Mateu 26 - NOVO TESTAMENTO EM NDAU

Bangano ro kuuraya Jesu

¹ Kwakaitika apo Jesu wayinga apeja ese mazwi aya, wakati ku vajiji vake:

² “Munoziva kuti ngosure kwo mazuva maviri Phasika rinozovapo, no Mwana wo Mundhu unozopihwa kuti akohomehwe.”

³ Naapo vakaungana vapristi vakuru no vakuru vo vandhu, ku ngome yo mupristi mukuru, uwo wayidanijwa kuti Kaifasi.

⁴ Navo vakayita bangano rokuti vamubate Jesu ngo urimbwi, vamuuraye.

⁵ Asi vakati: “Haiwa ngo zuva ro mushongano wo kuha, kuti isazovapo hohoho pakati po vandhu.”

Jesu unozojwa mafuta mu Bhetani

⁶ Naapo Jesu uri mu Bhetani pa nyumba ya Simoni uwo wayiva no mapere,

⁷ kwakaviya kwaari jimayi rayiva no chimujiyo cho aribhasitera cho mafuta anonuhira ano mutengo mukuru, naro rakaadurura mu musoro mwake, wakagara pakuha.

⁸ Asi apo vajiji vake vavona, vakarurumwiswa, vechiti: “Kurashanyi uku?

⁹ Ngokuti aya aizotengeswa ngo mutengo mukuru upuwe ku varombo.”

¹⁰ Asi Jesu echiziva, wakati kwavari: “Munoritambujirenyi jimayi? Ngokuti naro rashanda mushando wakanaka kwendiri.

¹¹ Ngokuti munavo varombo nguva jese, asi inini amuneni akadi nguva jese.

¹² Ngokuti radurura mafuta anonuhira aya panyezuru po muviri wangu, rayita kunasirira muviri wangu kuvigwa.

¹³ Ngo zvirokwazvo ndinoti kwomuri, pikija apo po rinozochumaihwa vhangeri mu nyika jese, ichivo cherayita jimayi iri chinozovereketwa ndicho kuyita chicherechejiso kweriri.”

Judhasi unopira Jesu

¹⁴ Naapo umwe wo gumi na vaviri unozwi Judhasi Isikariyoti wakaenda ku vapristi vakuru.

¹⁵ Naye wakati kwavari: “Ichinyi chomunozondipa kuti ndikazomupa kwomuri?” Navo vakamuejanisira zviguhwa zvo sirivha zviri makumi matatu.

¹⁶ Kubvira ngo uwo mukuvo iye wakapshaka nguva yokuti amupire.

Jesu unoha Phasika no vajiji vake

¹⁷ Zvino ngo zuva ro kutanga ro kuha zvimanda zvisina mumera, vajiji vakaviya kuna Jesu, vechiti: “Unoda kuti tinasirire kwapi po kuhira Phasika?”

¹⁸ Naye wakati kwavari: “Endanyi mu guta kuno mundhu wakatikuti, mwechiti kwaari: Mujijisi unoti, nguva yangu yaaphedo; ndinozongwarira Phasika ku nyumba yako no vajiji vangu.”

¹⁹ No vajiji vakayita kudari ngozvaakavapanga Jesu, navo vakanasirira Phasika.

²⁰ Zvino apo kwayita madekoni, wakagara pakuha no vajiji vari gumi na vaviri.

²¹ Kwakati vachaha, wakati kwavari: Zvirokwazvo ndinoti kwomuri, umwe wenyu unozondipira.

²² Navo vakatambujika kukuru, vakatanga kuvereketa kwaari, umwe ngaumwe, kuti: “Ndini here, Mambo?”

²³ Naye wakapingura, wakati: “Uwo unozoseva ngo nyara yake mundiro neni, ndiye unozondipira.”

²⁴ Mwana wo Mundhu unoenda kudari ngo zvakatahwa ndiye; asi ikhombo kuno uwo mundhu waanozopihwa ndiye Mwana wo Mundhu! Kwaizopinda kunaka kunouwo mundhu kudari asikazivi kubahwa.

²⁵ Na Judhasi uwo wakamupira wakapingura, akati: “Rabhi, ndini here?” Iye wakati kwaari: “Watozvinanga.”

²⁶ Vachaha, Jesu wakatora chimanda, wakachibonga, wakachigura, naye wakachipa kwavari echiti: “Toranyi muhe; ichi chiri muviri wangu.”

²⁷ Wakatora mukheyo, wakaubonga, wakapa kwavari, echiti: “Imwanyi mwese kwouri.

