Mateu 27 - NOVO TESTAMENTO EM NDAU

Jesu pamberi pa Piratu

¹ Kwaeja vapristi vakuru vese, no vakuru vo vandhu vakayita bangano ndi Jesu kuti vamuuraye.

² Naapo vayinga vamusunga, vakamukweva kuenda naye kuna Piratu mutongi.

Kufa kwa Judhasi Isikariyoti

³ Naapo Judhasi, uwo wakamupira, naavona kuti Jesu wakaitihwa ndava, wakatenderuka, akaviisazve zviguhwa zvo sirivha zviri makumi matatu ku vapristi vakuru, no vakuru,

⁴ echiti: “Ndakashaisha ngo kupira ngazi isina ndava.” Asi vakati: “Tinenyi nazvo itisu? Izvo ngo zvako.”

⁵ Naye wakakandira zviguhwa zvo sirivha mu themperi, wakaenda, wakajikaka.

⁶ No vapristi vakuru vakatora zviguhwa zvo sirivha, vakati: “Akutendehwi kuti tizvidire mubhokisi ro mare yo zvipo, kwechivoneka kuti zviri mutengo wo ngazi.”

⁷ Vakayita bangano, vakatenga ndizvo munda wo muumbi, kuti vavigemwo vo nyikanja.

⁸ Ndizvo uwo munda unodanijwa mbhera na nyamasi kuti: Munda wo Ngazi.

⁹ Naapo kwakazarisika izwi iro rakavereketwa ndi Jeremiya muprofeti, echiti: “Navo vakatora zviguhwa zvo sirivha zviri makumi matatu, mutengo wo uwo wakatendehwana, ngo vamweni vo vana va Israeri

¹⁰ navo vakazvipa kutenga munda wo muumbi, kudari ngo zvaakandiemesera Mambo.”

Jesu pamberi pa Piratu

¹¹ Na Jesu wakayima pamberi po mutongi; no mutongi wakamubvunjisa, echiti: “Iwewe uri Mambo wo vaJudha here?” Jesu wakati: “Watozvinanga wega.”

¹² Naapo wakaitihwa ndava ngo vapristi vakuru no vakuru aazivi kupingura chiro.

¹³ Zvino Piratu wakati kwaari: “Auzvizwi here izvo zvakawanda zvo vanokupupurira kukuitira ndava?”

¹⁴ Naye aazivi kupingura no izwi, ngokudaro mutongi wakashamiswa kakurutu.

Jesu unotongehwa kufa

¹⁵ Zvino kumushongano wo kuha uwo mutongi waindosunungurira kuno vandhu musungwa umwe, uwo wo vayida.

¹⁶ Ngo uwo mukuvo vayiva no musungwa wayiva no mbirikira, waizwi ndi Bharabhasi.

¹⁷ Ndizvo apo vakaungana pamwepo, Piratu wakati kwavari: “Munoda kuti ndimusunungurire yani kwomuri, Bharabhasi, nokuti Jesu unozwi Kristu?”

¹⁸ Ngokuti iye waiziva kuti yayiva ndava yo ndurumwa yo vakamupira ndiyo.

¹⁹ Apo agara pasi pa dendemaro ro kutonga, mukaji wake wakatumira kwaari echiti: “Usava no chiro chounoyita kuno uwo mundhu wakarurama; ngokuti ndatambujwa ngo zvakawanda nyamasi mu kurota ngo ndava yake.”

²⁰ Asi vapristi vakuru no vakuru vakaonga mbungano kuti ikumbire Bharabhasi, no kuuraya Jesu.

²¹ Mutongi, wakapingura, akati kwaari: “Ndiyani pakati paavo vaviri wo munoda kuti ndimusunungurire?” Navo vakati: “Bharabhasi.”

²² Piratu wakati kwavari: “Ndizvo ndinozoitenyi ndi Jesu, uwo unozwi Kristu?” Vese vakati: “Ngaakohomehwe.”

²³ Naye wakati: “Ngenyi? Kushata kwakadini kwaakayita?” Asi avo vakapinda kudanijira, kuti: “Ngaakohomehwe.”

²⁴ Naapo Piratu wavona kuti asayikona kubesera chiro, asi kwega kuti hohoho yayimuswa, wakatora kumwa, akashamba nyara jake pamberi po mbungano, echiti: “Inini andina ndava yo ngazi yo uwu mundhu: Jivonerenyi icho imwimwi.”

²⁵ No vandhu vese vakapingura, vakati: “Ngazi yake ngaive panyezuru pedu, no panyezuru po vana vedu.”

²⁶ Naapo wakavasunungurira Bharabhasi; naapo wayinga arova Jesu wakamupira kuti akohomehwe.

Masocha unoyita jee Jesu

²⁷ Naapo masocha omutongi akatora Jesu kuenda naye mubanje ro kutongera, akaunganija kwaari chikwata chese cho masocha.

²⁸ Nao akamuvhurira, akamufukija nguvo yakapshuka.

²⁹ Naapo varuka junguja ro minzwa, vakaridira mu musoro mwake, no rutsanga mu nyara yake yo kumuho; navo vakagwadama pasi pamberi pake, vakamuyitira jee, vechiti: “Tinomuchungamija, Mambo wo vaJudha!”

³⁰ Navo vakumupfirira mata, vakatora njanga vakamurova musoro.

³¹ Naapo vayinga vamuyitira jee, vakamuvhurira nguvo, vakamusimija zvokufuka zvake, navo vakamukweva koomukohomera.

Kukohomehwa kwa Jesu

³² Naapo vabuda kunja, vakavona mundhu wo Kureni, zina rake raizwi Simoni; uwo wo vakavangijira kuti atware muchinjiko wake.

