Mateu 13 - NOVO TESTAMENTO EM NDAU

Muezaniso wo mukushi

¹ Ngo zuva iro Jesu wakabuda mu nyumba, akagara phedo no jombe.

² Kwakaungana kwaari mbungano huru, ndizvo wakanghwina mu ngarava wakagara; no mbungano yese yakayima ngo pambhiri.

³ Naye wakavereketa kwavari zviro zvakawanda ngo miezaniso, wakati: “Ringiranyi kwakabuda mukushi kookusha.

⁴ Kwakati mukukusha kwake mbewu jimweni jakawa mu njira, no shiri jakaviya jikajiha.

⁵ No jimweni jakawira pa mapuwe apo pojayinga jisina mavhu mazhinji, najo jakamera ngo kukasira, ngokuti inga jisina mavhu mazhinji.

⁶ Naapo zuva rakwira jakapiswa; na ngokuti inga jisina miji, jakazeketera.

⁷ Jimweni jakawira pano minzwa; no minzwa yakamera yakajipshinya.

⁸ No jimweni jakawira mu mavhu akanaka najo jakabereka tsangu, jimweni zana jimweni makumi matandhatu, no jimweni makumi matatu.

⁹ Uwo uno njeve jokuzwa, ngaazwe.”

Kudurujira ngo ndava yo muezaniso

¹⁰ No vajiji vakaviya kwaari vakati: “Unovereketa kwavari ngenyi ngo muezaniso?”

¹¹ Naye wakapingura, akati kwavari: “Ngokuti kunopuwa kwomuri kuziva zvakafishika zvo Umambo hwo mu gore, asi kwavari avo, akuzivi kupuwa.

¹² Ngokuti kwaari unacho unozopuwazve, naye unozova no zvakawanda. Asi uwo usina, naicho chaanacho chinozobviswa kwaari.

¹³ Ngo iyi ndava ndinovereketa kwavari ngo miezaniso, ngokuti vechivona asi avavonesesi, vechizwa avazwi, zve avazwisisi.

¹⁴ Kwavari kwakazarisika kuprofeta kwa Isaya, ukwo kunoti: ‘Ngokuzwa munozwa, nemwi musikazwisisi, mwechivona munovona, musikavonesesi.

¹⁵ Ngokuti mwoyo yaava vandhu yakapata, no njeve javo jino majiviranjeve, no majiso avo akabvubvumara; kuti pamweni vangazovona ngo majiso avo, vazwe ngo njeve javo, no kuzwisisa ngo mwoyo yavo, vatenderuke, neni ndivaponese.’

¹⁶ Asi anomuchena majiso enyu, ngokuti anovona; no njeve jenyu, ngokuti jinozwa.

¹⁷ Ngokuti zvirokwazvo ndinoti kwomuri, kuti, vaprofeti vazhinji no vandhu vakarurama vakadisisa kuvona zvomunovona imwimwi, navo avazivi kuzvivona, no kuzwa zvomunozwa navo avazivi kuzvizwa.”

Jesu unodurujira muezaniso wo mukushi

¹⁸ “Ndizvo zvino izwanyi muezaniso wo mukushi.

¹⁹ Apo mundhu nokuti ngouri arizwa izwi ro Umambo, asikarikoni, naapo unoviya uwo wakashata unovhomora izvo zvakakushwa mu mwoyo mwake; uwu ndiye wakakushwa pa njira.

²⁰ No uwo wakakushwa pa mapuwe, uwu ndiye unorizwa izwi, na ngokukasira unoriashira ngokudakara.

²¹ Asi aana miji mukati mwake, asi unogara mukuvo mudoko; asi apo kunoviya kutambujwa ngo ndava yo izwi, ngokukasira unopumbhuniswa.

²² Iye wakakushwa mu minzwa uwu ndiye unorizwa izwi, asi kudembatemba ngo zvo nyika, no kuchengejehwa kwo upfumi kunojipa izwi, naro aribereki.

²³ Asi iye wakakushwa pa mavhu akanaka, uwu ndiye unorizwa izwi, naye unorikona, zve unobereka michero ngozvirokwazvo, vamweni zana, vamweni makumi matandhatu, vamweni makumi matatu.”

Muezaniso wo koroni no wo senga

²⁴ Muezaniso umweni waakavereketa kwavari echiti: “Umambo hwo mu gore hunoezaniswa no mundhu wakakusha mbewu jakanaka mu munda wake.

²⁵ Asi apo vandhu vachavata, mukorore wake wakaviya wakakushavo senga mukati mwo mbewu yakanaka, wakaenda.

²⁶ Asi mbewu yoomera yechitumbuka, naapo senga rakavonekavo naro.

²⁷ Naapo varanda vo mune wo nyumba vakaviya, vakati kwaari: ‘Mambo, auzivi kukusha mbewu jakanaka mu munda wako here? Ndizvo senga rinobva kwapi?’

²⁸ Asi iye wakati kwavari: ‘Mundhu uri mukorore wakayita ichi.’ Ndizvo varanda vakati kwaari: ‘Unoda here kuti tiende tiribvite?’

²⁹ Asi wakati: Haiwa, ngokuti apo mwechibvita senga mungazobvita no koroni nayo.

³⁰ Zviregerenyi zvese zvikure pamwepo mbhera mukuvo wo kukotora; ngo mukuvo wo kukotora ndinozoti kuvacheki, kuti mwechiunganija senga kutanga, murisunge kuyita mutoro kuripisa; asi mwechiunganija koroni mu nyumbu yangu.”