²⁸ Ngokuti iyi iri ngazi yangu yo chitenderano chipsha, inoparajihwa ngo ndava yo vazhinji kuyita kuregerehwa kwo zvishaishi.

²⁹ Asi ndinoti kwomuri, andichazomwi ngosure kwo uku ku michero yo muvhini mbhera zuva ro ndinozorimwazve ibza mu Umambo hwa Baba wangu.”

³⁰ Naapo vayinga vaemba nduyo vakabuda kuenda ku dundhu ro Maorivhe.

Jesu unozivisa Pedru

³¹ Naapo Jesu wakati kwavari: Imwimwi mwese munozopsherujiswa ndini usiku huno; ngokuti kwakatahwa, kuti, ndinozorova muhavisi, no mabvuta omushambi anozoparajika.

³² Asi ngosure kwo kumuka kwangu ndinozoenda pamberi penyu mu Garire.

³³ Asi Pedru wakapingura, akati kwaari: “Pikija vese vanozopsherujiswa ndiwe, inini anditongozopsheruki.”

³⁴ Jesu wakati kwaari: “Zvirokwazvo, ndinoti kwouri, kuti usiku huno, risati rarira jongwe iwewe unozondiramba katatu.”

³⁵ Pedru wakati kwaari: “Pikija ndechizofa newe, anditongozokurambi.” No vajiji vese vakavereketa kudaro.

Mukumbiro wa Jesu mu Getsemani

³⁶ Naapo Jesu wakaviya navo pandau inozwi Getsemani, wakati ku vajiji vake: “Garanyi pano imwimwi ndinoendeyo kookumbira.”

³⁷ Naye wakatora navo Pedru no vana vaviri va Zebhedhi, naye wakatanga kusururika no kutambujika kukuru.

³⁸ Zvino, wakati kwavari: “Mweya wangu unotambujika kakurutu mbhera kufa; garanyi pano, murinde neni.”

³⁹ Naye wakaenda mberi padodoko, wakawa ngo hope yake, wakakumbira, echiti: “Baba wangu, kudari kungayitika, mukheyo uwu ngaubve kwendiri; asi haiwa kudari ngo kuda kwangu, asi kudari ngo kuda kwako.”

⁴⁰ Naye wakaviya kuno vajiji vake, wakavawana vakavata, wakati kuna Pedru: “Ndizvo mwakonehwa kurinda neni nguva imwe here?

⁴¹ Rindanyi, mwechikumbira kuti musanghwina mukuejwa; mweya ngo gwinyiso unotenda, asi nyama aina simba.”

⁴² Zve ngo kwochipiri wakaenda, echiti: “Baba wangu, kudari uwu usingakhiriri kunja kwokuti ndiumwe inini, kuda kwako ngakuyitike.”

⁴³ Wakaviyazve wakavawana vakavata, ngokuti majiso avo ayinga achiremehwa.

⁴⁴ Naye wakavasiazve, akaenda, wakakumbira ngo kwochitatu, echinanga mazwi ndiwo-ndiwo.

⁴⁵ Naapo wakaviya ku vajiji, wakati kwavari: “Vatanyi zvino, muzorore; vonanyi mukuvo waphedo, no Mwana wo Mundhu unozopihwa mu nyara jo vashaishi.

⁴⁶ Mukanyi, tiende; vonanyi, uri phedo uwo unondipira.”

Kubatwa kwa Jesu

⁴⁷ Achavereketa, vonayi, Judhasi umwe wo gumi na vaviri, wakaviya, nayo mbungano huru vano shoti, no ndonga, vechibva kuvapristi vakuru no vakuru vo vandhu.

⁴⁸ Zvino uwo wakamupira, wayinga wavapa chivoniso, echiti: “Uwo wo ndinozochungamija ngo muromo ndiye; mubatenyi.”

⁴⁹ Paripo wakaviya kuna Jesu, wakati: “Chungamijwai, Rabhi.” Naye wakamuchungamija ngo muromo.

⁵⁰ Jesu wakati kwaari: “Hama, ita icho cho wakafambira kuyita.” Naapo vakaviya vakamubata Jesu ngo nyara javo, vakamusunga.

⁵¹ Naapo umwe wo avo vayiva na Jesu, wakatambanuja nyara yake akabvomora shoti yake, wakatema muranda wo mupristi mukuru, akagura njeve yake.

