Mateu 24 - NOVO TESTAMENTO EM NDAU

Jesu unovereketa ngo kupwanyua kwo themperi

¹ Jesu wakabuda mu themperi oenda; vajiji vake vakaviya kwaari kuti vamupangijire mavakihwo o themperi.

² Naye wakapingura, akati kwavari: “Amuvoni izvi zvese here? Ngo zvirokwazvo ndinoti kwomuri, arizosiiwi pano buwe panyezuru po buwe rimweni risikazowiswi pasi.”

Kutambujika no kuteverehwa

³ Achagara pa dundhu ro Maorivhe, vajiji vake vakaviya kwaari ari ega, vechiti: “Tibvunjeyi, izvi zvinozoitika rini? Zve ichinyi chinozoyita chivoniso cho kuviya kwako, no cho kugumisira kwo nyika?”

⁴ Jesu wakapingura, wakati kwavari: “Ngwaranyi kuti musazopaukiswa ngo mundhu.

⁵ Ngokuti vazhinji vanozoviya ngo zina rangu, vechiti: Inini ndiri Kristu, vanozorashikisa vazhinji.

⁶ Nemwi munozozwa ngo imbi, no marehwa rehwa oimbi; ngwaranyi kuti musazotya; ngokuti kunosisira kuti izvi zvese zviyitike, asi magumo aasati aguma.

⁷ Ngokuti jinja rinozomukirana no jinja, no umambo hunozomukirana no umambo; kunozovapo njara, ndhenda no kuzungunyika kwo nyika, kundau jakaparajana.

⁸ Izvi zvese zviri zvo kuamba kwo matambujiko.

⁹ Naapo vanozomupira mukutambujwa, navo vanozomuuraya; nemwi munozonyenywa ngo majinja ese ngo ndava yo zina rangu.

¹⁰ Naapo vazhinji vanozopsherujwa, vanozopirana umwe no umweni, no kunyenyana.

¹¹ No vaprofeti vazhinji vokunyepa vanozovapo, navo vanozorashikisa vazhinji.

¹² Ngokuti kushaisha kunozowanda, rudo hwo vazhinji runozopora.

¹³ Asi uwo unozoshingirira mbhera ku magumo unozoponeswa.

¹⁴ No iri vhangeri ro Umambo rinozochumaihwa mu nyika jese kuyita chapupu ku majinja ese, naapo kupera kunozoguma.”

Dambujiko guru

¹⁵ “Ndizvo apo mwozovona chinyangajo chokuparaja chaakavereketa ndicho Dhanyeri muprofeti, chechiema mundau yakachena, (uwo unojija ngaazwisise).

¹⁶ Naapo avo vari mu Judhiya ngavatizire ku matundhu.

¹⁷ Naye uri panyezuru po chachungu cho nyumba, asabzuka kutora zviro zviri mu nyumba yake;

¹⁸ naye uri mu munda asahwirira sure kootora bhachi rake.

¹⁹ Asi ikhombo kwavari avo vano mimba, naavo vano mwisa ngaao mazuva!

²⁰ Asi kumbiranyi kuti kutiza kwenyu kusazoitika ngo nguva yo shipepo, zve nokuti ngo zuva ro sabatha.

²¹ Ngokuti kunozovepo kutambujika kukuru, ukwo kusikazivi kumboitika kwakadaro kubvira mukuamba kwo nyika mbhera kuguma zvino, zve, akuchatongozoitiki zvakadaro.

²² No kudari mazuva ao asikazivi kufupiswa akuna no mundhu unozorarama; asi ngo ndava yo vakatsananguhwa, ao mazuva anozofupiswa.

²³ Ngo uwo mukuvo kuti aripo mundhu unozoti kwomuri: Vonanyi, Kristu aripano, nokuti, apo; musazozvitenda.

²⁴ Ngokuti vanozovapo vakristu vokunyepa, no vaprofeti vokunyepa, navo vanozoyita zvivoniso zvikuru, no mishamiso, kupaukisa, kudari zvechiitika, pikija naavo vakatsananguhwa.

²⁵ Vonanyi ndamungwaja zviri pamberi.

²⁶ Ndizvo kuti vechizoti kwomuri: Vonanyi, uri mu bani, musaendeyo. Vonanyi, uri mukati mwo nyumba; musazotenda.

