Mateu 17 - NOVO TESTAMENTO EM NDAU

Kutsandujwa kwa Jesu

¹ Ngosure kwo mazuva matandhatu Jesu wakatora Pedru, na Jakobe, na Johani munukuna wake, akakwira navo panyezuru po dundhu rakareba, vari vega.

² Naye wakatsandujwa pamberi pavo, no hope yake yakajeka kudari ngo zuva, no zvokufuka zvake zvakachena kudari ngo kujeka.

³ Ndipo kwakavoneka kwaari Mosi na Erija, vechivereketa naye.

⁴ Na Pedru wakati kuna Jesu: “Mambo, kwakanaka kwetiri kuti tive pano. Kudari wechida, ndinozovaka pano zvitumba zvitatu, chimwe chako, chimweni cha Mosi, no chimweni cha Erija.”

⁵ Apo achavereketa, vonanyi gore rinon'anikira rakavafukijira, ndizvo izwi rakabva mu gore, rechiti: “Uwu uri Mwana wangu, wo ndinoda, wo ndinonasa kudakara ndiye; Muzwenyi.”

⁶ Naapo vajiji vazwa vakawa ngo hope javo, vakatya kukuru.

⁷ Na Jesu wakaviya, akavapshasa, akati: “Mukanyi, musatya.”

⁸ Naapo vamusa majiso avo, avazivi kuvona mundhu, kwega Jesu.

⁹ Vachabzuka kubva panyezuru po dundhu, Jesu wakavapanga, echiti: “Musazobvunja mundhu naumwe ngo ndava yo chivoniso mbhera Mwana wo Mundhu amuke kwo vakafa.”

¹⁰ No vajiji vake vakamubvunjisa, vechiti: “Ndizvo, ngenyi vatari vanoti kuti, kunosisira kuti Erija atange kuviya?”

¹¹ Naye wakapingura, echiti: “Ngo gwinyiso Erija unoviya amusijire zvese.

¹² Asi ndinoti kwomuri, Erija wakatoviya hake, navo avazivi kumuziva, asi vakayita kwaari zvese izvo zvovakada. Ngokudaro Mwana wo Mundhu naye unozotambujwa ndivo.”

¹³ Naapo vajiji vakazwisisa kuti wakavereketa kwavari ndi Johani Mubhapatisi.

Jesu unorapa umwe unonjwiti

¹⁴ Vaguma kuno mbungano kwakaviya kwaari mundhu, akamugwadamira pasi, echiti:

¹⁵ “Mambo, muitirenyi nyasha mwana wangu. Ngokuti unonjwiti, unotambujika kukurutu; ngokuti kazhinji unowa pa muriro no kazhinjizve mu kumwa.

¹⁶ Neni ndakamuzisa kuno vajiji vako, navo vakonehwa kumurapa.”

¹⁷ Jesu wakapingura, akati: “A! Mubarihwana usikatendi no unopauka, ndinozogara nemwi mukuvo wakadini? Muziseyi pano kwendiri.”

¹⁸ Na Jesu wakambirimbija iro bzoka; naro rakabuda kubva kwaari; no murumbwana wakarapwa kubvira nguva iyo.

¹⁹ Naapo vajiji vakaviya kuna Jesu, ari ega, navo vakati: “Ngenyi isisu takonehwa kurimbirimbija?”

²⁰ Naye wakati kwavari: “Ngo ndava yo kugononda kwenyu, ngokuti ngozvirokwazvo ndinoti kwomuri, kuti, kudari munokutenda kudari ngo mbhumba yo mustadhi, mungazoti kuno iri dundhu, Ibva pano, uende apo; naro rinozobva apo; akuchina, chiro chisikazoitwi ndimwi.

²¹ Iyi mbewu ayibudi kwega asi ngo kukumbira na ngokuera kuha.”

Jesu unovereketazve ngo kufa no kumuka kwake

²² Navo vaungana pamwepo mu Garire, Jesu wakati kwavari: “Mwana wo Mundhu unozopihwa mu nyara jo vandhu.

²³ Navo vanozomuuraya, na ngo zuva rechitatu unozomukazve.” Navo vakatambujika kukuru.

Shangu yo Themperi

²⁴ Naapo vaguma mu Kaperanaume avo vayiashira shangu vakaviya kuna Pedru, vakati: “Mujijisi wenyu aashabi shangu here yo mare inozwi didrakama?”

²⁵ Wakati, “Eya.” Kwakati wanghwina mu nyumba Jesu wakatanga kuvereketa kwaari, echiti: “Unorangarijenyi Simoni? Majimambo onyika vanoashira kunani murimwa, nokuti shangu? Kuno vana vavo, nokuti kuvonyikanja?”

²⁶ Pedru wakati kwaari, “Kuvonyikanja.” Naapo Jesu wakati kwaari: “Ngokudaro vana vavo vari vakasununguhwa.

²⁷ Asi kuti tisazovapsheruja, endayi iwewe ku jombe, ukandire chivejo, utore hove iyo inotanga kubatwa; naapo wazaura muromo wayo, unozowana chigurwa cho mare chinozwi statera; icho unozochitora uchipe kwavari ngo ndava yangu no yako.”