Marku 2 - NOVO TESTAMENTO EM NDAU

Kurapwa kwo mundhu wayioma divi ro muviri

¹ Naapo ayinga wanghwinazve mu Kaperanaume, ngosure kwo mazuva akatikuti, kwakazika kuti ari mu nyumba.

² Vazhinji vakaungana pamwepo, kwokuti pakatamika no ndau pikija no pamusuvo, naye wakachumaira izwi kwavari.

³ Navo vakaguma kwaari vaitwara mundhu waioma divi ro muviri akatwahwa ngo varongomuna.

⁴ Vechikonehwa kukwedera kwaari ngo ndava yo mbungano, vakabweshura denga ngo paayivapo, naapo wakabewura, vakabzusa musengere panyezuru pawo payivata uwo waihwara ngo kuoma muviri.

⁵ Jesu naavona kutenda kwavo, wakati kuno uwo waihwara ngo kuoma muviri: “Mwana, zvishaishi zvako zvaregerehwa.”

⁶ Asi vayiapo vatari vakatikuti vakagara, vechijibvunjisa mu mwoyo yavo:

⁷ Kuti, uwu unovereketa kudari ngenyi? Unotuka Mwari, ndiyani unokona kuregerera mundhu zvishaishi, asi Mwari ega?

⁸ Paripo Jesu echiziva mu mweya mwake kuti vaijibvunjisa zvakadaro mukati mwavo, wakati kwavari: “Munojibvunjisa ngenyi izvi mu mwoyo mwenyu?

⁹ Ichinyi chakapinda kureruka, kunanga kuno uwo unohwara ngo kuoma muviri kuti: Zvishaishi zvako zvaregerehwa; nokuti, kunanga kuti: Mukayi, utore mandhi ako, ufambe?

¹⁰ Asi kuti muzive kuti Mwana wo Mundhu uno simba mu nyika ro kuregerera zvishaishi, wakati kuno uwo unohwara ngo kuoma muviri,

¹¹ ndinoti kwouri, Mukayi, utore mandhi ako uende ku nyumba yako.”

¹² Naye wakamuka, paripo akatora mandhi ake, akabuda kunja pamberi pavo vese; kwokuti, vese vakashamiswa kakurutu, vakamuirikija Mwari, vechiti: “Atito tavona zvakadari.”

Jesu unodanija Revhi

¹³ Naye wakabuda kuendazve ku jombe; mbungano yese yakaviya kwaari, naye wakaijijisa.

¹⁴ Achipinda wakavona Revhi mwana wa Arifeu wakagara panoshabiswa, naye wakati kwaari: “Nditevere. Naye wakamuka, wakamutevera.”

¹⁵ Kwakaitika kuti apo wakagara pakuha mu nyumba mwake, vashabisi no vashaishi vazhinji vakagara pasi na Jesu no vajiji vake; ngokuti vayiva vazhinji, naavo vaimutevera.

¹⁶ Vatari no vafarisi novavona kuti waiha no vashaishi no vashabisi vakati kuno vajiji vake: “Ngenyi unoha no kumwa navo vashabisi no vashaishi?”

¹⁷ Naapo Jesu azwa, wakati kwavari: “Asipi vakavanga vanoda murapi, asi avo vanohwara, andizivi kuviya kudanija vandhu vakarurama, asi vashaishi.”

Ngo ndava yo kuera kuha

¹⁸ Vajiji va Johani no vafarisi vayinga vechiera kuha; navo vakaviya vakati kwaari: “Ngenyi vajiji va Johani no vafarisi vanoera kuha asi vajiji vako avaeri?”

¹⁹ Jesu wakati kwavari: “Vana vanyamurovohwa vanoera here kuha mukwambo echinavo? Mukuvo wovanaye mukwambo avazoeri kuha.

²⁰ Asi mazuva anozoviya apo mukwambo unozobviswa kubva kwavari, naapo vanozoera kuha ngao mazuva.

²¹ Apana mundhu unosonera chiremo chipsha panyezuru po nguvo yakasakara; kuti zvakadaro ichi chipsha chakasonehwa apo chinozomwesa jira rakasakara, rinozomweka kwakapinda kushata kunozoitika.

²² Akuna mundhu unodira vhini ibza munyede jo vhini jakasakara; kuti zvakadaro, vhini rinoputisa nyede, no vhini rinozorashika, pamwepo no nyede; asi vhini ibza rinodihwa munyede ipsha.”

Jesu no sabatha

²³ Kwakaitika ngo zuva ro sabatha, apo echipinda ngo mu munda wo koroni kuti vajiji vake vakatanga kupurura musoso vechifamba.

²⁴ Vafarisi vakati kwaari: “Ringira, vanoyita ngenyi ngo zuva ro sabatha icho chisikatendehwi?”

²⁵ Wakati kwavari: “Amuzivi kutongojija here icho chaakaita Dhavhidha, apo waitama, wayiva no njara, iye naavo vayiva naye?

²⁶ Kuti wakanghwina mu nyumba ya Mwari ngo mazuva a Abhiyatari mupristi mukuru, wakaha zvimanda, izvo zvisikatendehwi kuhiwa, asi ngo vapristi vega, akazvipazve kwavari avo vayiva naye?

²⁷ Wakati kwavari: sabatha rakaitihwa mundhu, mundhu, aavazivi kuitihwa sabatha.

²⁸ Ndizvo Mwana wo Mundhu ndi mambo wo sabatha.”