Marku 6 - NOVO TESTAMENTO EM NDAU

Jesu unorambwa mu Nazaretha

¹ Wakabuda kubvapo, wakaguma mu nyika yake; no vajiji vake vakamutevera.

² Naapo sabatha raguma wakatanga kujijisa mu nyumba yo kudira; no vazhinji vechimuzwa vakashamiswa, vakati: “Zvinobva kwapi izvi kuno mundhu uwu? Nokuti kungwara kwakadini kwakapuwa kuno mundhu uwu? No mishamiso yakakura yakadari inoitwa ngo nyara jake?

³ Uwu andiyepi here mutsetsi? Mwana wa Mariya, hama ya Jakobe, na Jose, na Judha na Simoni? No hanzvaji jake ajiri pano nesu here?” Navo vakapsherujwa ndiye.

⁴ Jesu wakati kwavari: “Muprofeti aaregi kureremejwa asi kwega mu nyika yake, no kuhama jake, no mu nyumba yake.”

⁵ Naye aazivi kukona kuyita mishando ino simba apo, kwega wakadira nyara jake panyezuru po vandhu vashomani vaihwara, wakavarapa.

⁶ Wakashamiswa ngokutama kutenda kwavo. Naye wakafambafamba mu maguta avo, echijijisa.

Jesu unotuma Vapostori

⁷ Wakadanija kwaari vari gumi na vaviri, wakatanga kuvatuma vaviri-vaviri; naye wakavapa simba rokukurira mweya ino svina.

⁸ Wakavapanga kuti vasazotora chiro, pahwendo hwavo, asi mudondoro wega; vasatora chimanda nokuti nyede, nokuti mare muzvikwama zvavo;

⁹ asi kuti vasimire magwada vasazosimirazve mabhachi maviri.

¹⁰ Wakati kwavari: “Nokuti mu nyumba iriyese yomunozonghwina, garanyi apo mbhera mubvepo.

¹¹ Pikija ngo yapi ndau yo musikazoashihwi, nokuti kupurukihwa mwoobvapo phumbujanyi bukuta pasi potshoka jenyu kuti riite chapupu ndivo.”

¹² Vakabuda, vakaenda; vakachumaira kuti vandhu vatenderuke.

¹³ Vakambirimbija mabzoka mazhinji, vakazoja ngo mafuta vazhinji vaihwara, vakavarapa.

Kufa kwa Johani Mubhapatisi

¹⁴ Mambo Herodhi wakazvizwa; ngokuti zina ra Jesu inga rateketeswa wakati: “Johani Mubhapatisi wamuka kwo vakafa, ndizvo mishando iyi ino simba inoshandwa ndiye.”

¹⁵ Asi vamweni vakati: Ndi Erija. No vamweni vakati: Muprofeti, nokuti umwe wo vaprofeti.

¹⁶ Asi Herodhi azwa, wakati: “Ndi Johani uwo wondakagura musoro, wamukazve kwo vakafa.”

¹⁷ Ngokuti uwu Herodhi wayinga wakatuma kumubata Johani, no kumusunga mu guniya, ngo ndava ya Herodhiasi mukaji wa Firipi munukuna wake; ngokuti iye wakamutora.

¹⁸ Ngokuti Johani wayinga wakati kuna Herodhi: “Akutendehwi kwouri kuti utore mukaji wo munukuna wako.”

¹⁹ Na Herodhiasi waimuzonda, wayiva no chidisiso chokumuuraya; asi wakakonehwa.

²⁰ Ngokuti Herodhi waimutya Johani, echiziva kuti wayiva mundhu wakarurama, wakacheneswa; wakamungwarira. Apo amuzwa, wakatambujika kakurutu; asi waimuzwa ngo kudakara.

²¹ Kwaguma zuva rakanaka, apo Herodhi ngo zuva rokubahwa kwake wakaitira dhiri ndhunge jake, no nduna jake, no vakuru vo Garire;

²² mwana wokaji wa Herodhiasi, wakanghwina wakatamba, wakamudakajisa Herodhi, naavo vaigara naye pakuha; na mambo wakati kuno musikana: “Kumbirai kwendiri pikija ichinyi chounoda, neni ndinozokupa.”

²³ Naye wakapika, kwaari, kuti, pikija ichinyi chounozokumbira kwendiri ndinozochipa kwouri, pikija bindikati ro umambo hwangu.

²⁴ Wakabuda, wakati kuna mayi wake: “Ndokumbirenyi?” Naye akati: “Musoro wa Johani Mubhapatisi.”

²⁵ Paripo wakanghwina kuna mambo ngo kukasira, wakakumbira, wakati ndinoda kuti undipe zvinopano mundiro musoro wa Johani Mubhapatisi.

²⁶ Na mambo wakasvipa mwoyo kakurutu, asi ngo ndava yo mbhiko jake, no ndava yo avo vaigara naye pakuha, aazivi kukona kumurambira.

