Marku 4 - NOVO TESTAMENTO EM NDAU

Muezaniso wo mukushi

¹ Wakatanga kujijisazve ari mumbhiripiri mwo jombe. No mbungano huru yakaungana kwaari, ngokudarokwo wakanghwina mu ngarava, wakagara mu jombe; mbungano yese yaiva mumbhiripiri phedo no jombe.

² Wakavajijisa zvakawanda ngo miezaniso, wakati kwavari mukujijisa kwake:

³ “Purukiranyi; kwakabuda mukushi kookusha.

⁴ Kwakaitika mukukusha kwake kuti jimweni mbewu jakawa panjira, no shiri jakaviya, jakajiha.

⁵ No jimweni jakawa pandau ino mapuwe apo payinga pasina mavhu akawanda; paripo jakamera ngo kukasira, ngokuti inga pasina mavhu mazhinji.

⁶ Kwakati zuva rakabuda jakapsha ngokuti inga jisina miji; jakaoma.

⁷ No jimweni jakawa pakati po minzwa no minzwa yakakura, yakajipshinya, najo ajizivi kubereka michero.

⁸ No jimweni jakawa pamavhu akanaka, jakabereka michero, jechikura, jechiwanda, jakabereka jimweni makumi matatu, jimweni makumi matandhatu, jimweni zana.”

⁹ Naye wakati: “iye uno njeve jo kuzwa ngaazwe.”

Ngo ndava yo muezaniso

¹⁰ Naapo ari ega, no vajiji gumi na vaviri naavo vayiva naye vakamubvunjisa ngo ndava yo muezaniso.

¹¹ Wakati kwavari: “Kwakapuwa kwomuri, kuzwisisa zvakafishika zvo Umambo hwa Mwari, asi kwavari avo vari kunja zvese zvinoitwa ngo muezaniso,

¹² kuti, vechivona vangavona vasikavonesesi; vechizwa vangazwa, vasikazwisisi, kuti pamweni vangatenderuka, no kushaisha kuregerehwe kwavari.”

Jesu unodurujira muezaniso wo mukushi

¹³ Wakati kwavari: “Amuzivi uwu muezaniso here? Munozoyita mazivirenyi miezaniso yese?

¹⁴ Mukushi unokusha izwi.

¹⁵ Ava ndivo vakawa mu njira; apo izwi rakushwa naapo vazwa, paripo unoviya Sathani unobvisa izwi iro rakushwa mukati mwavo.

¹⁶ Ava ngokudaro vakakushwa pa mapuwe; apo vazwa izwi, paripo vanoriashira ngo kudakara;

¹⁷ navo avana miji mukati mwavo, asi vanovangirira nguva doko; asi apo kwaguma kutambujwa nokuti kuteverehwa ngo ndava yo izwi, paripo vanopsheruka.

¹⁸ Naavo vakakushwa pakati po minzwa; ndivo vanozwa izwi,

¹⁹ no kudembatemba kuri mu nyika, no kuchengejwa ngo upfumi, no kuemura kwo zviro zvimweni, zvechinghwina zvinopshinya izwi, naro aribereki michero.

²⁰ Naavo vakakushwa pa mavhu akanaka ndivo vanorizwa izwi, vanoriashira, vanobereka michero, vamweni makumi matatu, vamweni makumi matandhatu, no vamweni zana.”

Muezaniso wo chibani

²¹ Naye wakati kwavari: “Chibani chinoziswa here kuti chidihwe pasi po chitengu, nokuti pasi po mubhedhi, chisikadihwi here paukwiriri hwacho?

²² Ngokuti apana chiro chakafishika chisikazotatijwi pambene, apanazve chiro chakafindara chisikazobudiswi pa kujeka.

²³ Uwo uno njeve jo kuzwa ngaazwe.”

²⁴ Naye wakati kwavari: “Ngwariranyi izvo zvo munozwa. Ngo mupimo wo munopima ndiwo vamweni, munozopimwavo ndiwona, nawo unozoengejehwa kwomuri.

²⁵ Ngokuti kwaari unacho, kunozopuwa kwaari; no kwaari usina, no chaatori nacho chinozobviswa kwaari.”

Muezaniso wo mbewu inokura

²⁶ Naye wakati: “Umambo hwa Mwari hwakadari ngo mundhu unokusha mbewu mu mavhu;

²⁷ naye unovata no kumuka usiku no masikati, no mbewu jinomera jechikura, iye asikazivi njira yo jinomera ndiyo.

²⁸ Mavhu anojibudisira michero ngokwao, kutanga muningwi, kwotevera mutsonzoti, ngosure mbewu inoibva pa mutsonzoti.

²⁹ Naapo mbewu yaibva paripo unotuma vano sikeya, ngokuti kukotora kwaguma.”

Muezaniso wo mbewu yo mustadhi

³⁰ Wakati: “Tinozouezanisa nenyi Umambo hwa Mwari? Nokuti ngowapi muezaniso wo tingauezanisa ndiwo?

³¹ Hwakadari ngo mbhumba yo mustadhi iyo apo yakushwa mu mavhu iri doko kupinda jese mbewu jakasimwa mu nyika;

³² asi apo yakushwa inomera yoita huru kupinda mapfiba ese, inobudisa matavi makuru; kwokuti shiri jese jo mu gore jinovaka zvishaki zvajo pasi po mumvuri wayo.”

³³ Ngo miezaniso yakawanda kudaro wakavereketa izwi kwavari; kudari ngo zvo vaikona kuzwisisa.

³⁴ Aazivi kuvereketa kwavari pasina muezaniso; asi ari ega no vajiji vake, wakavadurujira zvese.

Jesu unonyaraja bepo

³⁵ Ngo iro zuva, apo kwayita madekonyi, wakati kwavari: “Ngatiambuke mwombera.”

³⁶ Vakasiya mbungano, vakaenda naye wakadaro naari mu ngarava. No ngarava jimweni jaivepo naye.

³⁷ Kwakaita bepo guru no mavimbi akadarika echinghwina mu ngarava, kwokuti inga woda kuzaja ngarava.

³⁸ Asi iye wayiva ngosure mu ngarava wakavata pa mutsamiro. Navo vakamumusa, vakati kwaari: “Mujijisi, aukanuki here kuti tinofa?”

³⁹ Naye wakamuka wakathusa bepo, wakati kuno jombe: “Nyarara kuti chowe.” No bepo rakanyarara, kwakavepo kunyarara kukuru.

⁴⁰ Wakati kwavari: “Munotya ngenyi? Amusati mwaano kugonda here?”

⁴¹ Navo vakatya kakurutu, vakati umwe kuno umweni: “Ndizvo uwu ndiyani, kuti bepo no jombe zvinomupurukira?”