Mateu 8 - NOVO TESTAMENTO EM NDAU

Kurapwa kwo mundhu wayiva no mapere

¹ Kwakati apo obzuka kubva pa dundhu, mbungano huru yakamutevera,

² vonayi mundhu, wayiva no mapere wakaviya kwaari wakamudira, echiti: “Mambo, kudari wechida ungandishambija.”

³ Naye wakatambanuja nyara yake, akamupshasa, akati: “Ndinoda, chishambijwa.” Mukuvo wondhowo, mapere ake akashambijwa.

⁴ Na Jesu wakati kwaari: “Ngwarayi kuti usazobvunja mundhu; asi enda, ujipangijire ku mupristi, no kupa chipo icho chaakavereketa Mosi, kuti chiite chapupu kwavari.”

Kurapwa kwo muranda wo nduna yo zana

⁵ Kwakati anghwina mu Kaperanaume, kwakaviya kwaari nduna yo zana yechimukumbira,

⁶ yechiti: “Mambo, muranda wangu wakavata mu nyumba echihwara ngo kuoma muviri, echihwajihwa kukuru.”

⁷ Wakati kwoiri: “Ndinozoviya, ndimurape.”

⁸ Asi nduna yo zana yakapingura ikati: “Mambo, andisisiri kuti iwewe unghwine pasi podenga rangu; asi nangayi ngo izwi rega, no muranda wangu unozorapika.

⁹ Ngokuti ininivo ndiri mundhu unotongwa, ndina masocha ari pasi pangu; neni ndinoti ku uwu, enda, naye unoenda; no kuna umweni, viya, naye unoviya; no ku muranda wangu, itayi ichi; naye unochiita.”

¹⁰ Naapo Jesu azwa ichi, wakashama, wakati kwavari vayimutevera: “Zvirokwazvo andizivi kumbovona kugonda kukuru kwakadari, haiwa pikija no ku vaIsraeri.

¹¹ Neni ndinoti kwomuri kuti vazhinji vanozoviya kubva kumabvazuva, no kumavirira, vanozogara pasi na Abrahama, na Isaka, na Jakobe mu Umambo hwo mu gore.

¹² Asi vana vo Umambo vanozokhandihwa mu chidima chiri kunja; kunozovapo kuchema, no kukwetsana kwo mazino.”

¹³ Na Jesu wakati ku nduna yo zana: “Enda, ngakuitwe kwouri kudari ngo kutenda kwako.” No muranda wakaponeswa ngo iyo nguva.

Jesu unorapa vatenda vakawanda

¹⁴ Naapo Jesu anghwina mu nyumba ya Pedru, wakavona vambiya vake vakavata vechihwara ngo kujiya muviri.

¹⁵ Naye wakavapshasa ngo nyara yake, no muviri wakatondhora; navo vakamiruka vakamushandira.

¹⁶ Kwoyita madekoni, vakaviisa kwaari vazhinji vayiva no mabzoka, naye wakambirimbija mweya iyo ngo izwi rake, wakarapa vese vaihwara;

¹⁷ kuti kuzarisike ukwo kwakavereketwa ndi Isaya muprofeti, echiti: “Iye ambhwine wakatora ndhenda jedu, wakatwara kuhwara kwedu.”

Mukoka wokutevera Jesu

¹⁸ Zvino Jesu echivona mbungano huru yechimutendeneja, wakavapanga kuti vaambuke mwombera.

¹⁹ Kwakaviya kwaari mutari, wakati kwaari: “Mujijisi, ndinozokutevera apo pounoenda.”

²⁰ Na Jesu wakati kwaari: “Muhwe jina maguru, no shiri jo mu gore jino zvisaki; asi Mwana wo Mundhu aana no po kutsamira musoro wake.”

²¹ No umwe wo vajiji wakati kwaari: “Mambo kutanga nditendere kuti ndiende ndichire baba wangu.”

²² Asi Jesu wakati kwaari: “Nditevere, uregere vakafa kuti vachire vakafa vavo.”

Jesu unonyaraja bepo

²³ Naanghwina mu ngarava, vajiji vake vakamutevera,

²⁴ vonayi, kwakabuda bepo guru mu jombe, ngokudaro ngarava yakadumaijwa ngo mavimbi; asi iye wayinga wakavata.

²⁵ Vakaviya kwaari, vakamumusa, vechiti: “Mambo, tiponese; tofa.”

²⁶ Naye wakati kwavari: “Munombotya ngenyi, imwimwi munokutenda kudodoko?” Naapo wakamiruka, akanyaraja bepo no jombe; kwakavepo kutura kukurutu.

²⁷ No vandhu vakashama, vechiti: “Mundhu uwu uri wakadini, kuti bepo no jombe zvinomupurukira?”

Kurapwa kwo vanarume vaviri vayiva no mweya yakashata

²⁸ Naapo waguma mwombera mu nyika yo vaGadhareni, kwakasongana naye vandhu vaviri vayiva no mabzoka vechibva mu makuva, vano ushungu hunotyisa, ngokudaro kwayinga kusina no mundhu waikhirira ngo iyo njira.

²⁹ Navo vakadanijira vakati: “Tinenyi newe, iwewe, Mwana wa Mwari? Waviya pano kutitambuja usati waguma mukuvo here?”

³⁰ Zvino kwayivapo mushambi wo nguruve zhinji jechihava pandharauko kubva kwavari.

³¹ No mabzoka akamukumbira, akati: “Kudari wechitibudisa, titumeyi tinghwine mu mushambi wo nguruve.”

³² Naye wakati kwaari: “Endayi!” Nao akabuda, akanghwina mu nguruve. Vonayi mushambi wese wakabzuka ngo pa gomokomo kuenda mu jombe, jakafa, mu kumwa.

³³ Avo vaihavisa vakatiza, vakaenda mu dhoropa vakaverenga zvese, izvi zvayinga zvakaitwa kuna avo vayiva no mabzoka.

³⁴ Vonayi, vo dhoropa rese vakabuda kwooshongana na Jesu. Kwakati vamuvona vakamuengerera kuti abve mu migano yavo.