Mateu 1 - NOVO TESTAMENTO EM NDAU

Mibarihwana ya Jesu Kristu

¹ Tshamba yo kubahwa kwa Jesu Kristu, mwana wa Dhavhidha, mwana wa Abrahama.

² Abrahama wakabara Isaka, na Isaka wakabara Jakobe, na Jakobe wakabara Judha, no vanukuna vake.

³ Na Judha wakabara Faresi na Zara ndi Tamari; na Faresi wakabara Esiromi; na Esiromi wakabara Aramu;

⁴ na Aramu wakabara Aminadhabhi, na Aminadhabhi wakabara Nasoni; na Nasoni wakabara Saremona,

⁵ na Saremona wakabara Bhowazi ndi Rahabhi; na Bhowazi wakabara Obhedhi ndi Rute; na Obhedhi wakabara Jesi;

⁶ na Jesi wakabara Dhavhidha wayiva mambo; na Dhavhidha mambo wakabara Soromona ngo mukaji uwo wayiva wa Uriya;

⁷ na Soromona wakabara Robhowami; na Robhowami wakabara Abhiya; na Abhiya wakabara Asafi;

⁸ na Asafi wakabara Josafati; na Josafati wakabara Jorami; na Jorami wakabara Oziya;

⁹ na Oziya wakabara Jotami; na Jotami wakabara Ahazi; na Ahazi wakabara Hezekiya;

¹⁰ na Hezekiya wakabara Manasa; na Manasa wakabara Amoni; na Amoni wakabara Josiya;

¹¹ na Josiya wakabara Jekoniya no vanukuna vake, ngo mukuvo wokutohwa kuenda Bhabhurona.

¹² Ngosure kwokutohwa kuenda Bhabhurona, Jekoniya wakabara Saratieri; na Saratieri wakabara Zorobhabheri;

¹³ na Zorobhabheri wakabara Abhiyudhi; na Abhiyudhi wakabara Eriyakimi; na Eriyakimi wakabara Azori;

¹⁴ na Azori wakabara Zadhoki; na Zadhoki wakabara Akimi; na Akimi wakabara Eriyudhi;

¹⁵ na Eriyudhi wakabara Eriyazari; na Eriyazari wakabara Matani; na Matani wakabara Jakobe;

¹⁶ na Jakobe wakabara Josefa mwamuna wa Mariya, uwo wakazobereka Jesu unozwi Kristu.

¹⁷ Ndizvo rusinga hwese kubvira kuna Abrahama kuguma kuna Dhavhidha uri mibarihwana iri gumi na murongomuna; kubvira kuna Dhavhidha kuguma kwokutohwa kuenda Bhabhurona iri mibarihwana iri gumi na murongomuna; no kubvira kwokutohwa kuenda Bhabhurona mbhera kuguma kuna Kristu iri mibarihwana iri gumi na murongomuna.

Kubahwa kwa Jesu Kristu

¹⁸ Zvino kubahwa kwa Jesu Kristu kwayinga kwakadari: Apo Mariya mayi wake wayinga aemesehwa kuchadha na Josefa, vasati vasongana, iye wakavoneka uno mimba yo Mweya Wakachena.

¹⁹ Na Josefa mwamuna wake ngokuti wayiva mundhu wakarurama, asikadi kuti amupsheruje, wayida kuti amurambe ngo kufishika.

²⁰ Kwakati acharangarija ndizvo, vonayi, ngirosi ya Mambo yakavoneka kwaari ngo kurota, yechiti: Josefa, iwewe mwana wa Dhavhidha, usatya kutora Mariya mukaji wako; ngokuti mimba iyo yaanayo iri yo Mweya Wakachena.

²¹ Unozobereka mwana worume; newe unozodura zina rake 18 kuti Jesu; ngokuti ndiye unozoponesa vandhu vake kubva kuzvishaishi zvavo.

²² Zvino izvi zvakaitika kuti zvizarisike izvo zvakavereketwa ndi Mambo kubudikija ngo muprofeti, echiti:

²³ Vonanyi, mbhandwe inozoyita mimba, ibereke mwana, navo vanozodura zina rake kuti Emanueri; izvo zvinoti kuti, Mwari unesu.

²⁴ Na Josefa amuka muhope wakayita kudari ngo kuvereketa kwo ngirosi ya Mambo, wakatora mukaji wake;

²⁵ naye aazivi kusongana naye mbhera wakazobereka mwana: Naye wakadura zina rake kuti Jesu.