Muezaniso wo mbhumba yo mustadhi

³¹ Muezaniso umweni waakavereketa kwavari, echiti: “Umambo hwo mu gore hunoezaniswa no mbhumba yo mustadhi, iyo yaakatora mundhu, akaisima mu munda wake.

³² Iyo ngo gwinyiso iri doko kuno mbewu jese, asi apo yakura inopinda mapfiba ese kukura, inoyita muti, kuti shiri jo mu gore jinoviya, jimate mu matavi yawo.”

Muezaniso wo mumera

³³ Muezaniso umweni waakavereketa kwavari, echiti: “Umambo hwo mugore hunoezaniswa no mumera uwo waakatora mujimayi, akaudira mukati mwo mitani mitatu yo upfu mbhera hwese hwakakukumuka.”

Ngo ndava yo kujijisa miezaniso

³⁴ Izvi zvese Jesu wakazvivereketa kuna mbungano ngo miezaniso, naye aazivi kuzvivereketa kwavari na chimwe kusiri ngo muezaniso.

³⁵ Kuti kuzarisike izwi iro rakavereketwa ngo muprofeti, echiti: “Ndinozobewura muromo wangu kuvereketa miezaniso, ndinozovonisa zvakafishika kubvira pakusikwa kwo nyika.”

Jesu unodurujira muezaniso wo koroni no wo senga

³⁶ Naapo wakaendesa mbungano, wakanghwina mu nyumba. No vajiji vake vakaviya kwaari, vakati: “Tidurujireyi muezaniso wo senga ro mu munda.”

³⁷ Naye wakapingura, akati kwavari: “Iye unokusha mbewu jakanaka uri Mwana wo Mundhu.”

³⁸ Munda inyika; mbewu jakanaka jiri vana vo umambo, senga riri vana vo uwo wakashata.

³⁹ Mukorore uwo wakarikusha ndi dhiyabhorosi. No kukotora kuri kupera kwo nyika, no vacheki jiri ngirosi.

⁴⁰ Ndizvo kudari ngo senga rinounganijwa pamwepo rechipiswa ngo muriro; kunozodarovo mukupera kwo nyika.

⁴¹ Mwana wo Mundhu unozotuma ngirosi jake, najo jinozounganija kubva mu Umambo hwake zvese zvinopsheruja, naavo vese vanoyita zvinonyangaja;

⁴² najo jinozovakhandira muchoto cho muriro, kunozovepo kurija mbhere no kukwetsana kwo mazino.

⁴³ Naapo vakarurama vanozojeka kudari ngo zuva mu Umambo hwa Baba avo. Uwo uno njeve ngaazwe.

Muezaniso hwo upfumi hwakafishwa no buwe rinomutengo mukuru

⁴⁴ Zve Umambo hwo mu gore hunoezaniswa no upfumi hwakafishwa mu munda; uhwo hwaakawana mundhu akahufishazve, ngo kudakara kwake unoenda, unokutengesa zvese zvaanazvo, wotenga uwo munda.

⁴⁵ Zve Umambo hwo mu gore hunoezaniswa no mundhu uri mutengesi unopshaka mapuwe akanaka.

⁴⁶ Uwo apo avona buwe rimwe rinomutengo mukuru, wakaenda, wotengesa zvese zvayiva nazvo, wakaritenga.

Juya rakakandihwa mu jombe

⁴⁷ Zve Umambo hwo mu gore hunoezaniswa no juya rakakandihwa mu jombe, naro rakabata mufumbo wese wo hove.

⁴⁸ Naro apo razara vakarikwevera kunja, vakagara pasi, vakaunganija jakanaka mu njangaya, asi jakashata vakajirasha.

⁴⁹ Kunozodaro mukupera kwo nyika; ngirosi jinozobuda jiparajanise vakashata kubva mukati mwo vakarurama.

⁵⁰ Jivakandire muchoto cho muriro; kwoyiteyo kurija mbhere no kukwetsana kwo mazino.

Zviro zvipsha no zvokare

⁵¹ “Mwanasa kuzwa izvi zvese here?” Navo vakati kwaari, “Eya.”

⁵² Wakati kwavari: “Ndizvo, mutari wese uwo wakajijiswa ngo zvo umambo hwo mu gore, wakadari ngo mundhu uri mune wo nyumba, uwo unobudisa kubva kwo upfumi hwake zviro zvipsha no zvokare.”

Jesu aashihwi mu Nazaretha

⁵³ Kwakaitika apo Jesu apeja iyi miezaniso, wakabvapo.

⁵⁴ Naapo wayinga waviya ku nyika yake, wakavajijisa mu nyumba yavo yo kudira, zvakayita kuti vashamiswe, vakati: “Kunobva kwapi kungwara uku kwo uwu mundhu, no iyi mishando yo simba?

⁵⁵ Uwu andiyepi here mwana wo muvezi? Mayi wake avadanijwi kuti ndi Mariya here? No vanukuna vake ndi Jakobe, na Josefa, na Simoni, na Judhasi here?

⁵⁶ No hanzvaji jake ajinesu jese here? Ndizvo zvinobva kwapi izvi zvese?”

⁵⁷ Navo vakakhugurika ndiye. Asi Jesu wakati kwavari: “Muprofeti aaregi kureremejwa kwega mu nyika mwake, no mu nyumba yake.”

⁵⁸ Naye aazivi kuyita apo mishando ino simba yakawanda ngo ndava yo kutama kutenda kwavo.