Mateu 25 - NOVO TESTAMENTO EM NDAU

Muezaniso wo mbhandwe jiri gumi

¹ “Zvino Umambo hwo mu gore hunoezaniswa no mbhandwe jiri gumi, ijo jakatora zvibani zvajo, jakabuda kooshongana no mukwambo.

² Shanu javo jayiva mapenji, no shanu jayiva jakangwara.

³ Ngokuti ijo jayiva mapenji jakatora zvibani zvajo, ajizivi kutora mafuta najo.

⁴ Asi jakangwara jakatora mafuta mukati mwozvijiyo zvajo, pamwepo no zvibani zvajo.

⁵ Apo mukwambo wainonoka, jakaozira jese jakavata.

⁶ Asi pakati po usiku kwakadanijihwa, kuti: Vonanyi, mukwambo! Budanyi kooshongana naye.

⁷ Naapo mbhandwe jese jakamiruka jakanasirira zvibani zvajo.

⁸ No mapenji akati kuno jakangwara: ‘Tipenyivo mafuta enyu; ngokuti zvibani zvedu zvinojima.’

⁹ Asi jakangwara jakapingura, Azvingadaro ngokuti aazokwani isisu na imwimwi; asi endanyi kuna avo vanotengesa, mujitengere.

¹⁰ Asi jechienda kootenga, mukwambo wakaguma; najo jainga jakanasirira jakanghwina naye mu muchadho, no ruvhi rwakakonywa.

¹¹ Ngosure kwazvo kwakagumavo mbhandwe jimweni, jechiti, Mambo, Mambo tibewurire.

¹² Asi iye wakapingura, echiti, Ngo zvirokwazvo, ndinoti kwomuri, anditongomuzivi.

¹³ Ndizvo rindanyi imwimwi ngokuti amuzivi zuva dangani nguva.”

Muezaniso wo matarenta

¹⁴ Ngokuti kwakadari ngo mundhu wakatikuti echida kuenda ku nyika imweni, wakadanija varanda vake, wakapa kwavari upfumi hwake.

¹⁵ No kuna umwe wakapa matarenta mashanu, no kwo umweni wakapa maviri, no kwo umweni rimwe; kuno umwe ngaumwe wavo wakavapa kudari ngokukona kwavo kushandisa, wakaenda hwendo hwake.

¹⁶ Paripo uwo wakaashira matarenta mashanu wakaenda, akaaberekesa wakaviihwa ngo mashanu amweni.

¹⁷ Ngokudarovo uwo wakaashira maviri, wakaviihwazve ngo maviri.

¹⁸ Asi iye wakaashira rimwe, wakaenda, wakatsira mu mavhu wakafisha mare ya mambo wake.

¹⁹ Ngosure kwo mukuvo wakareba mambo wo varanda avo wakaviya akaverengerana navo.

²⁰ No uwo wakaashira matarenta mashanu wakaviya, wakaviisa matarenta amweni ari mashanu, echiti, “Mambo, wakandipa matarenta ayiva mashanu, vona, ndakaviihwa ngo amweni matarenta mashanu.”

²¹ Na mambo wake wakati kwaari: Wakashuma iwewe muranda wakanaka no unogondeka; wakagondeka pamberi po zvishomani, ndinozokuemesa pamberi po zvakawanda; nghwinayi mukudakara kwa mambo wako.

²² Wakaviyavo uwo wakaashira matarenta maviri, akati: “Mambo, wakandipa matarenta maviri; vonayi, ndakaviihwa ngo matarenta amweni maviri.”

²³ Mambo wake wakati kwaari, “Wakashuma, muranda wakanaka no unogondeka; iwewe wakagondeka ngo zvishomani, ndinozokuemesa pamberi po zvakawanda: Nghwinayi mukudakara kwa mambo wako.

²⁴ Wakaviyavo uwo wakaashira tarenta rimwe, wakati, Mambo, ndakakuziva iwewe kuti uri mundhu wakapata mwoyo, unokotora po usikazivi kukusha, no kuunganija po usikazivi kuparajira.

²⁵ Neni ndakatya, ndakaenda, ndikafisha tarenta rako mu mavhu, vonayi, hero iro riri rako.

