Marku 3 - NOVO TESTAMENTO EM NDAU

Mundhu wayiva no nyara yakaoma

¹ Wakanghwinazve mu nyumba yo kudira; kwayivapo mundhu wayiva no nyara yakaoma.

² Navo vakamuringisisa kuvona kuti angazomurapa here ngo zuva ro sabatha, kuti vamuparise ndava.

³ Naye wakati kuno mundhu uwo wayiva no nyara yakaoma: “Mukayi, uime pakati.”

⁴ Wakati kwavari: “Ichinyi chinotendehwa ngo sabatha, kuyita zvakanaka nokuti kuyita zvakashata? Kuponesa nokuti kuuraya?” Asi vakanyarara.

⁵ Naapo ayinga avaringisisa ngo ushungu, echihwajihwa ngo kuchunga kwo mwoyo yavo, wakati ku mundhuwo: “Tambanuja nyara yako.” Naye wakatambanuja, no nyara yake yakarapika.

⁶ Vafarisi vakabuda, paripo vakapangana no vo kwa Herodhi kuti vangamuita maurairenyi.

Mbungano huru inoungana phedo no Jombe

⁷ Na Jesu wakabvapo no vajiji vake, wakaenda ku jombe, no mbungano huru yakabva Garire no yo Judhiya yakamutevera;

⁸ no yo Jerusarema, no yo Idhumiya, no yo mwombera mwo Jordhani, no vanotendeneja Tire no Sidhoni, mbungano huru yechizwa ngo zviro zvikuru zvaakaita, yakazara kwaari.

⁹ Naye wakabvunja ku vajiji vake, kuti vamupshakire ngarava doko ngo ndava yo mbungano, kuti isazomutsikinija,

¹⁰ ngokuti wayinga wakarapa vazhinji; kwokuti vese avo vayiva no ndhenda vaindundana kuti vamupshase.

¹¹ No mweya ino svina apo yamuvona, yakawa pamberi pake, ikamima yechiti: “Iwewe uri Mwana wa Mwari.”

¹² Naye wakainyaraja kakurutu kuti isazoita kuti azivike.

Vapostori vari gumi na vaviri

¹³ Wakakwira pa dundhu, wakadanija kwaari avo vaakasana, navo vakaviya kwaari.

¹⁴ Wakaemesa vari gumi na vaviri kuti vagare naye, nokuti, avatume kuenda koochumaira.

¹⁵ Wakavapa simba ro kumbirimbija mabzoka.

¹⁶ Wakaduja Simoni kuti Pedru;

¹⁷ wakaduja Jakobe mwana wa Zebhedhi na Johani munukuna wa Jakobe kuti Boanergesi, zvinonanga kuti: Vana vo mbheni.

¹⁸ Andreu, na Firipi, na Bhartoromeu, na Mateu, na Tomasi, na Jakobe mwana wa Arifeu, na Tadheu, na Simoni muKenani,

¹⁹ na Judhasi Isikariyoti, uwo wakamupira.

Jesu na Sathani

²⁰ Naye wakanghwina mu nyumba. No mbungano yakaunganazve kwokuti vakakonehwa no kuha zvimanda.

²¹ Naapo hama jake jazwa jakabuda kuviya koomubata; ngokuti vakati: Unohahamuka.

²² No vatari, avo vakabzuka kubva Jerusarema, vakati: “Uno Bheezebhuri, na ngo simba ro muzvare wo mabzoka unombirimbija mabzoka.”

²³ Naye wakavadanija, wakavereketa kwavari, ngo muezaniso wakati: “Sathani ungaita mambirimbijirenyi Sathani?

²⁴ No kudari umambo hwechijiparaja ngo kwahwo, uhwo umambo ahungakoni kuyima.

²⁵ No kudari ukama ukajiparaja ngokwawo, ukama uwo aungakoni kuyima.

²⁶ No kudari Sathani echijimukira, echijiparaja, aangakoni kuyima, asi unozopera.

²⁷ Asi apana mundhu angakona kunghwina mu nyumba yo uwo uno simba, no kuba mujiyo jake, kuti asikazivi kutanga kusunga uwo uno simba; naapo unozoparaja nyumba yake.

²⁸ Zvirokwazvo ndinoti kwomuri, kuti, zvishaishi zvese, no kutuka kwese kwovanozotuka ndikwo, zvinozoregerehwa ku vandhu.

²⁹ Asi pikija ndiyani unozotuka Mweya Wakachena, aazoregerehwi asi uno ndava yo chishaishi cho mbhera narini.”

³⁰ Ngokuti ivo vakati: “Uno mweya une svina.”

Ukama wa Jesu

³¹ Kwakaviya mayi wake no hama jake, vakayima ngo kunja, vakatumira kwaari kumudanija.

³² No mbungano yayinga yakagara naye, yakati kwaari: “Vonayi mayi wako no vanukuna vako no hanzvaji jako vari kunja vanokupshaka.”

³³ Naye wakapingura kwavari, akati: “Ndiyani mayi wangu, no hama jangu?”

³⁴ Echiringira kuno avo vayinga vakamutendeneja, wakati: “Vonanyi mayi wangu no vanukuna vangu.

³⁵ Ngokuti ndiyani unozoyita kuda kwa Mwari uwo ndiye munukuna wangu, no hanzvaji yangu, na mayi wangu.”