Mateu 18 - NOVO TESTAMENTO EM NDAU

Ndiyani unozova mukuru?

¹ Panguva iyo vajiji vakaviya kuna Jesu, vakati: “Ndiyani uri mukuru mu Umambo hwo mu gore?”

² Na Jesu wakadanija kwaari mwana mudoko, wakamudira pakati pavo,

³ akati: “Ngo zvirokwazvo ndinoti kwomuri, musikatenderuki, muyite kudari ngo mwana mudoko, amutongozonghwini mu Umambo hwo mu gore.

⁴ Ndizvo iye unozojipfavisa kudari ngo uwu mwana mudoko, iye ndiye uri mukuru mu Umambo hwo mu gore.

⁵ No uwo unozoashira umwe mwana mudoko wakadari ngo uwu ngo zina rangu, unondiashira inini.”

Musayita kuti vamweni vashaishe

⁶ “Asi pikija ndiyani unozoshaishisa umwe wo vadoko vakadari vanonditenda, kunopinda kumunakira iye kuti gwiyo risungihwe muhuro mwake, kuti akandihwe pakajikira jombe.

⁷ Ikhombo ku nyika ngo ndava yo zvishaishi! Ngokuti kunosisira kuti zvishaishi zviviye; asi ikhombo kwaari mundhuwo wo zvinoviya ndiye!

⁸ Kuti nyara yako, dangani tshoka yako inokushaishisa, itemeyi, uirashe kubva kwouri. Kunopinda kunaka kwouri unghwine mu kururama uri chirema, nokuti wechithobinya, kuno kuti unonyara mbiri dangani tshoka mbiri ukandihwe mu muriro usikaperi.

⁹ No kudari jiso rako rinokushaishisa ribvite urirashe kubva kwouri. Kunopinda kukunakira kuti unghwine mu kururama uno jiso rimwe kuno kuti uno majiso maviri ukandihwe mu muriro wo Gehena.”

Kudakara ngo kuwanika kwo bvuta

¹⁰ “Ngwarayi kuti musazoshora umwe we ava vadoko. Ngokuti ndinoti kwomuri, mu denga ngirosi javo jinogara jichivona hope ya Baba wangu vari mu gore.

¹¹ Ngokuti Mwana wo Mundhu wakaviya kuponesa avo vakarashika.

¹² Munorangarijenyi? Kuti mundhu unozana ro mabvuta no rimwe rawo rarashika, aasiyi here ari makumi mapfumbamwe na mapfumbamwe, aende ku matundhu no kupshaka iro rakarashika?

¹³ No kudari kwechiitika kuti akariwana, ngozvirokwazvo ndinoti kwomuri kuti unopinda kudakara ndiro kuno ari makumi mapfumbamwe na mapfumbamwe asikazivi kurashika.

¹⁴ Ngokudaro andikwopi kuda kwa Baba wenyu vari mu gore kuti umwe weava vadoko arove.”

Kuregerera nguva jese

¹⁵ “Zve kuti munukuna wako echizokushaishira, enda, umupangijire ndava yake pakati penyu muri mwega; kudari iye echizopurukira, wawana munukuna wako.

¹⁶ Asi kuti esikazokupurukiri, tora umwe dangani vaviri, kuenda newe, kuti ngo miromo yo vaviri dangani yo vatatu vanoyita chapupu, mazwi ese angagwinyiswa.

¹⁷ Asi kuti iye akazoramba kuvapurukira, bvunjayi vo chiara: Asi kudari akazoramba kupurutana vo chiara, ngaayite kwouri kudari ngo wo vo majinja, nokuti ngo mushabisi.

¹⁸ Zvirokwazvo, ndinoti kwomuri, pikija ichinyi chomunozosunga mu nyika, chinozosungwavo mu gore; no icho chomunozosunungura mu nyika chinozosununguhwavo mu gore.

¹⁹ Zve ndinoti kwomuri, kudari vaviri kwomuri vanozotenderana mu nyika ngo chiro chovanozokumbirira, chinozoitihwa kwavari ndi Baba wangu vari mu gore.

²⁰ Ngokuti apo vaviri nokuti vatatu vechiungana pamwepo ngo zina rangu, ndiripo pakati pavo.”

Mundhu usikazivi kuregerera

²¹ Naapo Pedru wakaviya, echiti kwaari: “Mambo, munukuna wangu unozondishaishira kangana ndechimuregerera? Mbhera mikuvo minomwe here?”

²² Jesu wakati kwaari: “Andinangi kwouri kuti, mbhera runomwe akadi; asi mbhera makumi manomwe akapetwa kanomwe.”

²³ Ndizvo Umambo hwo mu gore hunoezaniswa no mundhu uri mambo, uwo wayida kuverengeserana no varanda vake.

²⁴ Naapo atanga kuverenga, umwe wakaziswa kwaari unomagava wo matarenta ari gumi ro zviuru (10.000).

²⁵ Asi ngokuti iye wayinga asina chokuripira ndicho, mambo wake wakapanga kuti atengeswe no mukaji wake, no vana vake, nazvo zvese zvayiva nazvo, kuti gava riripwe.

²⁶ Ndizvo muranda uwo wakawa pasi, wakamunamata, echiti, “Ndisengerereyi, neni ndinozokuripira zvese.”

²⁷ Naapo mambo wo uwo muranda wakamuzwira, wakamusunungura, akamuregerera gava.

²⁸ Asi uwo muranda wakabuda, wakavona umwe wo varanda ari mudoni wake, uwo wayinga no gava naye ro zana (100) ro machereni, naye wakamubata ngo nyara, wakamujipa pahuro, echiti: “Ripa kwendiri gava rako.”

²⁹ Ndizvo muranda uwo uri mudoni wake wakawa pasi, wakamupota, echiti, “Ndisengerereyi, neni ndinozokuripira.”

³⁰ Asi aazivi kutenda. Kani wakaenda wakamunghwinisa mu guniya, mbhera aripe gava iro.

³¹ Ndizvo varandadoni vake, no vavona icho chakaitika, vakasvipa mwoyo kakurutu, vakaviya, vakaverengera mambo wavo izvo zvakaitika.

³² Naapo mambo wake wamudanija, wakati kwaari: “Iwewe muranda, wakashata, ndakakuregerera gava rese, apo wandipota:

³³ Auchaisisira iwewevo here kuti umuregerere muranda uwo uri mudoni wako, kudari ndini ndakakuregerera iwewe?

³⁴ Na mambo wake wakatseneka, wakamupira ku vashwinyisi mbhera aripe magava ese aayiva nawo kwaari.

³⁵ Ngokudaro Baba wangu vari mu gore vanozoyita kwomuri, kuti imwimwi musikaregereri munukuna wenyu ngo mumwoyo mwenyu.”