Mateu 6 - NOVO TESTAMENTO EM NDAU

Kupa zvipo kuvanopembha

¹ “Vonanyi kuti musayita kururama kwenyu pamberi po vandhu, kuti vamuvone; kuti mwechizodaro, amuzowani musharo kuna Baba wenyu vari mu gore.

² Ndizvo apo woopa zvipo zvako, usarija mbhayapaya pamberi pako, kudari ngo zvovanoita vajiitisi mu nyumba jo kudira, no mu makwanja, kuti vayirikijwe ngo vandhu. Zvirokwazvo, ndinoti kwomuri, vatoashira musharo wavo.

³ Asi apo iwewe woopa zvipo zvako, usatendera kuti nyara yako yo kuboshwe izive chinoitwa ngo nyara yako yo kumuho,

⁴ kuti zvipo zvako zvipuwe ngo kufishika, na Baba wako vanovona mukufishika vanozokupavo.”

Jesu unojijisa kukumbira

⁵ Naapo mwookumbira, musazodari ngo vajiitisi; ngokuti vanoda kukumbira vakayima mu nyumba jo kudira, no pambhararano po makwanja kuti vavoneke, ngo vandhu. Zvirokwazvo, zvirokwazvo ndinoti kwomuri, vatoashira musharo wavo.

⁶ Asi iwewe, apo wookumbira, nghwina mu nyumba yako yo pakati, naapo wakonya musuvo, kumbirayi kuna Baba wako vari mukufishika, na Baba wako vanovona mukufishika vanozokupavo.

⁷ Asi mukukumbira kwenyu musazohwirijira mazwi asina shwiro, kudari ngo zvovanoita vo majinja; ngokuti avo vanorangarija kuti vanozozwika ngo kuwanda kwo mazwi avo.

⁸ Ndizvo musazodari ndivo; ngokuti Baba wenyu vanoziva izvo zvomunotama musati mwakumbira kwavari.

⁹ Ndizvo kumbiranyi ngo njira iyi: “Baba wedu vari mu gore, ngarireremejwe zina renyu.”

¹⁰ Umambo hwenyu ngahuviye. Kuda kwenyu ngakuitwe mu nyika kudari ngo mugore.

¹¹ Tipenyi ngeiri zuva kuha kwedu kunotamika nyamasi.

¹² Tiregererenyi ndava jedu, kudari itisu takaregerera avo vane ndava kwetiri.

¹³ Musatinghwinisa mukuejwa, asi mutinunure kuno uwo wakashata.

¹⁴ Ngokuti kudari imwimwi mwechiregerera vandhu zvishaishi zvavo, Baba wenyu vari mu gore vanozomuregereravo imwimwi.

¹⁵ Asi kudari musikaregereri vandhu zvishaishi zvavo, na Baba wenyu avazomuregererivo imwimwi zvishaishi zvenyu.

Ndava yo kuera kuha

¹⁶ Zve mwoera kuha, musayita chisununu muhope jenyu kudari ngo vajiitisi; ngokuti vanoyita chisununu hope javo kuti vavoneke ngo vandhu kuti vanoera kuha. Zvirokwazvo, ndinoti kwomuri, vakatoashira musharo wavo.

¹⁷ Asi iwewe, apo woera kuha, zoja musoro wako, ushambe muhope mwako;

¹⁸ kuti usazovoneka ngo vandhu kuti uri kuera kuha, asi ndi Baba wako vari pakafishika; na Baba wako avo vanovona mukufishika, vanozokupavo.

Upfumi wo gwinyiso

¹⁹ Musajiunganijira upfumi mu nyika, apo honye nokuti chipfundo zvinoshaishira, naapo mbavha jinopwanya jibe.

²⁰ Asi jiunganijirenyi upfumi mu gore, apo honye nokuti furuju zvisikashaishiri, naapo mbavha jisikapwanyi jibe.

²¹ Ngokuti apo pano upfumi hwenyu, ndipozve panozova no mwoyo yenyu.

Kujeka kwo muviri

²² Kujeka kwo muviri imajiso, ndizvo kudari majiso ako ari majiso kwawo, muviri wako wese unozogara mukujeka.

²³ Asi kuti majiso ako akashata, muviri wako wese unozozara ngo chidima. Ndizvo kudari kujeka kuri mukati mwako kuri chidima, kukuranyi kwechidima icho.

Mwari no upfumi

²⁴ Akuna mundhu ungakona kushandira majimambo maviri; ngokuti unozonyenya umwe, ade umweni, ngokuti unozoshoora umwe abatirire kwo umweni. Amungashandiri Mwari no upfumi.

Mwari unongwarira vana vake

²⁵ Ngo ndava yoichi ndinoti kwomuri, musadembatemba ngo maponero enyu kuti munozohenyi, nokuti munozomwenyi; nokuti ngo ndava yo muviri wenyu kuti munozosimirenyi. Kurarama akupindi kuha here? No muviri aupindi kusimira here?

²⁶ Ringiranyi shiri jo mu gore, ajikushi, ajikotori, nokuti kuunganija muzvitumba; kani Baba wenyu vari mu gore vanojipa zvokuha. Imwimwi amupindi kukura kuna ijo here?

²⁷ Ndiyani kwomuri ngo kudembatemba ungakwanisa kuengejera urebu hwake mbhimo imwe?

²⁸ Nemwi munodembatemba ngenyi ngo zvokufuka? Rangariranyi ngo maruva omushango kumera kwawo; aashandi, aarukizve.

²⁹ Asi inini ndinoti kwomuri, na Soromona mu uthende hwake hwese aazivi kusimijwa kudari ngo rimwe rawo.

³⁰ Ndizvo, kudari Mwari echisimija kudaro maushwa omushango, awo aripo nyamasi, mangwana anokandihwa muchoto, aazopindi here kukuru kumusimija, imwimwi muno kutenda kudodoko.

³¹ Ndizvo musadembatemba, mwechiti, tinozohenyi? Nokuti, tinozomwenyi? Nokuti, tinozosimirenyi?

³² Ngokuti vo majinja vanopshaka izvi zvese, ngokuti Baba wenyu vari mu gore vanoziva kuti munozvitama izvi zvese.

³³ Asi pshakanyi kutanga Umambo hwake no kururama kwake, no izvi zvese zvinozoengejehwa kwomuri.

³⁴ Ndizvo, musazodembera zuva ramangwana, ngokuti, zuva ramangwana unozojidembera. Kutambujika kwezuva kunokwana zuvero.