Mateu 15 - NOVO TESTAMENTO EM NDAU

Chirovejeso cho vokare

¹ Zvino kwakaviya kuna Jesu vafarisi no vatari vechibva Jerusarema, vechiti:

² “Ngenyi vajiji vako vanogura chirovejeso cho vokare, ngokuti avashambi nyara javo apo vachiha chimanda.”

³ Asi iye wakavapingura, akati kwavari: “Imwimwi nemwi munogura ngenyi mupango wa Mosi ngo chirovejeso chenyu?”

⁴ Ngokuti Mwari wakati: Reremeja baba wako na mayi wako, no uwo unotuka baba nokuti mayi ngaafe ngo kufa.

⁵ Asi imwimwi munoti, Iye unozoti kuna baba wake nokuti mayi wake, chiro chiri chakadini icho chemwaida kubesehwa ndicho ndini, chaachipo kuna Mwari,

⁶ aadikanizve kureremeja baba wake nokuti mayi wake. Ndizvo ngokudaro munoita kuti izwi ra Mwari riyite risina shwiro ngo chirovejeso chenyu.

⁷ Imwimwi vajiitisi, Isaya wakanasa kuprofeta ndimwi, echiti:

⁸ “Vandhu ava vanondireremeja ngo miromo yavo, asi mwoyo yavo iri ndhambo kwendiri.

⁹ Asi vanopera nguva kundidira, vechijijisa kuyita zvijijiso, mipango yo vandhu.”

Zviro zvinosvipisa vandhu

¹⁰ Naye echidanija pamwepo mbungano, wakati kwavari: “Izwanyi muzwisise;

¹¹ andichopi akadi chinonghwina mu muromo chinomusvipisa mundhu, asi icho chinobuda mu muromo, ndicho chinosvipisa mundhu.”

¹² Naapo vakaviya vajiji vake, vakati kwaari: “Auzivi here kuti vafarisi vasvipa mwoyo ngokuzwa izwi iri?”

¹³ Asi iye wakapingura, akati: “Chisimwa chese chisikazivi kusimwa ndi Baba wangu vari mu gore, chinozobvitwa.

¹⁴ Varegerenyi, vari mapofu, anokweva mapofu. No kudari bofu rechikweva bofu, ese anozowa mukati mwo rindi.”

¹⁵ Na Pedru wakapingura wakati, kwaari: “Tidurujireyi muezaniso uwu.”

¹⁶ Asi wakati: “Imwimwi nemwi amusati mwanasa kuziva kani?

¹⁷ Amuzwisisi here icho chinonghwina ngo pa muromo chinoenda mu ndani chinorashwa mushango?

¹⁸ Asi izvo zvinobuda ku muromo zvinobva mu mwoyo; izvi zvinomusvipisa mundhu.

¹⁹ Ngokuti mu mwoyo munobva mirangariro yakashata, kuuraya, kuomba, kunyenya, umbavha, uchapupu hwo kunyepa, kutuka.

²⁰ Izvi ndizvo zviro zvinosvipisa mundhu; asi kuha ngo nyara jisikazivi kushambwa, akusvipisi mundhu akadi.”

Gonda ro jimayi ro Kenani

²¹ Naapo Jesu wakabvapo, wakaenda mu nyika yo Tire no yo Sidhoni.

²² Vonanyi, jimayi ro Kenani rakabva ku ndau iyo, rakadanijira, rechiti: “Ndiyitire nyasha, Mambo, Mwana wa Dhavhidha; mwana wangu wokaji unotambujwa kukurutu ngo bzoka.”

²³ Asi iye aazivi kuripingura no izwi. No vajiji vake vakaviya kwaari, vakamupota, vechiti: “Muendesenyi, ngokuti unodanijira sure kwedu.”

²⁴ Asi wakapingura, wakati: “Ndakatumihwa kwega ku mabvuta akarashika o nyumba yo Israeri.”

²⁵ Asi uwo wakaviya, wakamudira, akati: “Mambo, ndidetsere.”

²⁶ Asi wakapingura, wakati: “Akuzivi kunaka kutora chimanda cho vana, no kuchikandira kuzvimbwa.”

²⁷ Asi uwo wakati: “Eya Mambo, ngokutizve zviimbhwa zvinoha kwezvinohwarakatika pa thafura ra mambo wazvo.”

²⁸ Naapo Jesu wakapingura, akati kweriri: “A! Jimayi, kutenda kwako kuri kukuru. Ngakuitike kwouri kudari ngo zvounoda. No mwana waro wokaji wakaponeswa kubvira ngo nguva iyo.”

Jesu unorapa vatenda vakawanda

²⁹ Na Jesu wakabvapo, wakaviya phedo po jombe ro Garire; wakakwira pa dundhu, wakagara apo.

³⁰ No mbungano huru yakaviya kwaari, inazvo zvirema, no mapofu, no mbeveve, no vakakhuvazika, no vamweni vazhinji, vakavadira pasi kutshoka jake, naye wakavarapa.

³¹ Ngokudaro mbungano yakashamiswa apo yavona mbeveve jechivereketa, no vakakhuvazwa vechirapika, no zvirema zvechifamba, no mapofu echivona. Navo vakakuja Mwari wa Israeri.

Jesu unopa zvokuha zviuru zvirongomuna zvo vandhu

³² Naapo Jesu wakadanija vajiji vake kwaari, wakati: “Ndinozwa urombo ngo ndava yo mbungano, ngokuti yayinga ineni mazuva matatu vasina zvokuha; neni andidi kuvaendesa vasikazivi kuha, ngokuti vangazowa ngo njara mu njira.”

³³ No vajiji vake vakati kwaari: “Ngokwapi kwetingawana zvimanda zvakawanda mu bani muno zvinokwanisa kugutisa vandhu vazhinji vakadari?”

³⁴ Na Jesu wakati kwavari: “Muno zvimanda zvingana?” Navo vakati: “Zvinomwe, no zvihove zvishomani.”

³⁵ Naye wakapanga mbungano kuti igare pasi.

³⁶ Naye wakatora zvimandezvo zvinomwe no hove, wakazvibonga, wakazvigura, wakapa kuno vajiji, no vajiji vakazvipa kuno mbungano.

³⁷ Navo vakaha vese, vakaguta; navo vakabojera matshekeneswa akasara, zvitengu zvinomwe zvakazara.

³⁸ Naavo vakaha vayiva zviuru zvirongomuna (4.000) zvo vanarume, kunja kwovanakaji no vana.

³⁹ Naye wakaendesa mbungano, wakanghwina mu ngarava wakaviya ku migano yo Magadhana.