Mateu 16 - NOVO TESTAMENTO EM NDAU

Chivoniso cho simba ra Jesu

¹ Vafarisi no vasadhusi vakaviya vechimueja, vakakumbira kuti avapangijire chivoniso chinobva mu gore.

² Asi iye wakapingura, wakati kwavari: “Kwooyita madekoni munoti, kunja kunozoeja ushoni; ngokuti mu gore mwakapshuka.

³ No mumangwanani munoti, kunozona nyamasi ngokuti mu gore mwakapshuka muno ruseto. Munoziva kujija hope yo mu gore, asi amukoni here kujija zvivoniso zvo mikuvo?

⁴ Mubarihwana wakashata no unoomba unopshaka chivoniso, akuna chivoniso chinozopuwa kwouri, asi kwega chivoniso cha Jona.” Naye wakavasiya, akaenda.

Mumera wo vafarisi no vasadhusi

⁵ Naapo vajiji vake vaguma mwombera vayinga vakanganwa kutora zvimanda.

⁶ Na Jesu wakati kwavari: “Vonanyi, mungware mumera wo vafarisi no wo vasadhusi.”

⁷ Navo vakapangana pakati pavo, vakati: “Unodaro ngokuti atizivi kutora zvimanda.”

⁸ Na Jesu echiziva izvo, wakati: “Munopangana ngenyi pakati penyu imwimwi munokutenda kudodoko, ngokuti amuna chimanda?

⁹ Amuzivi nazvino here, nokuti kucherecheja ngo zvimanda zvishanu zvakapuwa vandhu vari zviuru zvishanu (5.000), no zvitengu zvingana zvo mwakabojera matshekeneswa?

¹⁰ Zve, nokuti zvimanda zvinomwe zvakapuwa vandhu vayiva zviuru zvirongomuna (4.000), no zvitengu zvingana zvo mwakabojera matshekeneswa?

¹¹ Amuzivi kuzwisisa ngenyi kuti andizivi kuvereketa kwomuri ngo zvimanda, kuti mungware mumera wo vafarisi no wo vasadhusi?”

¹² Naapo vakanasa kuzwisisa kuti aasaivapanga kuti vangware ngo mumera wo zvimanda, asi kuti vangware kujijisa kwo vafarisi no kwo vasadhusi.

Pedru unonanga kuti Jesu ndi Mesiya

¹³ Zvino Jesu naaguma mu nyika yo Khesariya yo Firipi, wakabvunjisa vajiji vake echiti: “Vandhu vanoti kuti inini Mwana wo Mundhu ndiyani?”

¹⁴ Navo vakati: “Vamweni vanoti kuti uri Johani Mubhapatisi, no vamweni kuti uri Erija, no vamweni kuti uri Jeremiya, nokuti umwe wo vaprofeti.”

¹⁵ Iye wakati kwavari: “Asi imwimwi munoti ndiri yani?”

¹⁶ Simoni Pedru wakapingura, akati kwaari: “Iwewe uri Kristu, Mwana wa Mwari unopona.”

¹⁷ Na Jesu wakapingura, akati kwaari, “Unomuchena iwewe Simoni, mwana wa Jona, ngokuti nyama no ngazi azvizivi kuvonisa ichi kwouri, asi Baba wangu vari mu gore.

¹⁸ Neni ndinoti kwouri, kuti iwewe Pedru, na ngopanyezeru poiri buwe ndinozovaka chiara changu; no musuvo wo haidhesi auzochinyisi.

¹⁹ Neni ndinokupa mugogo wo Umambo hwo mu gore; no icho cho unozosunga mu nyika chinozosungwa mu gore; no icho cho unozosunungura mu nyika chinozosununguhwa mu gore.”

²⁰ Naapo wakapanga vajiji vake kuti vasazobvunja mundhu naumwe kuti iye ndiye Kristu.

Jesu unovereketa ngo kufa no kumuka kwake

²¹ Kubvira ngo uwo mukuvo Jesu wakatanga kupangijira ku vajiji vake kuti kunosisira kuti aende Jerusarema, atambujike ngo zvakawanda, ngo vakuru no vapristi vakuru, no vatari, aurawe, ngo zuva rochitatu amuswe.

²² Naapo Pedru wakamutora kuenda pamutivi, wakatanga kumuvereketera, echiti: “Mwari ngaayite kuti chisaitika icho kwouri, Mambo: Ichi achizoitiki kwouri narini.”

²³ Asi iye wakakunukuka, wakati kuna Pedru: “Ibva kwendiri, Sathani! Uri chikhugunyiso kwendiri; ngokuti auzivi ngoizvo zva Mwari, asi ngoizvo zvo vandhu.”

²⁴ Naapo Jesu wakati ku vajiji vake: “Pikija ndiyani unoda kuviya sure kwangu, ngaajirambe atore muchinjiko wake anditevere.”

²⁵ Ngokuti iye unoda kuhwira kurarama kwake, unozokurasha; no uwo unozorasha kurarama kwake ngo ndava yangu, unozokuwana.

²⁶ Mundhu unozoviihwa ngenyi kudari achiwana nyika yese, no kurasha ndaramo yake? Nokuti mundhu unozopenyi kuti awane ndaramo yake?

²⁷ Ngokuti Mwana wo Mundhu anozoviya mu uthende hwa Baba wake pamwepo no ngirosi jake; naapo unozopa mundhu wese kudari ngo mishando yake.

²⁸ “Zvirokwazvo, ndinoti, kuti varipo vamweni venyu vanoyima pano, avo vasikazozwi kufa mbhera vavone Mwana wo Mundhu echiviya mu Umambo hwake.”