Mateu 4 - NOVO TESTAMENTO EM NDAU

Kuejwa kwa Jesu

¹ Naapo Jesu wakakweviwa ndi Mweya kuenda mu bani kuti aejwe ndi dhiyabhorosi.

² Naapo ayinga waera kuha mazuva makumi marongomuna, no usiku makumi marongomuna, ngosure kwo uku wakazwa njara.

³ Mueji wakaviya kwaari, akati: Kuti iwewe uri Mwana wa Mwari bvunjayi aya mapuwe kuti ayite chimanda.

⁴ Asi iye wakamupingura, akati: “Kwakatahwa kuti mundhu aazorarami ngo chimanda chega, asi ngo mazwi ese anobuda mu muromo wa Mwari.”

⁵ Naapo dhiyabhorosi wakamutora kuenda naye ku dhoropa rakachena, wakamudira panyezuru po chachungu cho themperi,

⁶ akati kwaari: “Kuti iwewe uri Mwana wa Mwari, jikandire pasi, ngokuti kwakatahwa, kuti, unozotumira ngirosi jake ngo ndava yako; najo jinozokubata ngo nyara jajo kuti nokuti ngouri mukuvo usazokhugunwa tshoka yako pa buwe.”

⁷ Jesu wakati kwaari: “Kwakatahwazve, kuti Usazoeja Mambo Mwari wako.”

⁸ Zve dhiyabhorosi wakamutora kuenda pa dundhu rakanyanya kureba, wakamupangijira umambo hwese hwo nyika, no uthende hwawo.

⁹ Naye wakati kwaari: “Izvi zvese ndinozokupa, kudari wechizogwadama pasi no kundidira.”

¹⁰ Naapo Jesu wakati kwaari: Ibva Sathani! Ngokuti kwakatahwa kuti: Unozodira Mambo Mwari wako, no kumushandira iye ega.

¹¹ Naapo dhiyabhorosi wakamusiya, vonayi, ngirosi jakaviya kwaari jikamushandira.

Jesu unotanga mushando wake mu Garire

¹² Naapo azwa kuti Johani wakafungihwa mu guniya wakahwirirazve Garire.

¹³ Naabva Nazaretha wakaenda koogara mu Kaperanaume, riri pa jombe, mu ndharaunda jo Zabhurona no Nafitari.

¹⁴ Kuti rizarisike izwi iro rakavereketwa ndi Isaya muprofeti, echiti:

¹⁵ “Nyika yo Zabhurona, no nyika yo Nafitari pa njira inoenda ku jombe; mwombera kwo Jordhani Garire ro vo majinja.

¹⁶ Vandhu avo vayinga vakagara mu chidima vakavona kujeka kukuru; naavo vayinga vakagara mu nyika no mubvute ro kufa, kujeka kwakavabudira.”

¹⁷ Kubvira ngo uwo mukuvo Jesu wakatanga kuchumayira, echiti: “Tenderukanyi imwimwi; ngokuti Umambo hwo mu gore huri phedo.”

Vajiji vokutanga va Jesu

¹⁸ Echifamba phedo po jombe ro Garire, wakavona hama mbiri, ndi Simoni unozwi Pedru, na Andreu munukuna wake vechikandira juya ravo mu jombe; ngokuti vayiva vatandi.

¹⁹ Wakati kwavari: “Viyanyi sure kwangu, inini ndinozomuita vatandi vo vandhu.”

²⁰ Paripo vakasiya majuya avo vakamutevera.

²¹ Echibva apo wakavona hama jimweni mbiri, ndi Jakobe mwana wa Zebhedhi no munukuna wake Johani, vari mu ngarava pamwepo na baba wavo Zebhedhi, vechinasirira majuya avo; naye wakavadanija.

²² Paripo vakasiya ngarava, na baba wavo, vakamutevera.

Jesu unofamba mu Garire

²³ Na Jesu wakafambafamba mu Garire mwese, echijijisa mu nyumba javo jo kudira, no kuchumayira vhangeri ro Umambo no kurapa mbewu jese jokuhwara, no mbewu jese jo ndhenda mukati mwo vandhu.

²⁴ No mbirikira yake yakateketeswa mu nyika yese yo Siriya. Navo vakazisa kwaari vese vaihwara, avo vayinga no ndhenda jakaparajana, no vayinga no zvinovatsereketesa, naavo vayinga vano mabzoka, naavo vano mbhengera muzi, naavo vano nungura; naye wakavarapa.

²⁵ Yakamutevera mbungano huru yo vandhu yechibva Garire, no Dhekaporisi, no Jerusarema, no Judhiya no mwombera kwo Jordhani.