Marku 7 - NOVO TESTAMENTO EM NDAU

Chirovejeso cho vokare

¹ Vafarisi no vatari vakatikuti vakabva Jerusarema vakaungana kwaari.

² Vakavona kuti vamweni vo vajiji vake vaiha zvimanda ngo nyara jino svina, ukwo kunoti, jisikazivi kushambwa.

³ Ngokuti vafarisi, no vajudha vese, avahi vasikazivi kunasa kushamba kakurutu nyara javo, ngo kuteveja chirovejeso cho vasharuka;

⁴ naapo vobva ku musika, avahi kudari vasikazivi kushamba. No zvimweni zvirovejeso zvizhinji zviripo zvovakaashira kuzvingwarira, kudari ngo kusuka mukheyo, no mbende, no ndiro jo simbi no mubhedhi.

⁵ Vafarisi no vatari vakamubvunjisa, kuti: “Vajiji vako avateveri ngenyi zvirovejeso zvo vasharuka, asi vanoha zvimanda ngo nyara jino svina?”

⁶ Wakati kwavari: “Isaya wakanasa kuprofeta ndimwi, imwimwi vajiitisi, kudari ngo zvakatahwa, kuti: Ava vandhu vanondireremeja ngo miromo yavo, asi mwoyo yavo iri ndhambo neni.

⁷ Asi vanopera nguva kundidira, vechijijisa zvirovejeso zvo vandhu kunonga zviri zvijijo kwazvo.

⁸ Munoregera mipango ya Mwari mwobatirira zvirovejeso zvo vandhu.”

⁹ Wakati kwavari: “Munoramba mipango ya Mwari kuti mubatirire zvirovejeso zvenyu.”

¹⁰ Ngokuti Mosi wakati: “Reremeja baba wako na mayi wako; naye anotuka baba nokuti mayi ngaatongehwe kufa.

¹¹ Asi imwimwi munoti: Kudari mundhu echiti kuna baba wake nokuti kuna mayi wake, icho cho wayida kuviihwa ndicho kwendiri chiri Korbani, ukwo kunoti, chakapihwa kuna Mwari.

¹² Ngokudaro amuchamutenderi kuti aitire chiro kuna baba nokuti mayi.

¹³ Ngokudaro munoita kuti izwi ra Mwari riite risina shwiro ngo ndava yo zvirovejeso zvenyu, zvo mwakaashijana no majibaba enyu. No zvimweni zvizhinji zvakadaro zvomunoita.”

Ichinyi chinosvipisa vandhu

¹⁴ Wakadanijazve mbungano kwaari, wakati kwoiri: “Ndizwenyi imwimwi mwese, muzwisise.

¹⁵ Apana chiro chinobva ngo kunja kwo mundhu chechinghwina mukati mwake chingamusvipisa, asi izvo zviro zvinobva mukati mwo mundhu, ndizvo zvinomusvipisa.

¹⁶ Uwo uno njeve jo kuzwa ngaazwe.”

¹⁷ Apo wanghwina mu nyumba kubva kuno mbungano, vajiji vake vakamubvunjisa ngo muezaniso uwu.

¹⁸ Naye wakati kwavari: “Na imwimwivo amuzwisisi here? Amuvoni here kuti pikija chinyi chinobva ngo kunja chinonghwina mu mundhu achingakoni kumusvipisa;

¹⁹ ngokuti achinghwini mu mwoyo mwake, asi mu ndani mwake, chechibudiswa mushango? Ngokudaro zvakacheneswa zvokuha zvese.”

²⁰ Wakati: “Icho chinobuda kubva ku mundhu, ndicho chinomusvipisa.

²¹ Ngokuti mukati mu mwoyo yo vandhu kunobuda mikarakajo yakashata, kuhura,

²² kuba, kuuraya, kuomba, umbata, unbvuja, kuchengeja, umbhombo, kuchochotora, kutuka, kujikuja, upenji.

²³ Zvese izvi zviro zvakashata zvinobuda kubva ngo mukati, ndizvo zvinosvipisa mundhu.”

Kugonda kwo mujimayi wo Kenani

²⁴ Wakamuka kubvapo, wakaenda kumigano yo Tire no Sidhoni. Wakanghwina mu nyumba, asayida kuti azivikanwe ngo mundhu; asi aazivi kukona kuti afishike.

²⁵ Paripo jimayi rayiva no mwana wo musikana waro mudoko wayiva no mweya wakashata; razwa ndiye, rakaguma rikawira patshoka jake.

²⁶ Zvino jimayi iro rayiva muGiriki, ngo kubahwa rayiva muSurofonikia. Naro rakamupota kuti ambirimbije bzoka kubva ku mwana wo musikana waro.

²⁷ Iye wakati kweriri: “Vana ngavagutiswe kutanga, ngokuti akusisiri kutora chimanda cho vana no kuchikandira kuzviimbhwa.”

²⁸ Asi rakapingura, rikati kwaari: “Eya Mambo; zviimbhwa zvinoha pasi po thafura matshekeneswa wo vana.”

²⁹ Wakati kweriri: “Ngo ndava yo izwi iri, enda bzoka rabuda kubva ku mwanasikana wako.”

³⁰ Rakaenda ku nyumba yaro, rakavona mwana wakarajikwa pa mubhedhi, no bzoka rayinga rabuda kubva kwaari.

Kurapwa kwo nyamandondo wayiva mbeveve

³¹ Jesu wakabudazve kubva kumigano yo Tire, wakapinda ngo Sidhoni mbhera kuguma ku jombe ro Garire, pakati po migano yo nyika yo Dhekapori.

³² Vakazisa kwaari umwe wayiva no mandondo naarizve mbeveve; navo vakamupota kuti adire nyara jake panyezuru pake.

³³ Naamutora ari ega kubva pakati po mbungano, wakadira zvikunwe zvake munjeve jake, wakapfira mata, wakapshasa rurimi wake.

³⁴ Naaringira mu gore, wakafemeruka, wakati kwaari: “Efata,” ukwo kunoti: “Bewuka.”

³⁵ No njeve jake jakabewuhwa, no musungo wo rurimi wake wakasununguka, naye wakavereketa zvinozwika.

³⁶ Iye wakamupanga kuti vasazobvunja mundhu: Asi echinyanya kuvapanga vakanyanyisavo kuzviteketesa.

³⁷ Navo vakashamiswa kakurutu, vechiti: “Iye wakayita zvese kuti zvinake; anoita kuti vano mandondo vazwe, no mbeveve kuti jiverekete.”