye unozozajwa ngo Mweya Wakachena, eya kubvira mu ndani ya mayi wake.

¹⁶ Naye unozotenderujira vazhinji vo vana va Israeri kuna Jehovha Mwari wavo.

¹⁷ Naye unozofamba pamberi po hope yake ngo mweya no simba ra Erija, kutenderujira mwoyo yo majibaba kune vana, no vasikapurukiri kuti vafambe mukungwara kwo vakarurama; kunasirira vandhu kuti vayite vakanasirihwa Jehovha.”

¹⁸ Na Zakariya wakati kuna ngirosi: Ndinozoziva ngenyi ichi? Ngokuti ndaaharahwa, no mukaji wangu waaharahwa yo makore mazhinji.

¹⁹ No ngirosi yakamupingura yechiti kwaari: “Ndiri Gabhurieri, uwo unoyima pamberi pa Mwari, neni ndatumwa kuti ndiverekete kwouri, no kukuzisira aya masoko akanaka.

²⁰ Vonayi, unozoyita mbeveve usikakoni kuvereketa mbhera rigume zuva iro ro zvinozoitika izvi, ngokuti auzivi kugonda mazwi angu, ao anozoitika ngo nguva yao.”

²¹ No vandhu vaimugarira Zakariya vakashama ngo kunonoka kwake mu themperi.

²² Naapo abuda inga asikakoni kuvereketa kwavari; navo vakaziva kuti iye wayinga avona chivoniso ari mu themperi. Naye wakavereketa kwavari ngo nyara, wogara ari mbeveve.

²³ Kwakaitika mazuva okushandira kwake apera, wakaenda kanyi kwake.

²⁴ Ngosure kwo mazuva ao mukaji wake Erizabhetha wakayita mimba; naye wakajifisha mweji mushanu, echiti:

²⁵ “Zvakadaro Jehovha wakayita ichi kwendiri ngo mazuva ao aakandiringira ndiwo, kuti abvise nyowa jangu pakati po vandhu.”

Ngirosi inozivisa kubahwa kwa Jesu

²⁶ Zvino ngo mweji wo chitandhatu ngirosi Gabhurieri yakatumwa kubva kuna Mwari kuenda ku dhoropa ro Garire, raizwi Nazaretha,

²⁷ mbhandwe yayinga yakaemesehwa mundhu zina rake ndi Josefa, wo vhumbo ra Dhavhidha; no zina ro mbhandwe iyo raizwi ndi Mariya.

²⁸ Nayo yakanghwina kwaari, ikati: “Dakarai, iwewe wawana nyasha, Jehovha unewe.”

²⁹ Asi iye wakakakaseka kukuru ngo kuvereketa kwayo, wakarangarija kuti kuchungamija uku kunorevenyi.

³⁰ No ngirosi yakati kwaari: “Usatya Mariya, ngokuti iwewe wawana nyasha kuna Mwari.

³¹ Vonayi, unozova no mimba, newe unozobereka mwana, unozodura zina rake kuti Jesu.

³² Naye unozoyita mukuru, unozozwi Mwana wo Uwo Uri panyezuru po zvese; na Jehovha Mwari unozomupa dendemaro ra baba wake Dhavhidha.

³³ Naye unozotonga nyumba ya Jakobe kunoti mbhera narini no umambo hwake ahutongozovi no magumo.”

³⁴ Mariya wakati kuno ngirosi: “Ichi chingaita maitirenyi ndisikazivi kusongana no mwanarume?”

³⁵ Ngirosi yakapingura, ikati kwaari: “Mweya Wakachena unozoviya panyezuru pako, no simba ro Uwo Uri panyezuru po zvese rinozofukijira panyezuru pako, ndizvo uwo unozoberekwa unozozwi Wakachena, Mwana wa Mwari.

³⁶ Vonayi, Erizabhetha hama yako, ina mimba yo mwana apo waaharahwa, no uwu waamweji wo chitandhatu kwaari, iye waizwi kuti uri chumba.

³⁷ Ngokuti kuna Mwari apana chinokonereka.”

³⁸ Na Mariya wakati: “Vonayi, murandakaji wa Jehovha; ngakuitike kwendiri kudari ngo izwi rako.” No ngirosi yakabva kwaari.

Mariya unofambira Erizabhetha

³⁹ Na Mariya wakamuka ngaao mazuva, wakaenda ngokukasira ku nyika yo zvimatundhu, ku guta rakatikuti ro Judhiya.

⁴⁰ Naye wakanghwina mu nyumba ya Zakariya, wakachungamija Erizabhetha.

⁴¹ Kwakaitika apo Erizabhetha azwa kuchungamija kwa Mariya, mwana wakanyanduka mu ndani mwake; na Erizabhetha wakazajwa ngo Mweya Wakachena.

⁴² Naye wakadanijira ngo izwi guru, echiti: “Unomuchena iwewe pakati po vanakaji; unomuchenazve uwo unozoberekwa mu ndani mwako.

⁴³ Chaitika ngenyi ichi kwendiri, kuti mayi wa Mambo wangu aviye kwendiri?

⁴⁴ Ngokuti, vonayi, apo izwi ro kuchungamija kwako razwika munjeve jangu, mwana wakanyanduka mu ndani mwangu ngo kudakara.

