Mateu 9 - NOVO TESTAMENTO EM NDAU

Kurapwa kwo mundhu waioma muviri

¹ Echinghwina mu ngarava, wakaambuka mwombera, wakaguma ku guta rake.

² Vonanyi, vakazisa kwaari mundhu waihwara ngo ndhenda yo kuoma muviri, wakavata pa mubhedhi. Jesu avona kutenda kwavo, wakati kuna uwo wayiva no ndhenda yo kuoma muviri: “Mwana, shinga; zvishaishi zvako zvaregerehwa.”

³ Vonayi, vamweni vakatikuti vo vatari vakati pakati pavo: “Mundhu uwu unotuka.”

⁴ Na Jesu echiziva murangariro yavo, wakati: Munorangarijirenyi zvakashata mu mwoyo yenyu?

⁵ Ngokuti ngochapi chinopinda kureruka, kunanga kuti: Zvishaishi zvako zvaregerehwa, nokuti kunanga kuti; “Miruka ufambe?”

⁶ Asi kuti muzive kuti Mwana wo Mundhu uno simba mu nyika ro kuregerera zvishaishi, naapo wakati kuna uwo wayiva no ndhenda yo kuoma muviri, “Miruka, tora mubhedhi wako uende ku nyumba yako.”

⁷ Naye wakamiruka, akaenda ku nyumba yake.

⁸ Asi mbungano yazvivona, yakatya, yakakuja Mwari, uwo wayinga wakapa simba rakadari ku vandhu.

Jesu unodanija Mateu

⁹ Na Jesu echipinda mberi, wakavona mundhu unozwi Mateu, akagara pandau yo kushabisa shangu; naye wakati kwaari: “Nditevere.” Naye wakamiruka, akamutevera.

¹⁰ Kwakaitika achatseama pano kuha mu nyumba ya Mateu, vashabisi no vashaishi vazhinji vakaviya vakagara pasi na Jesu no vajiji vake.

¹¹ Vafarisi vechivona, vakati kuno vajiji vake: “Ngenyi Mujijisi wenyu unoha no vashabisi no vashaishi?”

¹² Asi iye echizwa wakati: “Avo vakavanga avadi murapi asi avo vanohwara.”

¹³ Asi endanyi mwoojija kuti zvinorevenyi izvi, “Ndinoda nyasha, haiwa kupuwa mubairo; ngokuti andizivi kuviya koodanija vakarurama, asi vashaishi.”

Ngo ndava yo kuera kuha

¹⁴ Naapo kwakaguma kwaari vajiji va Johani, vechiti: “Isisu no vafarisi tinogara techiera kuha ngenyi, asi vajiji vako avaeri kuha?”

¹⁵ Na Jesu wakati kwavari: Vo nyumba ya nyamurovohwa vangachumba here apo mukwambo achinavo? Asi mazuva anozoviya apo mukwambo unozobviswa kwavari, naapo vanozoera kuha.

¹⁶ Apana mundhu unosonera chiremo chipsha pa nguvo yakasakara, ngokuti icho chinodihwa kuisonera, chinoparurisa kubva kweiri, no bovo rinozopinda kukura.

¹⁷ Zve avadiri vhini ibza mu mbudu jakasakara; ngokuti mbudu jinozoputiswa, no vhini rinozodururika, no mbudu jinopera. Asi vanodira vhini ibza mu mbudu ipsha, nazvo zvese zvinozongwaririka.

Kumuswa kwo musikana no kuponeswa kwo mundhu waihwara

¹⁸ Achavereketa izvi kwavari, vonanyi, wakaviya mutongi wakatikuti, wakamudira, akati kwaari: “Mwana wangu wokaji watofa, asi chiviya udire nyara yako panyezuru pake, naye unozorarama.”

¹⁹ Na Jesu wakamiruka, akaenda naye, no vajiji vake.

²⁰ Vonanyi, mwanakaji wayiva no ndhenda yo kubuda ngazi makore ari gumi na maviri, wakaviya ngosure kwake akapshasa mupendero wo nguvo yake.

²¹ Ngokuti iye wakati mukati mwake: “Kudari ndingapshasa kwega nguvo yake, ndinozoponeswa.”

²² Asi Jesu echikunukuka, wamuvona, wakati: “Mwana, shinga, kutenda kwako kwakuponesa.” No mwanakaji uwo wakaponeswa kubvira nguva iyo.

²³ Naapo Jesu aguma mu nyumba yo mutongi, wakavona variji vo munyere, no mbungano yechiita hohoho.

²⁴ Wakati: “Taraukanyi; ngokuti musikana uwu aazivi kufa akadi, asi wakavata.” Navo vakamuseka kwokumupsheruja.

²⁵ Naapo abudisa mbungano kunja, wakanghwina mukati, wakamubata ngo nyara; no musikana wakamiruka.

²⁶ No mbiri yacho yakateketeswa mu nyikemwo mwese.

Jesu unorapa mapofu maviri

²⁷ Na Jesu achapinda mberi kubva apo, mapofu maviri akamutevera, echidanijira, echiti: “Iwewe Mwana wa Dhavhidha, tiyitire nyasha.”

²⁸ Naanghwina mu nyumba, mapofu akaviya kwaari, na Jesu wakati kwaari: “Munotenda here kuti ndino simba rokuita ichi?” Akati: “Eya, Mambo.”

²⁹ Naapo wakapshasa majiso ao, akati: “Ngakuitike kwomuri kudari ngo kutenda kwenyu.”

³⁰ No majiso ao akapembenujwa; na Jesu wakaapanga, echiti: “Ngwaranyi kuti kusazozivikanwa ngo vandhu.”

³¹ Asi vabvapo, vakateketesa mbiri yake mu nyikemwo mwese.

Kurapwa kwo mbeveve

³² Vachabuda kubvapo, vonanyi, kwakaziswa kwaari mbeveve yayiva no bzoka.

³³ Naapo bzoka rakambirimbijwa kubva kweiri, mbeveve yakavereketa. No mbungano yakashamiswa, yechiti: “Akuzivi kutongovoneka zvakadari mu Israeri.

³⁴ Asi vafarisi vakati: Iye unombirimbija mabzoka ndi mambo wo mabzoka.”

Vashandi vo kukotora vashomani

³⁵ Na Jesu wakafambafamba mu madhoropa ese, no mu maguta ese, echijijisa mu nyumba javo jo kudira, echichumaira vhangeri ro Umambo, echitambisa mbewu jese jo ndhenda no kuhwara kwese.

³⁶ Asi avona mbungano, wakavazwira urombo ngokuti vayidezwaira no kupepesheka kudari ngo mabvuta asina muhavisi.

³⁷ Naapo wakati ku vajiji vake: “Ngo gwinyiso kukotora kwakawanda asi vashandi vari vashomani.

³⁸ Ndizvo kumbiranyi kuna Mambo wo kukotora kuti atume vashandi mukukotora kwake.”