Mateu 7 - NOVO TESTAMENTO EM NDAU

Musatonga vamweni

¹ “Musatonga, kuti musazotongwavo.

² Ngokuti ngo kutonga kwomunotonga ndikwo, munozotongwavo; ngo uwo mupimo wo munopima ndiwo, unozoezanisihwavo kwomuri.

³ Unoringisirenyi chitsepejo chiri mujiso ro hama yako, asi auvonesesi danda riri mujiso mwako?

⁴ Nokuti ungaita mavereketerenyi kuna hama yako, kuti: Regerayi, ndibvise chitsepejo chiri mujiso rako, usikavoni danda riri mujiso rako?

⁵ Iwewe mujiitisi, tanga kubvisa danda riri mujiso rako; naapo unozonasa kukwanisa kubvisa chitsepejo chiri mujiso ro hama yako.

⁶ Musapekeja izvo zvakachena kuno imbhwa, zve musakhandira usanga wenyu pamberi po nguruve, kuti jisazoutsikatsika pasi po tshoka jajo, jikunukuke jimurume.”

Mwari unozwa kukumbira

⁷ “Kumbiranyi, munozopuwa, pshakanyi, munozowana; gugujiranyi munozobewurihwa.

⁸ Ngokuti uwo unokumbira, unoashira; naye unopshaka unozowana; no kwaari unoguguja kunozobewurihwa.

⁹ Ngokuti ndiyani mundhu, kwomuri, unoti mwana wake echimukumbira chimanda, amupe buwe?

¹⁰ Nokuti echikumbira hove, amupe nyoka?

¹¹ Ndizvo kudari imwimwi mutori vakashata munoziva kupa zvipo zvakanaka kuvana venyu, kunozopinda kwakaitawani Baba wenyu vari mu gore kuvapa zvakanaka avo vanokumbira kwaari?

¹² Ndizvo izvo zvese zvomunoda kuti vandhu vayite kwomuri itanyivo kudaro kwavari; ngokuti ichi chiri kuzarisika kwomupango no zvo vaprofeti.”

Njira yo upenyu usikaperi

¹³ “Nghwinanyi ngo pa musuvo wakamanikana; ngokuti musuvo wakapambhama, no njira yakapfara inoenda mu kurashwa, navo vari vazhinji vanopinda ndiyo.

¹⁴ Ngokuti musuvo wakamanikana, no njira yakadodoka inoenda mu kururama, navo vari vashomani vanoiwana.”

Vaprofeti vokunyepa

¹⁵ Ngwariranyi vaprofeti vokunyepa, avo vanoviya kwomuri vakasimira vanonga mabvuta, asi ngomukati vari mathika anokara.

¹⁶ Mwovaziva ngo michero yavo. Vandhu vangakhava here michero yo muvhini pa munanga, nokuti makuyu pa rukato?

¹⁷ Ngokudaro miti yese yakanaka inobereka michero yakanaka; asi miti wakashata unobereka michero yakashata.

¹⁸ Muti wese wakanaka aungakoni kubereka michero yakashata, no muti wakashata aungabereki michero yakanaka.

¹⁹ Muti wese usikabereki michero yakanaka unotemehwa pasi ukandihwe pa muriro.

²⁰ Ndizvo munozovaziva ngo michero yavo.

Ndiyani unonghwina mu Umambo hwo mu gore

²¹ “Andivopi vese vanoti kwendiri; Mambo, Mambo vanozonghwina mu Umambo hwo mu gore, asi uwo unoyita kuda kwa Baba wangu vari mu gore.

²² Vazhinji vanozoti kwendiri ngoiro zuva, Mambo, Mambo, Atizivi kuprofeta here ngo zina rako, na ngo zina rako atizivi kumbirimbija mabzoka, na ngo zina rako atizivi kuyita mishando yakawanda inosimba here?

²³ Naapo ndinozovabvunja, kuti, Andizivi no kumuziva; ibvanyi kwendiri imwimwi munoshanda zvakashata.”

Kuteveja mazwi a Mwari

²⁴ “Ndizvo pikija ndiyani unozwa mazwi angu, no kuayita, unoezaniswa no mundhu wakangwara, uwo wakavaka nyumba yake panyezuru po buwe.

²⁵ No mvura yakana no ndambi yakaviya, no bepo rakavhunguza, rakarova panyezuru poiyo nyumba, nayo aizivi kuwa, ngokuti yayinga yakavakwa pa buwe.

²⁶ Pikija ndiyani uwo unozwa aya mazwi angu, usikaayiti, unoezaniswa no mundhu uri benji, wakavaka nyumba yake pa musanga.

²⁷ No mvura yakana, no ndambi yakaviya, no bepo rakavhunguza, rakarova panyezuru poiyo nyumba; nayo yakawa, no kuwa kwaiyo kwakava kukurutu.”

²⁸ Kwakaitika apo Jesu apeja mazwi aya, mbungano yakashamiswa ngo kujijisa kwake.

²⁹ Ngokuti wakavajijisa kudari ngo uno simba, kusikazivi kudari ngo vatari vavo.