Mateu 23 - NOVO TESTAMENTO EM NDAU

Kuziviswa kwo kurwisana no vajijisi vo mupango no vafarisi

¹ Naapo Jesu wakavereketa ku mbungano no ku vajiji vake,

² echiti: “Vatari no vafarisi vanogara pachigaro cha Mosi.

³ Ndizvo zviro zvese zvo vanomupanga, zviitenyi muzvingwarire; asi musayita kudari ngo mishando yavo; ngokuti vanorovejesa kuvereketa vasikazviiti.

⁴ Ngokuti vanosunga mitwaro inorema no kuidira pa mapfuji ovandhu, asi ivona vambhwine avatendi kuisukumija ngo chikunwe chavo.

⁵ Asi mishando yavo vese vanoyita kuti vavoneke ngo vandhu; vanopambhamisa mafurakera avo, vechikurisa mipendero yo nguvo javo.

⁶ Vanoda zvigaro zvo pamberi mu mishongano yo kuha, no zvigaro zvo pamberi mu nyumba jo kudira.

⁷ No kuchungamijwa pandau jo musika, no kudanijwa ngo vandhu kuti, Rabhi.

⁸ Asi imwimwi musatenda kudanijwa kuti Rabhi; ngokuti Mujijisi wenyu ndiumwe, neimwimwi mwese muri hama.

⁹ Musadanija mundhu pikija wakadini mu nyika kuti, baba, ngokuti Baba wenyu ndiumwe, vari mu gore.

¹⁰ Zve musadanijwa kuti vajijisi, ngokuti mujijisi wenyu ndiumwe; Kristu.

¹¹ Asi iye uri mukuru pakati penyu unozoyita muranda wenyu.

¹² Pikija ndiyani, unozojikurisa iye unozopfaviswa; no uwo unozojipfavisa unozokuriswa.”

Jesu unoshora vajijisi vo mupango no vafarisi

¹³ “Asi ikhombo kwomuri vatari no vafarisi, vajiitisi! Ngokuti munokonyera Umambo hwo mu gore ku vandhu; ngokuti imwimwi amunghwini, zve amutenderi avo vanoda kunghwina kuti vanghwine.

¹⁴ Ikhombo kwomuri vatari no vafarisi, vajiitisi, ngokuti munopeja nyumba jo shirikaji, na ngo kujiitisa munoita mikumbiro yakareba, ndizvo munozoashira kutongwa kwakapinda kukura.

¹⁵ Ikhombo kwomuri vatari no vafarisi, vajiitisi! Ngokuti munotenderera jombe no nyika kupshaka mujiji umwe, naapo watenderuka, munomuita kakapetwa kaviri kuyita mwana wo Gehena kupinda imwimwi.

¹⁶ Ikhombo kwomuri imwimwi vatungamiriri vari mapofu, imwimwi munoti, pikija ndiyani unopika ngo themperi aana ndava; asi uwo unopika ngo mukore wo themperi, unondava!

¹⁷ Imwimwi mapenji no mapofu, ngokuti ngochapi chakapinda kukura, mukore, nokuti themperi, iro rinochenesa mukore?

¹⁸ Zve munoti, pikija ndiyani unopika ngo altari, aana ndava; asi pikija ndiyani unopika ngo chipo chiri panyezuru payo, uno ndava.

¹⁹ Imwimwi mapofu; ngokuti ngochapi chakapinda kukura, chipo nokuti altari iyo inochenesa chipo?

²⁰ Ndizvo uwo unopika ngo altari, unopika ndiyo, na ngo zvese zviri panyezuru payo.

²¹ No uwo unopika ngo themperi, unopika ndiro, no uwo unogara mukati mwaro.

²² No uwo unopika ngo denga, unopika ngo dendemaro ra Mwari, no uwo unogara panyezuru paro.

²³ Ikhombo kwomuri vatari no vafarisi vajiitisi! Munopa chimwe chogumi cheminte no anise, no kumini, nemwi mwaregera kuyita zvakakura zvo mipango, kutonga kwakwo, no nyasha, no kugonda: Kwaisisira kuti muzviite izvi, musikazivi zvimweni zvisikazivi kuitwa.

²⁴ Imwimwi vatungamiriri mapofu, munoshuza mutunga mwomija kamera.

²⁵ Ikhombo kwomuri vatari no vafarisi vajiitisi, ngokuti munosuka kunja kwo mukheyo no kwo ndiro, asi mukati jakazara ngo kuba no ugebenga.

²⁶ Iwewe mufarisi uri bofu, sukayi kutanga mukati mwo mukheyo no mwo ndiro kuti kunja kwajo kusukikevo.

²⁷ Ikhombo kwomuri vatari no vafarisi, vajiitisi! Ngokuti mwakadari ngo makuva akacheneswa, ao ngo gwinyiso anovoneka akanaka ngokunja, asi ngomukati akazara ngo magodo ovakafa, no zvese zvino svina.

²⁸ Ngokudaro nemwi ngokunja munovoneka muri vakarurama kuno vandhu, asi ngomukati mwakazara ngo kujiitisa, no kushata.

²⁹ Ikhombo kwomuri vatari no vafarisi, vajiitisi! Ngokuti imwimwi munovaka makuva o vaprofeti, no kunemesa makuva o vakarurama.

³⁰ Nemwi munoti, kudari taivapo ngo mazuva o majibaba edu, tainga tisikazivi kutenderana navo mukuparaja ngazi yo vaprofeti.

³¹ Ndizvo munojipupurira kuti imwimwi muri vana veavo vakauraya vaprofeti.

³² Zarisanyi imwimwivo mupimo o majibaba enyu.

³³ Imwimwi nyoka, imwimwi mibarihwana wo mavhumbi, mungayita mapokonyokerenyi kubva kwo kutongwa kwo Gehena?

³⁴ Ndizvo, ringiranyi ndinotuma, kwomuri vaprofeti, no vakangwara, no vatari, no vamweni vavo munozovauraya, no kuvakohomera; no vamweni vavo munozovarova mu nyumba jenyu jo kudira, no kuvatambuja kubva ku dhoropa rimwe kuenda kuno rimweni,

³⁵ kuti panyezuru penyu iviye ngazi yese yo vakarurama yakaparajwa mu nyika, kubvira ku ngazi ya Abhera wakarurama, mbhera kuguma kungazi ya Zakariya mwana wa Bharakiya, uwo wo mwakauraya pakati po ruvanje no altari.

³⁶ Ngo zvirokwazvo ndinoti kwomuri kuti izvi zvese zvinozoitika kuno uwu mubarihwana.”

Jesu unorumira nyoka Jerusarema

³⁷ “Jerusarema, Jerusarema, iwewe unouraya vaprofeti, wechivafura ngo mapuwe avo vanotumwa kwouri, kuwanda kwakadini kwemikuvo wo ndakada kuunganija vana vako pamwepo, kudari ngo mbhambo inounganija zvitiyo zvayo pasi po mapapiro ayo, nemwi amuzivi kutenda!

³⁸ Vonanyi, nyumba yenyu yasiyiwa kwomuri iri dongo.

³⁹ Ngokuti ndinoti kwomuri, amuchatongozondivoni mbhera munozoti: Unomuchena uwo unoviya ngo zina ra Mambo.”