²⁷ Paripo mambo wakatuma socha repfumo rake, akapanga kuti uziswe musoro wake; naro rakaenda rikagura musoro wake ari mu guniya,

²⁸ vakazisa musoro wake uri mundiro, wakapa musikana; no musikana wakaupa kuna mayi wake.

²⁹ Naapo vazwa vajiji vake, vakaviya, vakatora muviri wake, vakauviga mu guva.

Jesu unopekeja zvokuha mbungano

³⁰ No vapostori vakaungana kuna Jesu, vakaverenga kwaari zvese zvovakaiita, no zvavayinga vajijisa.

³¹ Naye wakati kwavari: “Viyanyi imwimwi muri mwega pandau iri yoga, mumbozorora padoko.” Ngokuti vazhinji vaiviya no kuenda, navo vayinga vasina no nguva yo kuha.

³² Navo vakaenda, ngo ngarava ku ndau iri yoga, vari vega.

³³ No vandhu vakavavona vechienda, no vazhinji vakavaziva, vakagogoma ngo tshoka vechibva ku madhoropa ese, navo vakavatangira kuguma.

³⁴ Naabuda, wakavona mbungano huru, wakatambujika ngo ndava yayo, ngokuti yayinga yakadari ngo mabvuta asina muhavisi, naye wakatanga kuijijisa zviro zvizhinji.

³⁵ Apo zuva rooda kubira vajiji vake vakaviya kwaari vechiti: “Pano indau iri yoga no zuva roda kubira;

³⁶ vaenekesei kuti vaende mundharaunda no mumamuzi, vajitengere zvokuha.”

³⁷ Asi iye vakapingura, wakati kwavari: “Vapenyi imwimwi, zvokuha.” Navo vakati kwaari: “Tinozoenda here isisu tivatengere zvimanda zvemazana maviri (200) osirivha, tivape kuti vahe?”

³⁸ Asi iye wakati kwavari: “Muno zvimanda zvingana? Endanyi muvone.” Naapo vazviziva, vakati: “Zvishanu no hove mbiri.”

³⁹ Wakavapanga kuti vese vagare pasi ngo zvikwata-zvikwata panyezuru po mwenje muvishi.

⁴⁰ Navo vakagara pasi ngo zvikwata zvo mazana, no zvo makumi mashanu.

⁴¹ Naatora zvimanda zvishanu no hove mbiri, wakaringira mu gore, wakazvibonga; wakagura zvimanda wakazvipa ku vajiji kuti vadire pamberi pavo; no hove mbiri wakajikovanisira vese.

⁴² Navo vese vakaha; vakaguta.

⁴³ Vakabojera matshekeneswa akazara zvitengu gumi na zviviri, no zvo hove.

⁴⁴ Avo vakaha zvimanda vayinga vanarume vari zviuru zvishanu (5.000).

Jesu unofamba panyezuru po kumwa

⁴⁵ Paripo wakavangirija vajiji vake kuti vapakire mu ngarava no kutungamira kuenda mwombera ku Bhetisaidha, iye ambhwine echieneka mbungano.

⁴⁶ Naapo avaeneka wakaenda, pa dundhu kwookumbira.

⁴⁷ Kwoita madekoni, ngarava yayinga iri pakati po jombe, naye wayiva ega pa nyika.

⁴⁸ Echivavona vechitambujika ngo kubvutha, ngokuti mbhepo yaita maringwa navo; kunonga murindo wo china wo usiku, iye wakaguma kwavari, echifamba ngo panyezuru po jombe. Wayida kuvapindirija.

⁴⁹ Asi avo vechimuvona echifamba ngo panyezuru po jombe vakakarakaja kuti rayiva jini, navo vakamima.

⁵⁰ Ngokuti vakamuvona vese, vakatyiswa, paripo iye wakavereketa kwavari, echiti: “Shinganyi ndini; musatya.”

⁵¹ Naye wakapakira mu ngarava mwovaingaro; no mbhepo yakanyarara. Navo vakashamiswa kakurutu mukati mwavo,

⁵² ngokuti avazivi kuzwisisa ngo ndava yo zvimanda, ngokuti mwoyo yavo inga yakakonjiswa.

Jesu unorapa vaihwara mu Genesareta

⁵³ Apo vaambuka mwombera vakaguma ku nyika yo Genesareta, navo vakasungira ngarava mumbhiripiri.

⁵⁴ Naapo vabuda kubva mu ngarava, paripo vandhu veyo vakamuziva,

⁵⁵ navo vakagogoma vo ndharaunda yese, vakatanga kutwara ngo misengere avo vaihwara, kuvadira apo po vakazwa kuti ndipo paari.

⁵⁶ Pikija kwapi kwaainghwina mumamuzi, nokuti mu madhoropa, nokuti mundharaunda, vakavarajika vaihwara pa musika, vakamupota kuti vapshase pikija mupendero wo nguvo yake, navo vese vakamupshasa vakarapika.