⁵² Naapo Jesu wakati kwaari: “Hwirija shoti yako mundau mwayo; ngokuti avo vese vanotora shoti vanopera ngo shoti.

⁵³ Aurangariji here kuti ndingakumbira kuna Baba wangu, naye ungatuma zvinopano ngirosi jinopinda hondo jiri gumi na mbiri ngo kuwanda?

⁵⁴ Asi kuti zvakadaro matahwa angazoita mazarisikirenyi, kuti kunosisira kuti zviyitike kudaro?”

⁵⁵ Ngo nguva iyo Jesu wakati ku mbungano: “Mwabuda here muno shoti no ndonga kuti mundibate kudari ngo vanorwa no jongoni? Ndakagara nemwi mazuva ese ndechimujijisa mu themperi, nemwi amuzivi kundibata.

⁵⁶ Asi izvi zvese zvakaitika kuti kuzarisike izvo zvakatahwa ngo vaprofeti.” Naapo vajiji vake vese vakamusiya vakatiza.

Jesu pamberi po utongi wo vaJudha

⁵⁷ Naapo vayinga vamubata Jesu vakamukweva kuenda kuna Kaifasi mupristi mukuru, apo povayinga vakaungana vatari no vakuru.

⁵⁸ Asi Pedru wakamutevera uri ngo ndhambo, mbhera kuguma ku ngome yo mupristi mukuru, naye wakanghwina mukati, wakagara pasi no vajimbahwe kuvona magumo azvo.

⁵⁹ No vapristi vakuru no magurukota ese vakapshaka chapupu cho kunyepa kumuitira ndava Jesu kuti aurawe.

⁶⁰ Asi avazivi kuiwana; pikija zvizhinji zvapupu zvokunyepa zvakaviya, asi avazivi kuiwana. Pakugumisira kwakaviya zviviri zvapupu zvokunyepa,

⁶¹ avo vakati: “Uwu wakati, ndinosimba ro kupwanya themperi ra Mwari, na ngo mazuva matatu ndinozorivakazve.”

⁶² No mupristi mukuru wakamiruka, akati kwaari: “Aupinguri chiro here? Ichinyi chovanokupupurira ava kukuitira ndava?”

⁶³ Asi Jesu wakanyarara. No mupristi mukuru wakati kwaari: “Ndinokupikisa ndi Mwari unopona, kuti utibvunje uri Kristu here, Mwana wa Mwari?”

⁶⁴ Jesu wakati kwaari: “Watonanga; kani hai ndinoti kwomuri, ngosure kwo izvi munozomuvona Mwana wo Mundhu echigara pasi ngo kumuho kwo Unosimba, echiviya uri panyezuru po makore o mu gore.”

⁶⁵ Naapo mupristi mukuru wakamwesa zvokusimira zvake, echiti: “Wavereketa kutuka; tichada ngenyi zvimweni zvapupu? Vonanyi zvino mwazwa kutuka kwake.

⁶⁶ Munorangarijenyi imwimwi?” Navo vakapingura, vakati: “Unosisira kufa.”

⁶⁷ Naapo vakamupfirira muhope mwake, vakamupambhaja, vakamurova ngo ndonga.

⁶⁸ Vechiti: “Profeta kwetiri, iwewe Kristu, kuti ndiyani wakurova?”

Pedru unoramba Jesu

⁶⁹ Na Pedru wayinga wakagara pasi kunja paruvanje: No musikana wakaviya kwaari echiti: “Iwewevo wayiva na Jesu wo Garire.”

⁷⁰ Asi iye wakapingura pamberi pavo vese echiti: “Andizivi chounovereketa.”

⁷¹ Naapo wabuda kuenda mu berere musikana umwe wakamuvona, wakati kuna avo vayivapo: “Uwu naye wayiva na Jesu wo Nazaretha.”

⁷² Zve wakaramba ngo kupika mbhiko, kuti: Andimuzivi mundhuwo.

⁷³ Ngosure kwo mukuvo mudoko vakaviya avo vaiema apo, navo vakati kuna Pedru: “Ngo gwinyiso iwewe newe uri umwe wavo, ngokuti kuvereketa kwako kunopangijira kudaro.”

⁷⁴ Naapo wakatanga kutuka no kupika, kuti: “Anditongomuzivi mundhuwo.” Paripo jongwe rakarira.

⁷⁵ Na Pedru wakacherecheja izwi ra Jesu, iro raakavereketa kuti: “Risati, rarira jongwe iwewe unozondiramba katatu.” Naye wakabuda kunja wakachema kakurutu.