²⁷ Ngokuti kudari ngo mbheni inobva kumabvazuva, inojekisa mbhera kuguma kumavirira; kunozodarovo no kuviya kwo Mwana wo Mundhu.

²⁸ Ngokuti apo pano muviri yakafa, ndipo po jinoungana ngwanga.”

Kuviya kwo Mwana wo Mundhu

²⁹ “Ngokukasira ngosure kwo kutambujika kwo mazuva ao, zuva rinozoita chidima, no mweji auzojeki, no ndhondo jinozowa kubva mu gore, no simba rese ro mu gore rinozozungunyiswa.

³⁰ Naapo kunozovoneka chivoniso cho Mwana wo Mundhu mu gore, no majinja ese onyika anozochema, nao anozomuvona Mwana wo Mundhu echiviya panyezuru po makore o mu gore, unomasimba no uthende hukuru.

³¹ Naye unozotuma ngirosi jake, ngokurijwa kukuru kwo mbhayapaya, najo jinozounganija vakatsananguhwa vake, kubva ku mbhepo murongomuna, kubva ku magumo amwe o mu gore, mbhera kuguma ku magumo amweni.”

Chijijo cho mukuyu

³² “Zvino jijanyi muezaniso ku muti wo mukuyu: Apo davi rawo riri vishi, rechivhikitira masakani, imwimwi munoziva kuti zhienja raaphedo.

³³ Ngokudaro imwimwivo, apo mwoovona izvi zvese munozoziva kuti uri phedo, pa musuvo.

³⁴ Ngo zvirokwazvo ndinoti kwomuri, kuti uwu mubarihwana auzopindi mbhera izvi zvese zviyitike.

³⁵ Gore no nyika zvinozopinda, asi mazwi angu aatongozopindi akadi.”

Akuna unoziva zuva no nguva

³⁶ “Asi ngo ndava yo zuva iro no nguva iyo akuna naumwe unoziva, pikija ngirosi jo mu gore, nokuti Mwana, kwega Baba.

³⁷ Ngokuti kudari ngo mazuva a Noa, kunozodarozve kuviya kwo Mwana wo Mundhu.

³⁸ Ngokuti kudari ngo mazuva ao pamberi po ndambi, vakaha, vechimwa no kurovora, no kurovoja, mbhera rakaguma zuva iro raakanghwina ndiro Noa mu ngarava.

³⁹ Navo avazivi kuziva mbhera ndambi yakaguma, yakavatora vese, kunozodarozve kuviya kwo Mwana wo Mundhu.

⁴⁰ Naapo vandhu vaviri vanozovapo mu munda, umwe unozotohwa, no umweni unozosiyiwa.

⁴¹ Vanakaji vaviri vanozonga vechikwiya pa gwiyo, umwe unozotohwa no umweni unozosiyiwa.

⁴² Ndizvo rindanyi; ngokuti amuzivi zuva raanozoviya Mambo wenyu.

⁴³ Asi zivanyi ichi, kuti kudari mune wo nyumba waiziva mukuvo woinoviya ndiwo mbavha, iye waizorinda, asikatendi kuti nyumba yake iphwanyiwe.

⁴⁴ Ndizvo itanyi vakanasirihwa; ngokuti ngo nguva yo musikakarakaji Mwana wo Mundhu unoviya.”

Muranda unogondeka

⁴⁵ “Ndizvo ndiyani uri muranda unogondeka no wakangwara, uwo Mambo wake wakamuemesa kuyita mutongi panyezuru po nyumba yake, kuti avape kuha kwavo ngo nguva kwayo?

⁴⁶ Unomuchena muranda uwo apo Mambo wake oviya unozomuwana echiita kudaro.

⁴⁷ Ngo zvirokwazvo ndinoti kwomuri, kuti unozomuemesa kuti ayite mutongi pamberi po izvo zvese zvaanazvo.

⁴⁸ Asi kuti uwo muranda wakashata unozoti mu mwoyo mwake. Mambo wangu unononoka kuviya;

⁴⁹ naye atange kurova varanda avo vari vadoni vake, ahe echimwa pamwepo no zvidhakwa;

⁵⁰ mambo wo uwo muranda unozoviya ngo zuva raasikaveteri na ngo nguva yaasikazivi;

⁵¹ naye unozomutema kuyita zviguhwa, aemese kwaari chikovaniswa chake no vajiitisi, kwoyiteyo kurija mbhere no kukwetsana kwo mazino.”