Mateu 14 - NOVO TESTAMENTO EM NDAU

Kufa kwa Johani Mubhapatisi

¹ Ngo uwo mukuvo Herodhi mutongi wakazwa mbiri ya Jesu.

² Naye wakati ku varanda vake: “Uwu ndi Johani Mubhapatisi; wamuka kwo vakafa. Ndizvo mishando iyi ino simba inoitwa ndiye.”

³ Ngokuti Herodhi wayinga wakamubata Johani, akumusunga, akamunghwinisa mu guniya ngo ndava ya Herodhiasi mukaji wo munukuna wake Firipi.

⁴ Ngokuti Johani wayinga akati kwaari: “Akutendehwi ngo mupango kwouri kuti umurovore.”

⁵ Naapo wayida kumuuraya, wakatya mbungano, ngokuti vayiti kuti uri muprofeti.

⁶ Asi apo zuva ro kuberekwa kwa Herodhi raguma, mwana wokaji wa Herodhiasi wakatamba pakati pavo, naye wakamudakajisa Herodhi.

⁷ Ndizvo iye wakagondisa ngo kupika mbhiko kuti unozomupa pikija ichinyi chaaizokumbira.

⁸ Naye achivangijihwa ndi mayi wake, wakati: “Ndipe pano mundiro musoro wa Johani Mubhapatisi.”

⁹ Na mambo wakasvipa mwoyo; asi ngo ndava yo kupika kwake, na ngo ndava yaavo vayigara naye pakuha, wakapanga kuti upuwe kwaari.

¹⁰ Naye wakatuma kuti Johani aguhwe musoro mu guniya.

¹¹ No musoro wakaziswa uri mundiro ukapuwa ku musikana, naye wakauviyisa kuna mayi wake.

¹² No vajiji vake vakaviya vakatora muviri wake, vakauviga, navo vakaenda vakamuzivisa Jesu.

Jesu unopa zvokuha kuna mbungano

¹³ Zvino Jesu azwa izvi wakabvapo ngo ngarava kuenda ku ndau iri bani ari ega. Naapo mbungano yazwa ndizvo, yakamutevera ngo tshoka, yechibva ku madhoropa.

¹⁴ Naye wakabuda wakavona mbungano huru, wakavazwira urombo, naye wakaponesa vaihwara vavo.

¹⁵ Kwakati aamadekoni vajiji vake vakaviya kwaari, vechiti: “Pano pa bani, no mukuvo watopera zvino; ndizvo chienekesa mbungano kuti vaende mu maguta vajitengere zvokuha.”

¹⁶ Asi Jesu wakati kwavari: “Avasisiri kuenda; vapenyi imwimwi zvokuha.”

¹⁷ Navo vakati kwaari: “Pano tino zvimanda zvishanu zvega, no hove mbiri.”

¹⁸ Naye wakati: “Zvizisenyi pano kwendiri.”

¹⁹ Naye wakapanga mbungano kuti igare pasi pa mwenje, wakatora zvimanda izvo zvishanu, no hove mbiri, wakaringira mu gore, wakazvibonga, akazvigura, akapa kuno vajiji, no vajiji vakapa kuno mbungano.

²⁰ Navo vese vakaha vakaguta, navo vakabojera matshekeneswa ezvaihwarakatika, zvitengu zviri gumi na zviviri zvakazara.

²¹ Navo vakaha vayiva vanoda kuyita zviuru zvishanu (5.000) zvo vanarume, kunja kwo vanakaji no vana.

Jesu unofamba panyezuru po kumwa

²² Paripo iye wakapanga vajiji vake kuti vanghwine mu ngarava, vatungamire kuambuka mwombera, achaenekesa mbungano.

²³ Naapo aendesa mbungano, wakakwira pa dundhu ari ega kookumbira. Kwoyita madekoni wayinga ari apo ega.

²⁴ Asi zvino ngarava inga yaandhambo no mutundhu, yechikandihwa apo naapo ngo mavimbi, ngokuti bepo rayita maringwa navo.

²⁵ Na ngo nguva yo kurinda yochirongomuna yo usiku iye wakaviya kwavari, echifamba panyezuru po jombe.

²⁶ Asi vajiji vechimuvona echifamba panyezuru po jombe vakatya, vechiti: Ijimujangara. Navo vakadanijira ngokutya.

²⁷ Asi paripo Jesu wakavereketa kwavari, echiti: “Shinganyi, ndini hangu, musatya.”

²⁸ Na Pedru wakamupingura, echiti: “Mambo, kuti uriwe nangayi kuti ndiviye kwouri panyezuru po kumwa.”

²⁹ Naye wakati: “Izayi!” Naapo Pedru abzuka kubva mu ngarava, wakafamba panyezuru po kumwa kuviya kuna Jesu.

³⁰ Asi echivona bepo rechiyita maringwa naye, wakatya; naye wakatanga kundondomera, wakadanijira, echiti: “Mambo ndiponese.”

³¹ Asi paripo Jesu wakatambanuja nyara yake, wakamubata, wakati kwaari: “Iwewe uno kutenda kudodoko, wagononda ngenyi?”

³² Kwakati apo vakwira mu ngarava, bepo rakatura.

³³ Naavo vayiva mu ngarava vakamudira, vakati: “Ngo zvirokwazvo iwewe uri Mwana wa Mwari.”

Jesu unorapa vatenda mu Genesareta

³⁴ Naapo vakaambuka mwombera vakaguma mu nyika yo Genesareta.

³⁵ Naapo vandhu vo munyikemwo vamuziva, vakatuma mu nyika mwese, vakazisa kwaari vese vayiva no ndhenda.

³⁶ Navo vakamupota kuti ava vatendehwe kwega kupshasa mupendero wo nguvo yake; naapo vese vakaupshasa vakaponeswa aembho.