Mateu 2 - NOVO TESTAMENTO EM NDAU

Vazivi vo kumabvazuva vanodira Mambo

¹ Kwakati apo Jesu abahwa mu Bheterehema ro Judhiya ngo mazuva a Herodhi mambo, vonanyi, kwakaviya vazivi vechibva kumabvazuva vakaguma Jerusarema, vechiti: Arikwapi uwo wakaberekwa uri Mambo wo vaJudha?

² Ngokuti takavona ndhondo yake tiri kumabvazuva, nesu taviya kuti timudire.

³ Kwakati Herodhi mambo azwa, wakasvipa mwoyo no vo Jerusarema vese naye.

⁴ Naapo aunganija pamwepo vapristi vakuru vese, no vatari vo vandhu wakavabvunjisa kuti: “Unozobahwa kwapi Kristu.”

⁵ Navo vakati kwaari: Mu Bheterehema ro Judhiya; ngokuti kwakatahwa ngo muprofeti kudari:

⁶ Iwewe Bheterehema, nyika ya Judha, auripi mudoko akadi mukati mwo vatongi vaJudha; ngokuti kwouri kunozobuda mutungamiriri, uwo ndiye unozoyita muhavisi wo vandhu vangu vaIsraeri.

⁷ Naapo Herodhi adanija vazivi ngo kufishika, wakanasa kukwarisisa kwavari mukuvo wo yakavoneka ndhondo.

⁸ Naye wakavatuma Bheterehema, akati: Endanyi munase kupshakisisa uwo mwana mudoko; kuti mwamuwana mundiviyire no izwi, kuti nenivo ndiende ndimudire.

⁹ Navo, apo vazwa mambo, vakaenda, ngokudaro, ndhondo iyo yo vakavona vari kumabvazuva yakavatungamirira mbhera yakaguma pandau apo payiva no mwana mudoko.

¹⁰ Naapo vavona ndhondo vakadakara ngo kudakara kukuru.

¹¹ Naapo vanghwina mu nyumba, vakavona mwana mudoko na Mariya mayi wake; navo vakawa pasi, vakamudira; kwakati vabewura pfuma yavo vakamupa zvipo mukore no makha no mure.

¹² Navo vechipangwa mu kurota kuti vasachahwirira ngo kuna Herodhi, vakaenda ngo njira imweni ku nyika yavo.

Kutiza kuenda Egipite

¹³ Naapo vaenda, vonanyi, ngirosi ya Mambo yakavoneka kuna Josefa ngo kurota, yechiti: “Mukayi, utore mwana mudoko na mayi wake, utizire Egipite, ugare apo mbhera ndikubvunje, ngokuti Herodhi unozomupshaka mwana mudoko kumuuraya.”

¹⁴ Naye wakamiruka, akatora mwana mudoko na mayi wake usiku, vakaenda Egipite.

¹⁵ Naye wakagareyo mbhera kufa kwa Herodhi, kuti zvizarisike izvo zvakavereketwa ndi Mambo, kubudikija ngo muprofeti, echiti: “Ndakadanija mwana wangu kuti abude Egipite.”

Kuurawa kwo vana vadoko

¹⁶ Naapo Herodhi wavona kuti wakaitihwa jee ngo vazivi, wakatseneka kakurutu, wakatuma akauraya vana vadoko vese vo rume vayinga vari mu Bheterehema no ndharaunda yaro yese, avo vayinga vaano makore maviri na vayiva pasi paao, kudari ngo mukuvo uwo waayinga wakanasa kubvunjisisa vazivi.

¹⁷ Zvakazarisika izvo zvakavereketwa ndi Jeremiya muprofeti, echiti:

¹⁸ Izwi rakazwika mu Rama kuchema no kutsumba kukuru, Rakeri echichemera vana vake, asikatendi kuembezehwa, ngokuti inga avachipo.

Kubva Egipite

¹⁹ Asi apo Herodhi afa, ngirosi ya Mambo yakavoneka mu kurota kuna Josefa ari mu Egipite, yechiti:

²⁰ Mukayi, utore mwana mudoko na mayi wake uende mu nyika yo Israeri; ngokuti avo vayipshaka kuuraya mwana mudoko vakafa.

²¹ Naye wakamiruka, wakatora mwana mudoko na mayi wake, wakaviya mu nyika ya Israeri.

²² Asi wazwa kuti Arkirausi wayiva mambo wo Judhiya pandau ya baba wake Herodhi, wakatya kuendeyo; echiziviswa mu kurota, wakaenda ku nyika yo Garire,

²³ wakaviya akagara mu guta rinozwi Nazaretha; kuti rizarisike izwi rakavereketwa ngo vaprofeti kuti: Unozozwi muNazaretha.