Mateu 19 - NOVO TESTAMENTO EM NDAU

Ndava yo kurambana

¹ Kwakaitika apo Jesu apeja kuvereketa aya mazwi, wakabuda mu Garire, wakaviya mu migano yo Judhiya, mwombera mwo Jordhani.

² Mbungano huru yakamutevera; naye wakavarapa apo.

³ No vafarisi vakaviya kwaari, vechimueja, vechiti: “Kunotendehwa here ngo mipango kuti mundhu arambe mukaji wake ngo ndava iriyese?”

⁴ Naye wakapingura akati: “Amuzivi kujija here kuti uwo wakavasika pakutanga, wakavasika mwanarume no mwanakaji.

⁵ Akati; ‘Ngo ndava iyi mundhu unozosiya baba na mayi, unozobatana kumukaji wake;

⁶ ndizvo avachayiti vaviri, asi nyama imwe.’ Ndizvo icho chaakasunganisa Mwari, mundhu asazosunungura.”

⁷ Vakati kwaari: “Ndizvo ngenyi, Mosi wakapanga kupa tshamba yo kuparajana, no kumuramba?”

⁸ Wakati kwavari: “Mosi ngo ndava yo kupata kwo mwoyo yenyu wakatendera kuti murambe vakaji venyu; asi kubvira mukutanga kwayinga kusikazivi kudaro.

⁹ Asi inini ndinoti kwomuri, kuti, pikija ndiyani uwo unoramba mukaji wake isiri ndava yo kuomba, arovore umweni, unoomba.”

¹⁰ Vajiji vakati kwaari: “Kuti yakadaro ndava yo mundhu no mukaji wake, akuzivi kunaka kurovora.”

¹¹ Asi wakati kwavari: “Vese avangaashiri izwi iri, asi kwega kwavari avo vakaripuwa.

¹² Ngokuti varipo vari ngomwa kubva mu ndani jo majimayi avo; varipozve mithenwa avo vakathenwa ngo vandhu, varipozve vakajiitisa ngomwa ngo ndava yo Umambo hwo mu gore. Iye uno simba ro kuriashira, ngaariashire.”

Vana vadoko no Umambo hwa Mwari

¹³ Naapo vakazisa kwaari vana vadoko, kuti adire nyara jake panyezuru pavo, avakumbirire: Asi vajiji vakavarambisa.

¹⁴ Asi Jesu wakati: “Tenderanyi vana vadoko kuti vaviye kwendiri, musavarambisa, ngokuti Umambo hwo mu gore ngo hwavakadaro.”

¹⁵ Naye vakadira nyara jake panyezuru pavo, akabva apo.

Vapfumi no Umambo hwa Mwari

¹⁶ Vonanyi, umwe wakaviya kwaari, wakati: “Mujijisi, ichinyi icho chakanaka chondingaita kuti ndizowane kurarama kusikaperi?”

¹⁷ Naye wakati kwaari: “Unondibvunjisa ngenyi ngo ndava yo chakanaka? Aripo umwe wakakana; asi kudari wechida kunghwina mu kurarama ngwarirayi mipango.”

¹⁸ Wakati kwaari: “Mipango yenyi?” Na Jesu wakati: “Uchazouraya, Uchazoomba, Uchazoba, Uchazoita chapupu cho kunyepa,

¹⁹ Reremeja baba wako na mayi, Unozoda muvakihwana wako kudari ngokujida iwewe.”

²⁰ Jaha iro rakati kwaari: “Ndakazvingwarira izvi zvese; chinyi chasara kuti ndiite?”

²¹ Jesu wakati kweriri: “Kuti wechida kuyita wakaperera, endayi utengese izvo zvounazvo, upe kuvarombo, newe unozowana upfumi mu gore: Uviye unditevere.”

²² Asi apo jaha razwa izwi iro rakaenda rechitambujika, ngokuti rayiva no upfumi hwakawanda.

²³ Naapo Jesu wakati ku vajiji vake: “Ngo zvirokwazvo ndinoti kwomuri, kuti zvinonesa kuno mukhupuki kuti anghwine mu Umambo hwo mu gore.

²⁴ Zve ndinoti kwomuri, kwakapinda kureruka kuti kamera ringhwine ngo pachibovo cho njingano, kuno kuti mukhupuki anghwine mu Umambo hwa Mwari.”

²⁵ Apo vajiji vakashamiswa kakurutu, vakati: “Kuti zvakadaro, ndiyani ungaponeswa?”

²⁶ Asi Jesu wakavaringira, akati kwavari: “Kuna vandhu ichi achitongoitiki; asi kuna Mwari zvese zvinoitika.”

²⁷ Naapo Pedru wakapingura, akati kwaari: “Ringira, isisu takasiya zvese, tikakutevera; ndizvo tinozowanenyi?”

²⁸ Na Jesu wakati kwavari: “Ngo zvirokwazvo ndinoti kwomuri, kuti imwimwi mwanditevera, ngo mukuvo wokusikwa kupsha, apo Mwana wo Mundhu oozogara panyezuru po dendemaro ro uthende hwake, imwimwivo munozogara panyezuru po madendemaro ari gumi na maviri, mwechitonga majinja ari gumi na maviri a Israeri.”

²⁹ No mundhu wese wakasiya nyumba, nokuti vanukuna, nokuti hanzvaji, nokuti baba, nokuti mayi, nokuti mukaji, nokuti vana, nokuti nyika, ngo ndava yo zina rangu, unozoashira zvakapetwa kuyita zana (100), naye unozogara ndhaka yo kurarama kusikaperi.

³⁰ Asi vazhinji avo vari vopamberi vanozoyita vo sure; naavo vari vo sure vanozoyita vopamberi.