²⁶ Asi Mambo wake wakapingura, akati kwaari, Iwewe muranda wakashata no uno nungo! Waiziva kuti ndinokotora pondisikazivi kukusha, no kuunganija po ndisikazivi kuparajira.

²⁷ Ndizvo kwaisisira kuti udire mare yangu kwavari vo bhangi, kuti mukuviya kwangu ndaizoashirazve yangu no kuviihwa kwayo.

²⁸ Ndizvo toranyi kwaari tarenta, mupe kwaari unomaterenta ari gumi.

²⁹ Ngokuti kwaari unacho unozopuwa, naye unozova no zvakawanda; asi kwouwo usina eya no icho chaanacho chinozobviswa kwaari.

³⁰ Rashanyi muranda uwo usikabeseri chiro, mu chidima chiri kunja. Kunozoiteyo kurija mbhere no kukwetsana kwo mazino.”

Kutonga kwo kupejisira

³¹ “Asi apo Mwana wo Mundhu oozoviya mu uthende hwake, no ngirosi jake naye, naapo unozogara panyezuru po dendemaro ro uthende hwake.

³² No pamberi pake anozounganijwa majinja ese, naye unozoaparajanisa rimwe kuno rimweni kudari ngo muhavisi unoparajanisa mabvuta kuno mbuji.

³³ Naye unozodira mabvuta ngo kumuho kwake, asi mbuji ngo kuboshwe.

³⁴ Naapo Mambo unozoti kwavari vari ngo kumuho kwake, ‘Viyanyi imwimwi mwakadakajiswa ndi Baba wangu, mugare ndhaka yo Umambo hwakanasirihwa imwimwi kubvira pakusikwa kwo nyika.’

³⁵ Ngokuti ndayinga ndina njara, nemwi mwakandipa zvokuha, ndayinga ndina nyota, nemwi mwakandipa cho kumwa, ndayinga ndiri mupfumba, nemwi mwakandiashira.

³⁶ Ndayinga ndiri mitu, nemwi mwakandisimija, ndaihwara nemwi mwakandifambira, ndayinga mu guniya nemwi mwakaviya kwendiri.

³⁷ Naapo vanozomupingura vakarurama, vechiti, Mambo, Takakuvona rini unonjara, tikakupa kuha? Nokuti unonyota tikakupa cho kumwa?

³⁸ Takakuvona rini uri mupfumba, tikakuashira? Nokuti uri mitu tikakusimija?

³⁹ Takakuvona rini wechihwara nokuti uri mu guniya, tikaviya kwouri?

⁴⁰ Na Mambo unozopingura, echiti kwavari, ngozvirokwazvo ndinoti kwomuri, kudari ngo zvomwakaita kuno umwe wo ava vadoko vanukuna vangu, mwakachiita kwendiri.

⁴¹ Naapo unozoti kwavari vari ngo kuboshwe kwake: Ibvanyi kwendiri imwimwi mwakatukwa, kuenda mu muriro usikaperi uwo wakanasirihwa Sathani no ngirosi jake.

⁴² Ngokuti ndayinga no njara, amuzivi kundipa chokuha. Ndayinga ndino nyota, amuzivi kundipa cho kumwa.

⁴³ Ndayinga ndiri mupfumba, amuzivi kundiashira, ndayinga ndiri mitu, amuzivi kundisimija. Ndaihwara, ndayiva mu guniya, amuzivi kundifambira.

⁴⁴ Naapozve avo navo vanozomupingura, vechiti: Mambo, takakuvona rini unonjara, nokuti unonyota, nokuti uri mupfumba, nokuti uri mitu, nokuti wechihwara, nokuti uri mu guniya, nesu atizivi kukushandira?

⁴⁵ Naapo iye unozovapingura, echiti: Ngo zvirokwazvo ndinoti kwomuri: Kudari ngo zvomusikazivi kuitira kuno umwe wo ava vadoko vanukuna vangu, amuzivi kuchiitira kwendiri.

⁴⁶ Naava vanozoenda mu kutambujwa kusikaperi, asi vakarurama mukupona kusikaperi.”