Mateu 10 - NOVO TESTAMENTO EM NDAU

Vapostori gumi na vaviri

¹ Naapo wadanija kwaari vajiji vake vari gumi na vaviri, wakavapa simba panyezuru po mweya inosvina kuti vaimbirimbije, no kurapa ndhenda jese no kuhwara kwese.

² Aya ndiwo mazina o vapostori vari gumi na vaviri; uwo wokutanga ndi Simoni waizwi Pedru, na Andreu munukuna wake; na Jakobe mwana wa Zebhedhi, na Johani munukuna wake,

³ na Firipi, na Bhartoromeu; Tomasi, na Mateu mushabisi; Jakobe mwana wa Arifeu, na Tadheu;

⁴ na Simoni mukenani, na Judhasi Isikariyoti uwo wakamupira.

Jesu unotuma vapostori

⁵ Ava vari gumi na vaviri Jesu wakavatuma, akavapanga echiti: Musaenda mu njira yo vo majinja, musanghwina muguta pikija riri ro vaSamariya;

⁶ asi motoenda ku mabvuta akarashika o nyumba yo Israeri.

⁷ Endanyi mwechichumaira, mwechiti: Umambo hwo mu gore hwa phedo.

⁸ Rapanyi vanohwara, musanyi vakafa, chenesanyi vanomapere, mbirimbijanyi mabzoka; mwakaashira ngo nyasha, mweshipavo ngo nyasha.

⁹ Musatora mukore, nokuti sirivha, nokuti thusi muzvikwama zvenyu.

¹⁰ Zve, nokuti muzava wo hwendo hwenyu, musina mabhachi maviri, nokuti magwada, nokuti ndonga; ngokuti mushandi unosisira kupuwa kuha kwake.

¹¹ Pikija ngomwapi mu dhoropa nokuti mu guta mwo munozonghwina, bvunjisanyi kuti ndiyani uri mukati mwaro unosisira; apo ndipo po munozogara mbhera mubvemwo.

¹² Mwoonghwina mu nyumba, ichingamijenyi.

¹³ No kudari nyumba iyo yechisisira kunyarara kwenyu ngakuve panyezuru payo; asi kudari isikasisiri, kunyarara kwenyu ngakuhwirire kwomuri.

¹⁴ Pikija ndiyani avo vasikazomuashiri, nokuti kupurutana mazwi enyu, pakubuda munyumbamwo, nokuti dhoropa iro, pumbhujanyi bukuta kubva pa tshoka jenyu.

¹⁵ “Zvirokwazvo ndinoti kwomuri, kunozopinda kureruka kuno nyika yo Sodhoma no yo Gomora ngo zuva ro kutongwa, kuna dhoropa iro.”

Kutambujwa no kuteverehwa kwo vapostori

¹⁶ “Vonanyi, ndinomutuma kudari ngo mabvuta mukati mwo mathika. Ndizvo mwechingwara kudari ngo nyoka, mwakapfava kudari ngo njiva.”

¹⁷ Asi ngwaranyi vandhu, ngokuti vanozomupira kubangano, navo vanozomurova mu nyumba javo jo kudira.

¹⁸ Nemwi munozoziswa pamberi po vatongi, no po majimambo, ngo ndava yangu, kuyita chapupu kwavari no ku majinja.

¹⁹ Asi apo voomupira musazodembatemba kuti munozovereketenyi nokuti kureva kudini; ngokuti kunozopuwa kwomuri ngo nguva iyo, chomunozovereketa.

²⁰ Ngokuti andimwipi munozovereketa, asi mweya wa Baba wenyu unozovereketa uri mukati mwenyu.

²¹ No mukoma unozopira munukuna kuti afe, na ngokudaro baba mwana wavo, no vana vanozomukira vabari, nokuita kuti vaurawe.

²² Nemwi munozonyenywa ndivo vese ngo ndava yo zina rangu. Asi uwo unozoshingirira mbhera kupera, unozoponeswa.

²³ Asi apo vanozomuteverera mu guta rimwe, mwechitizira kuno rimweni; ngokuti ngozvirokwazvo ndinoti kwomuri, amuzopeji kufamba madhoropa ese a Israeri, asati aviya Mwana wo Mundhu.

²⁴ Mujiji aaripi panyezuru po mujijisi wake akadi, no muranda aaripi panyezuru pamambo wake.

²⁵ Kubvira kuno mujiji kuti adari ngo mujijisi wake, no muranda kuti kudari ndi mambo wake. Kuti kudari vakaduja mune wo nyumba kuti Bherizebhuri, vanozopinda kwakaitawani kuvaduja kudaro avo vari vo nyumba yake?

Ndiyani wo tinotya

²⁶ “Ndizvo musavatya! Ngokuti apana chiro chakafishika chisikazopangijihwi; nokuti chakavigika chisikazoziviki.

²⁷ Icho chondinomubvunja mu chidima, chiteketesenyi mukujeka, no icho cho munozwa munjeve chichumairenyi muri panyezuru po chachungu cho nyumba.

²⁸ Musatya avo vanouraya muviri, asi vasina simba ro kuuraya mweya, asi ityanyi uwo uno simba ro kuparaja zvese mweya no muviri mu Gehena.

²⁹ Zvishiri zviviri azvitengeswi ngo kobiro here? No chimwe chazvo achizowi pasi pa mavhu chisikazivi kutendehwa ndi Baba wenyu.

³⁰ Asi no bvuji ro musoro yenyu rakaverengwa rese.

³¹ Ndizvo musatya, muri vanopinda kudikana kuno zvishiri zvakawanda.”

Kutenda nokuti kuramba Kristu

³² “Ndizvo wese uwo unozonditenda pamberi po vandhu, nayevo ndinozomutenda pamberi pa Baba wangu vari mu gore.

³³ Pikija ndiyani unozondiramba pamberi po vandhu, nayevo ndinozomuramba pamberi pa Baba wangu vari mu gore.”

Kuparajana ngo ndava ya Jesu

³⁴ “Musarangarira kuti ndakaviya kuzisa kunyarara mu nyika; andizivi kuviya kuzisa kunyarara, asi shoti.

³⁵ Ngokuti ndakaviya kuparajanisa mundhu na baba wake, mwana wokaji na mayi wake, nyamwana na nyezvara wayo.

³⁶ No vakorore vo mundhu vanozoyita avo vari vo mbhuri yake.

³⁷ Iye unopinda kuda baba dangani mayi kuno inini, aazivi kundisisira. Naye unopinda kuda mwana o rume dangani mwana wokaji kuno inini, aazivi kundisisira.

³⁸ No uwo usikatori muchinjiko wake, atevere sure kwangu aazivi kundisisira.

³⁹ Iye unowana kurarama kwake unozokurasha; no uwo unozorasha kurarama kwake ngo ndava yangu unozokuwana.”

Musharo ngokuyita zvakanaka

⁴⁰ “Iye unomuashira imwimwi unondiashira inini, no uwo unondiashira, unoashira uwo wakandituma.

⁴¹ Iye unoashira muprofeti ngo zina ro muprofeti unozoashira musharo wo muprofeti; no uwo unoashira mundhu wakarurama ngo zina ro mundhu wakarurama unozoashira musharo wo mundhu wakarurama.

⁴² No uwo unozopa kwo umwe wo vadoko ava tsani yo kumwa inotondhora yega, ngo zina ro mujiji zvirokwazvo ndinoti kwomuri, aatongozorashikihwi ngo musharo wake.”