Mateu 11 - NOVO TESTAMENTO EM NDAU

Mupinguro wa Jesu kuna vajiji va Johani Mubhapatisi

¹ Kwakaitika apo Jesu apeja kupanga vajiji vake vari gumi na vaviri, wakamiruka kubvapo, wakaenda kwoojijisa no kuchumayira mu madhoropa avo.

² Zvino apo Johani azwa uri mu guniya mishando ya Kristu, wakatuma ngo vajiji vake.

³ Navo vakati kwaari: “Ndiwe here uwo unoviya, nokuti tichagarira umweni?”

⁴ Na Jesu wakapingura, akati kwavari: “Endanyi, mwobvunja Johani izvo zvomunozwa, no zvomwavona.

⁵ Mapofu anovona, no zvirema zvinofamba, no vano mapere vanoshambijwa, no vano mandondo vanozwa, no vakafa vanomuswa, no varombo vano vhangeri rinochumaihwa kwavari.

⁶ Unomuchena uwo asikapsheruki ndini.”

Jesu unovereketa ndi Johani Mubhapatisi

⁷ Naapo vachienda, Jesu wakatanga kuvereketa ku mbungano ndiye Johani, wakati: Mwakaenda mu bani kwoovonenyi? Njanga yakazungunyiswa ngo bepo here?

⁸ Asi mwakaenda kwoovonenyi? Mundhu wakasimijwa ngo machira akapfava here? Vonanyi, avo vanopfeka machira akapfara vari mu nyumba jo majimambo.

⁹ Asi mwakaendeyo ngenyi? Kwovona muprofeti here? Eya, ndinoti kwomuri, no uwo unonyanya kupinda muprofeti.

¹⁰ Uwu ndiye kwakatahwa ndiye, kuti: Vonanyi, ndinotuma mutumwa wangu pamberi po hope yako, uwo unozonasira njira yako pamberi pako.

¹¹ Zvirokwazvo, ndinoti kwomuri, pakati po avo vakaberekwa ngo vanakaji, akuzivi kutongobva mukuru kuna Johani Mubhapatisi. Asi iye uri mudoko mu Umambo hwo mu gore uri mukuru kwaari.

¹² Kubvira kumazuva a Johani Mubhapatisi mbhera nazvino Umambo hwo mu gore hunopambwa no vanoupamba vanohutora ngo kugebenga.

¹³ Ngokuti vaprofeti vese, no mupango zvakaprofeta mbhera kuguma ka Johani.

¹⁴ No kudari mwechitenda kuchiashira, Uwu ndiye Erija, uwo wakaemeswa kuviya.

¹⁵ Uwo uno njeve jokuzwa ngaazwe.

¹⁶ Asi ndouezanisa nenyi uwu mubarihwana? Wakadari ngo vana vanogara pandau yo musika, vechidanijira kuno shamwari javo,

¹⁷ vechiti: “Takarija munyere kwomuri, nemwi amuzivi kutamba; takaita chiriro, nemwi amuzivi kuchema.”

¹⁸ Ngokuti Johani wakaviya asikahi nokuti kumwa, navo vakati: Uno bzoka.

¹⁹ Mwana wo Mundhu wakaviya echiha no kumwa, navo vakati: Vonanyi muhisi no mumwisi wo vhini, shamwari yo vashabisi no vashaishi! Asi kungwara kwakapembejwa ngo mishando yakwo.

Madhoropa okupanduka

²⁰ Naapo wakatanga kushora madhoropa umwo mwakatanga mwaitwa mishando mizhinji yake inosimba, ngokuti avazivi kutenderuka.

²¹ “Ikhombo kwouri, Korazini! Ikhombo kwouri Bhetisaidha! Ngokuti kudari mishando inosimba yayinga yakayitwa mu Tire no Sidhoni, iyo yakayitwa mukati mwenyu, vayinga vakatotenderuka kare, vakasimira masaka, no mu marota.

²² Ngokudaro, ndinoti kwouri, kunozopinda kureruka kuna Tire no Sidhoni ngo zuva ro kutongwa kuno kwomuri.

²³ Newe Kaperanaume unozokuriswa mu gore here? Unozoterejwa pasi ku Haidhesi; ngokuti kudari mishando inosimba yayinga yakayitwa mu Sodhoma, iyo yakayitwa mukati mwako, raidari riripo na nyamasi.

²⁴ Ngokudaro, ndinoti kwomuri kuti kunozopinda kureruka ku nyika yo Sodhoma ngo zuva ro kutongwa kuna iwewe.”

Mwari unozvipangijira ku vakarurama

²⁵ Ngo uwo mukuvo Jesu wakapingura, akati: “Ndinokutenda, Baba, Mambo wo mu gore no wo nyika, ngokuti iwewe wakazvifisha izvi kuno vakangwara no vanokuziva, wakazvipangijira kuchiya.

²⁶ Eya Baba ngokuti chayiva chinodakajisa mukuvona kwako.

²⁷ Zviro zvese zvakapuwa kwendiri ndi Baba wangu. Akuna unoziva Mwana, ndi Baba ega; akunazve unoziva Baba, mwana ega, no uwo waanoda kumupangijira Mwana.

²⁸ Viyanyi kwendiri imwimwi mwese mwakaremba, no munoremehwa ngo mutwaro, neni ndinozomuzoroja.

²⁹ Toranyi kanga yangu panyezuru penyu, mujije kwendiri, ngokuti ndiri ndakapfava mu mwoyo, nemwi munozowana kuzorora kumweya yenyu.

³⁰ Ngokuti kanga yangu yakanaka, no mutwaro wangu unoreruka.”