Marku 9 - NOVO TESTAMENTO EM NDAU

¹ Wakati kwavari: “Ngozvirokwazvo ndinoti kwomuri, varipo vamweni veavo vanoyima pano, vasikazozwi kufa mbhera vavone Umambo hwa Mwari hwechiviya ngo simba.”

Kutsandujwa kwa Jesu

² Ngosure kwo mazuva matandhatu Jesu wakatora naye Pedru, na Jakobe, na Johani, wakakwira navo panyezuru po dundhu rakareba, vari vega, naye wakatsandujwa pamberi pavo.

³ No zvokusimira zvake zvakan'anikira zvikachena kuti mbembe; kwokuti akuna musuki mu nyika ungaita kuti zvichene kudaro.

⁴ Kwakavoneka kwavari Erija na Mosi, vechivereketa na Jesu.

⁵ Na Pedru wakati kuna Jesu: “Rabhi, zvakanaka kuti tigare pano, ngatitoite zvitumba zvitatu; chimwe chako, chimwe cha Mosi, no chimweni cha Erija.”

⁶ Ngokuti iye wayinga echikachazivi kuti ungavereketenyi; ngokuti vakakarukiswa ngo kutya.

⁷ Kwakaviya gore rakavafukija; rakazwika izwi rechibva mu gore rechiti: “Uwu ndiye Mwana wangu unodikana; muzwenyi imwimwi.”

⁸ Paripo no varingaringa avazivi kuvona mundhu, kwega Jesu navo.

⁹ Vechibzuka kubva pa dundhu, wakavapangisisa kuti vasazobvunja mundhu izvo zvavayinga vavona, mbhera Mwana wo Mundhu azomukazve kubva kwo vakafa.

¹⁰ Navo vakaringwarira izwi iro, vaibvunjisana pakati pavo kuti kunotinyi kumuka kwo vakafa.

¹¹ Vakamubvunjisa, vechiti: “Ngenyi vatari vanoti, kunosisira kuti Erija atange kuviya?”

¹² Wakati kwavari: “Ngozvirokwazvo Erija unotanga kuviya, amusijire zvese; na ngo njira yo zvakatahwa ndiye Mwana wo Mundhu kuti atambujike ngo zviro zvakawanda nokuti areruswe.

¹³ Asi inini ndinoti kwomuri, kuti Erija wakatoviya, navo vakayita kwaari zvevakada, kudari ngo zvakatahwa ndiye.”

Jesu unorapa mundhu uno mabzoka

¹⁴ Naapo vaguma kuna vajiji vakavona mbungano huru yakavaunganira, no vatari vechivabvunjisa.

¹⁵ Paripo mbungano yese yakamuvona yakashamiswa kakurutu, yakagogoma kuviya kwaari, yakamuchungamija.

¹⁶ Wakavabvunjisa, kuti: “Ichinyi chomunobvunjisa kwavari?”

¹⁷ Umwe wo mbungano wakamupingura, wakati: “Mujijisi, ndazisa mwana wangu kwouri uno mweya wo umbeveve.

¹⁸ Naapo womubata unomuwisira pasi; naye unobudisa mafuro, echikwetsana mazino, echiperezeka: Neni ndakavereketa kuno vajiji vako kuti vaumbirimbije, asi avazivi kukona.”

¹⁹ Naye wakapingura, wakati kwavari: “A! Mubarihwana usikatendi ndinozogara nemwi nguva yakadini? Ndinozomusengerera mukuvo wakaitawani? Muzisenyi kwendiri.”

²⁰ Vakamuzisa kwaari; naamuvona, paripo mweya wakamusukumija kakurutu; naye wakawa pasi pa mavhu, wakaburukuta echibudisa mafuro.

²¹ Wakabvunjisa baba wake, kuti: “Mukuvo wakadini wechiyita kudari kwaari?” Navo vakati: “Kubvira paudoko hwake.

²² No mukuvo mizhinji wakamukhandira mu muriro no mu kumwa kuti umuuraye; asi kudari uno simba rokuyita chiro tiyitire nyasha, utibesere.”

²³ Jesu wakati kwaari: “Kudari wechitenda, zvese zviro zvingaitiwa kwaari unotenda.”

²⁴ Paripo baba vo mwana vakadanijira, vakati: “Ndinotenda; besera kutama kutenda kwangu.”

²⁵ Jesu naavona kuti mbungano yaigogoma kuviya pamwepo, wakathusa mweya wakashata, echiti kwouri: “Iwewe mweya wo umbeveve no wo mandondo, ndinokupanga kuti ubude kubva kwaari, usatongozonghwinazve kwaari.”

