Marku 16 - NOVO TESTAMENTO EM NDAU

Kumuka kwa Jesu mwo vakafa

¹ Naapo sabatha rapinda, Mariya Magadhareni, na Mariya mayi wa Jakobe na Sarome, vakatenga mafuta okunuhira, kuti vaende vamuzoje.

² Mangwanani mavishi ngo zuva ro kutanga ro vhiki vakaguma ku guva zuva roobuda.

³ Navo vaiti pakati pavo: “Ndiyani unozotimburumbujira buwe pamusuvo wo guva?”

⁴ Navo varingira kuti pebvu vakavona kuti buwe rayinga ramburumbujwa; ngokuti rayinga rakakurisisa.

⁵ Naapo vanghwina mu guva, vakavona murumbwana wakagara ngo kumuho, wakasimira nguvo yakachena, navo vakashamiswa.

⁶ Naye wakati kwavari: “Musashamiswa, munomupshaka Jesu mu Nazaretha uwo wakakohomehwa. Wamuka, amuna muno; ringiranyi po vakamurajika!

⁷ Asi endanyi mubvunje vajiji vake na Pedru, kuti; Anotanga kuenda pamberi penyu mu Garire, kudari ngozvaakavereketa kwomuri.”

⁸ Navo vakabuda, vakatiza kubva pa guva; ngokuti vakagumihwa ngokuhuta no kushamiswa; navo avazivi kubvunja chiro ku mundhu ngokuti vaitya.

⁹ Zvino apo wamuka mangwanani mavishi ngo zuva rokutanga ro vhiki, wakavoneka kutanga kuna Mariya Magadhareni, uwo wakabviswa mabzoka manomwe.

¹⁰ Aye wakaenda, wakabvunja avo vayinga vanaye, vaichumba no kuchema.

¹¹ Navo vazwa kuti unopona, nokuti wayinga wavoneka ndiye, avazivi kutenda.

¹² Ngosure kwo izvi wakavoneka kuna vaviri vavo, uno chiyimo chimweni, vechifamba kuenda kundharaunda.

¹³ Navo vakaenda, vakabvunja kuna vamweni, asi navozve avazivi kutenda.

¹⁴ Ngosure wakavoneka kuna vane vari gumi na umwe wakagara pakuha; naye wakavavereketera ngokutama kutenda kwavo, no kupata kwo mwoyo yavo, ngokuti avazivi kutenda avo vayinga vamuvona ngosure wamuka kubva kwo vakafa.

¹⁵ Naye wakati kwavari: “Endanyi mu nyika jese, muchumaire vhangeri kuna zvisikwa zvese.

¹⁶ Iye unonditenda, wobhapatiswa, unozoponeswa; asi uwo usikatendi unozorashwa.

¹⁷ No iyi mivoniso inozova navo vanotenda: Ngo zina rangu vanozombirimbija mabzoka, vanozovereketa ngo ndimi ipsha;

¹⁸ vanozobata nyoka, pikija vechizomwa chinouraya, achitongozovaremaji; vanozodira nyara panyezuru po vanohwara navo vanozotambiswa.”

¹⁹ Naapo Mambo Jesu, ngosure kokuvereketa navo, wakaashihwa mu gore, wakagara ngo kumuho wa Mwari.

²⁰ Navo vakaenda, vakachumaira ku ndau jese, Mambo echishanda pamwepo navo, echigwinyisa izwi ngo mivoniso yaiva navo.