³³ Naapo vaguma ku ndau inozwi Gorogota, ukwo kunoti: Ndau yo Dendhenya,

³⁴ vakamupa vhini rakavhenganiswa no chanduru kuti arimwe; kwakati wariravira wakaramba kurimwa.

³⁵ Naapo vayinga vamukohomera, vakakovanisana zvokufuka zvake, voringijira hakata.

³⁶ Navo vakagara pasi, vechimurinda apo.

³⁷ Navo vakadira panyezuru po musoro wake mazwi ondava yake, yakatahwa kuti: “UWU NDI JESU, MAMBO WO VAJUDHA.”

³⁸ Naapo kwakakohomehwa naye majongoni maviri, rimwe ngo kumuho, no rimweni ngo kuboshwe.

³⁹ Navo vaipinda ngepo vaimutuka vechidungwaira musoro yavo,

⁴⁰ vechiti: “Iwewe unopwanya themperi, no kurivaka ngo mazuva matatu, jiponese; kudari uri Mwana wa Mwari bzukayi pa muchinjikopo.”

⁴¹ Ngokudarovo vapristi vakuru vakamuyitira jee, pamwepo no vatari no vakuru, no vafarisi vechiti:

⁴² “Iye wakaponesa vamweni, asi aangajiponesi. Kuti uri Mambo wa Israeri, ngaabzuke pasi zvino pa muchinjiko, nesu tinozomutenda.

⁴³ Iye wakagonda kuna Mwari, ngaachimununure zvino, kuti echimuda; ngokuti wakati: Inini ndiri Mwana wa Mwari.”

⁴⁴ No majongoni ao akakohomehwa naye akamutukavo zvimwezvo.

Kufa kwa Jesu

⁴⁵ Zvino kubvira nguva yochitandhatu chaivapo chidima mu nyika yese mbhera kuguma nguva yo chipfumbamwe.

⁴⁶ Kunonga nguva yo chipfumbamwe Jesu wakadanijira ngo izwi guru, echiti: “Eloi, Eloi, Lama Sabakatani?” Ukwo kunoti, “Mwari wangu, Mwari wangu, wandisiya ngenyi?”

⁴⁷ Vamweni avo vaiyima apo vazwa, vakati: “Uwu unodanija Erija.”

⁴⁸ Paripo umwe wavo wakagogoma wakatora shiponji, wochibija muvhini rinoshasha, wakaridira ngo pa rutsanga, wakamuashija kuti amwe.

⁴⁹ Asi vamweni vakati: “Muregerei, ngativone kuti Erija unoviya here kumuponesa.”

⁵⁰ Naapo Jesu wadanijirazve ngo izwi guru, wakafa.

⁵¹ Vonanyi, jira ro themperi rakaparuka kuyita maviri, kubvira ngo nyezuru mbhera kuguma pasi; no nyika yakazungunyika, no mapuwe akapwanyika.

⁵² No makuva akabewuhwa, no miviri mizhinji yo vakafa vakarurama vakamuswa.

⁵³ Navo vakabuda ku makuva ngosure kwo kumuka kwake, vakanghwina mu dhoropa rakachena, vakavoneka ngo vazhinji.

⁵⁴ Zvino apo nduna yo zana, naavo vayiva nayo, vachirinda Jesu, vavona kuzungunyika kwo nyika, no izvo zvakaitika, vakatya kukuru, vechiti: “Ngo gwinyiso, uwu wayiva Mwana wa Mwari.”

⁵⁵ Kwayivapo majimayi mazhinji vairingira vari ndhambo, avo vayinga vakamutevera Jesu kubva Garire, vechimushandira.

⁵⁶ Pakati pavo payivapo Mariya Magadhareni, na Mariya mayi wa Jakobe na Josefa, na mayi wo vana va Zebhedhi.

Kuvigwa kwa Jesu

⁵⁷ Kwooyita madekoni kwakaviya mukhupuki wo Arimatiya zina rake raizwi Josefa, uwo naye wayiva mujiji wa Jesu:

⁵⁸ Uwo wakaenda kuna Piratu, wakapota kupuwa muviri wa Jesu. Naapo Piratu wakapanga kuti aupuwe.

⁵⁹ Naapo Josefa wayinga atora muviri uwo, wakaupukutira ngo jira rakachena.

⁶⁰ Naye wakaudira muiba ibza rayiva rake, iro rayinga raakacha pa buwe: Naye wakamburumbujira buwe guru pa musuvo wo guva, wakaenda.

⁶¹ Kwayivapo Mariya Magadhareni na Mariya umweni vechigara ngo pamberi po guva.

Varindi vo guva

⁶² No chimangwanani ngosure kwo zuva ro kunasirira Phasika, vapristi vakuru, no vafarisi vakaungana kuna Piratu,

⁶³ vechiti: “Changamire, tinocherecheja kuti uwo muchengeji wakati, achapona, ngosure kwo mazuva matatu, ndinozomukazve.

⁶⁴ Ndizvo panga kuti guva rigwinyisiswe mbhera kuguma zuva rechitatu, kuti vachazoviya vajiji vake usiku, vamube, no kuzobvunja kuno vandhu kuti: Wakamuka kwo vakafa; ngokudaro kuchengeja kwo kugumisira kungapinda kushata kuno ukwo kwo kutanga.”

⁶⁵ Piratu wakati kwavari: “Imwimwi munavo varindi; endanyi mwechirigwinyisisa kudari ngo zvomunokona.”

⁶⁶ Ndizvo vakaenda, vakarigwinyisisa guva, vechinamira chinamiro pa buwe, varindi varipo navo.