²⁶ Nawo wakamima, no kumusukumija kakurutu, wakabuda kubva kwaari; no mwana uwo wakayita kudari ngo watofa, kwokuti vazhinji vavo vakati: Watofa.

²⁷ Asi Jesu wakamubata ngo nyara, wakamumusa; naye wakamuka.

²⁸ Naapo wakanghwina mu nyumba, vajiji vake vakamubvunjisa vari vega, vechiti: “Isisu atizivi kukona ngenyi kuumbirimbija?”

²⁹ Wakati kwavari: “Uwu ruji arungabudi ngo chiro chimweni kwega ngo kukumbira.”

Jesu unovereketazve ngo kufa no kumuka kwake

³⁰ Vakabvapo, vakakhirira ngo mu Garire; iye aazivi kuda kuti mundhu ariwese azvizive.

³¹ Ngokuti waijijisa vajiji vake, echiti kwavari: “Mwana wo Mundhu unozopihwa mu nyara jo vandhu, navo vanozomuuraya, naapo aurawa, ngosure kwo mazuva matatu unozomuka.”

³² Asi avazivi kuzwisisa izwi iro, vakatya no ku mubvunjisa.

Ndiyani unozova mukuru

³³ Vakaguma Kaperanaume, apo vaapanyumba wakavabvunjisa, kuti: “Ichinyi chomwaikanijana ndicho mu njira?”

³⁴ Navo vakanyarara ngokuti vayinga vechikanijana mu njira kuti ndiyani uri mukuru.

³⁵ Naapo vagara pasi, wakadanija kwaari vari gumi na vaviri, wakati kwavari: “Pikija ndiyani unoda kuyita wokutanga ngaaite chigumisihwa kwavari vese, no muranda wavo vese.”

³⁶ Naye wakatora mwana mudoko, akamuimisa pakati pavo; wakamutakura mu nyara jake, wakati kwavari:

³⁷ “Pikija ndiyani unozoashira umwe wo avo vadoko vakadari ngo zina rangu, unondiashira inini; no uwo unondiashira inini aandiashiri akadi asi uwo wakandituma.”

Uwo usikarwi nesu ngo wedu

³⁸ Johani wakati kwaari: “Mujijisi, takavona umwe waimbirimbija mabzoka ngo zina rako; uwo inga asikateveri nesu, takamurambisa ngokuti inga asikateveri nesu.”

³⁹ Asi Jesu wakati: “Muchamurambisa; ngokuti akuna mundhu ungaita mushando mukuru ngo zina rangu, ungakonazve kuvereketa zvakashata ndini.

⁴⁰ Ngokuti uwo usikarwi nesu unotirwira isisu.

⁴¹ Pikija ndiyani unozomupa mukheyo wo kumwa yo kumwa, ngo ndava yokuti muri va Kristu, ngo zvirokwazvo ndinoti kwomuri, kuti aazorashikihwi ngo muripo wake.”

Kurega kutora vamweni kuti vashaishe

⁴² “Pikija ndiyani unozoshaishisa umwe wo ava vadoko vanonditenda, kunopinda kunaka kwaari kuti gwiyo guru risungihwe mumusipa mwake akhandihwe mu jombe.

⁴³ Kudari nyara yako yechikushaishisa, itemei; ngokuti kwakapinda kunaka kwouri kuti unghwine mukururama uri chirema, kuno kuti uno nyara mbiri unghwine mu Gehena, mu muriro usikajimi.

⁴⁴ Apo poisikafi honye yavo, no muriro aujimi.

⁴⁵ Kudari tshoka yako ikakushaishisa, itemei; ngokuti kwakapinda kunaka kwouri kuti unghwine mukururama wechithobinya, kuno kuti unotshoka mbiri ukandihwe mu Gehena.

⁴⁶ Apo poisikafi honye yavo, no muriro aujimi.

⁴⁷ Kudari jiso rako rechikushaishisa, ribvite: Ngokuti kwakapinda kunaka kwouri kuti unghwine mu Umambo hwa Mwari uno jiso rimwe, kuno kuti uno majiso maviri ukandihwe mu Gehena:

⁴⁸ Apo poisikafi honye yavo, no muriro aujimi.

⁴⁹ Ngokuti mundhu wese unozorungwa ngo muriro, no mudiro wese unozorungwa ngo munyu.

⁵⁰ Munyu wakanaka, asi kuti munyu warasha kunaka kwawo, unozorungwa ngenyi? Garanyi muno munyu mukati mwenyu, mugarisane zvakanaka umwe no umweni.”