Mateu 20 - NOVO TESTAMENTO EM NDAU

Vashandi mu munda wo mivhini

¹ Ngokuti Umambo hwo mu gore hunoezaniswa no mundhu uri mune wo nyumba, uwo wakafumira mangwanani mavishi kootora vashandi vo munda wake wo mivhini.

² Naapo watenderana no vashandi mare imwe ngo zuva, wakavatuma ku munda wo mivhini.

³ Naye wakabudazve kooda kuyita nguva yochitatu, wakavona vamweni vakayima pandau yo musika, vasikashandi.

⁴ Wakati kwavari: Endanyivo mu munda wo mivhini, no icho chinomusisira ndinozomupa. Navo vakaenda.

⁵ Zve wakabuda kooda kuyita nguva yochitandhatu, no yo chipfumbamwe, wakayitazve kudaro.

⁶ Kooda kuyita nguva yo chigumi na imwe wakabuda, wakavona vamweni vakayima, wakati kwavari: Munoima pano ngenyi zuva rese musina chomunoshanda?

⁷ Vakati kwaari: Ngokuti apana mundhu watitora. Wakati kwavari, endanyivo mu munda wo mivhini no icho chinomusisira munozoashira.

⁸ Kwoyita madekoni mambo wo munda wo mivhini wakati kuno mungwariri wake: Danijayi vashandi, uvape musharo, utange ngo uwo wokugumisira mbhera kuguma kuno uwo wokutanga.

⁹ Kwakati no vaviya avo vakatohwa ngo nguva yo chigumi na imwe vakaashira mare imwe.

¹⁰ Kwakati avo vokutanga voviya vakarangarija kuti vangaengejehwa; navo ngokudaro vakaashira mundhu wese mare imwe.

¹¹ Naapo vaashira vakan'un'utira mune wo nyumba,

¹² vechiti: “Ava vokupejisira vashanda nguva imwe yega, newe wakayita kuti vaezane nesu, isisu takatwara mutwaro no kupisa kwezuva.”

¹³ Asi iye wakapingura, akati kwo umwe wavo, shamwari andizivi kukuitira chakashata. Auzivi kutenderana neni here ngo mare imwe?

¹⁴ Tora icho chiri chako uende. Ndinoda kumupavo uwu wokupejisira kudari ndiwe.

¹⁵ Akutendehwi here kwendiri kuti ndiite icho chondinoda ngozviri zvangu? Nokuti jiso rako, rinothima ngokuti inini ndakanaka here?

¹⁶ Ndizvo avo vo sure vanozoyita vo pamberi, no vo pamberi vanozoyita vo sure.

Jesu unovereketazve ngo kufa no kumuka kwake

¹⁷ Apo Jesu echikwira Jerusarema, wakatora vajiji vari gumi na vaviri, vari vega mu njira, naye wakati kwavari:

¹⁸ “Vonanyi, tinokwira Jerusarema; no Mwana wo Mundhu unozopihwa ku vapristi vakuru no vatari, navo vanozogura kuti aurawe.

¹⁹ Navo vanozomupira kuno vo majinja kuti aitihwe jee, no kumupshaputa, no kukohomehwa, na ngo zuva rochitatu unozomuka.”

Chikumbiro cho vana va Zebhedhi

²⁰ Naapo kwakaviya kwaari mayi wo vana va Zebhedhi, pamwepo no vana vake, akamudira, echikumbira kwaari chiro chakatikuti.

²¹ Naye wakati kwaari: “Chinyi cho munoda?” Wakati kwaari: “Nangayi kuti ava vana vangu vaviri vagare umwe ngo kumuho kwako, no umweni ngo kuboshwe kwako mu Umambo hwako.”

²² Asi Jesu wakapingura, akati: “Amuzivi icho chomunokumbira. Munokona here kumwa mukheyo wo ndinozomwa inini?” Vakati, kwaari: “Tinokona.”

²³ Iye wakati kwavari: “Ngo gwinyiso munozomwa mukheyo wangu; asi kugara ngo kumuho kwangu na ngo kuboshwe kwangu andikwopi kwangu akadi kupa, asi ngokwaavo vakanasirihwa ndi Baba wangu.”

²⁴ Naapo vari gumi vazwa, vakatsenekera hama mbiri ijo.

²⁵ Asi Jesu wakavadanija kwaari, akati: “Munoziva kuti vatongi vo majinja vanotonga panyezuru pavo, no vakuru vavo vanosimba panyezuru pavo.

²⁶ Asi akuzoiti kudaro pakati penyu; asi uwo unoda kuti ayite mukuru pakati penyu ngaayite mushandiri wenyu;

²⁷ no uwo unoda kuyita wokutanga pakati penyu ngaayite muranda wenyu.

²⁸ Kudari ngo Mwana wo Mundhu aazivi kuviya koshandihwa, asi kushandira no kupa kupona kwake kuyita muripo wo vazhinji.”

Kurapwa kwo mapofu maviri

²⁹ Naapo vachibuda kubva mu Jeriko mbungano huru yakamutevera.

³⁰ Vonanyi, mapofu maviri akagara pa njira, apo akazwa kuti Jesu waikhirira, akadanijira, echiti: “Mambo, Mwana wa Dhavhidha, tiyitire nyasha.”

³¹ No mbungano yaiakamisa kuti anyarare. Asi akapinda kudanijisa, echiti: “Mambo, Mwana wa Dhavhidha, tiyitire nyasha.”

³² Na Jesu wakayima, wakaadanija, akati: “Munoda kuti ndimuitirenyi?”

³³ Akati kwaari: “Mambo, kuti majiso edu apembenujwe.”

³⁴ Ndizvo Jesu wakaazwira urombo, wakapshasa majiso ao; paripo majiso ao akapembenujwa, nao akamutevera.