⁴⁵ Unomuchena uwo unotenda, ngokuti kunozovapo kuitika kwo izvo zvakavereketwa kwaari zvechibva kuna Mambo.”

Nduyo ya Mariya

⁴⁶ Mariya wakati: “Mweya wangu unokurisa Jehovha;

⁴⁷ no Mweya wangu unodakara kukuru kuna Mwari Muponesi wangu.

⁴⁸ Ngokuti, iye wakaringira hudodoko hwo murandakaji wake. Ngokuti, ringira, kubvira zvino yese mibarihwana, inozondiverenga kuti ndino muchena.

⁴⁹ Ngokuti uwo uno simba wakayita zvikuru kwendiri, no zina rake riri rakachena.

⁵⁰ No kukungurira kwake kuri panyezuru pavo vanomutya, kubvira ku mubarihwana kuenda ku mubarihwana.

⁵¹ Iye wakapangijira simba rake ngo mukono wake; wakaparaja avo vanojikuja ngo kurangarija kwo mwoyo yavo.

⁵² Wakabzusa pasi vano simba kubva pa madendemaro avo, akakurisa avo vari pasi,

⁵³ wakagutisa avo vano njara ngo zvakanaka; wakaendesa maguruja asina chiro.

⁵⁴ Iye wakadetsera muranda wake Israeri, kuti acherecheje kukungurira kwake,

⁵⁵ kudari ngo zvaakavereketa kuna majibaba edu, kuna Abrahama no kujinja rake nokuti mbhera narini.”

⁵⁶ Na Mariya wakagara naye kunonga mweji mutatu, naye wakahwirira kanyi kwake.

Kubahwa kwa Johani Mubhapatisi

⁵⁷ Zvino mukuvo wa Erizabhetha wakaguma wokuti abare, naye wakabara mwana wo rume.

⁵⁸ No vavakihwana vake no hama jake vakazwa kuti Jehovha wayinga wakurisa nyasha jake kwaari; navo vakadakara pamwepo naye.

⁵⁹ Kwakaitika ngo zuva ro chisere kuti vakaviya kuzocheka mwana; navo vaida kumudura zina kuti ndi Zakariya, kudari ngo zina ra baba wake.

⁶⁰ Na mayi wake vakapingura vakati: “Haiwa; asi unozoduhwa kuti Johani.”

⁶¹ Navo vakati kwaari: “Apana umwe wo hama jenyu wakamboduhwa ngo zina iri.”

⁶² Navo vakabvunjisa kuna baba wake ngo zvivoniso vazwe kuti ungada kuti aduhwe kudini.

⁶³ Naye wakakumbira tshamba yo kutarirepo, wakatara kuti, zina rake ndi Johani. Navo vese vakashamiswa.

⁶⁴ Paripo muromo wake wakabewuhwa, no rurimi rwake hwakasunungurwa, naye wakavereketa echikuja Mwari.

⁶⁵ No kutya kwakagumira paavo vese vaigara phedo pavo: No masoko oizvi akatokoteswa mu nyika yese yo zvimatundhu zvo Judhiya.

⁶⁶ Navo vese vakazvizwa vakazvingwarira mu mwoyo yavo, vechiti: “Uwu unozoyita mwana wakadini?” Ngokuti nyara ya Jehovha yayiva naye.

Nduyo ya Zakariya

⁶⁷ Na baba wake Zakariya wakazariswa ngo Mweya Wakachena, naye wakaprofeta, echiti:

⁶⁸ “Unomuchena Jehovha Mwari wa Israeri, ngokuti iye wakafambira no kuripira vandhu vake.

⁶⁹ Naye wakatimusira runyanga rwo ruponeso kwetiri, mu nyumba yo muranda wake Dhavhidha.

⁷⁰ (Kudari ngo zvaakavereketa ngo muromo wo vaprofeti, vakacheneswa vake vokare).

⁷¹ Kuponeswa kubva ku vakorore vedu, no kubva ku nyara jo avo vese vanotinyenya.

⁷² Kupangijira nyasha kuno majibaba edu, no kucherecheja chitenderano chake chakachena;

⁷³ mbhiko iyo yaakapika kuna baba wedu Abrahama,

⁷⁴ yokuti isisu, techinunurihwa kubva mu nyara yo vakorore vedu, timushandire tisina chokutya,

⁷⁵ mukucheneswa no mukururama pamberi pake, ese mazuva okurarama kwedu.

⁷⁶ Eya na iwewe mwana unozozwi uri muprofeti wo Uwo Uri panyezuru po zvese; ngokuti iwewe unozofamba pamberi po hope ya Jehovha kunasirira njira jake;

⁷⁷ kupa ku vandhu vake kuziva kwo ruponeso, ngo kuregerehwa kwo zvishaishi zvavo.

⁷⁸ Ngo ndava yo upfavi hwo nyasha ja Mwari wedu, ngo ndava yajo kueja kwo zuva kunobva mu gore kunozotifambira.

⁷⁹ Kujeka panyezuru paavo vanogara muchidima no mubvute ro kufa; kutungamirira tshoka jedu mu njira yo kunyarara.”

⁸⁰ No mwana wakakura, wakagwinyiswa mu mweya, wayiva mu bani mbhera ro guma zuva ro kupangijihwa kwake kuna va Israeri.