Marku 15 - NOVO TESTAMENTO EM NDAU

Jesu pamberi pa Piratu

¹ Paripo ngo cho mangwanani vapristi vakuru pamwepo no vakuru no vatari, no makota ese, vakapangana, vakamusunga Jesu, vakamutora, vakamupira kuna Piratu.

² Piratu wakamubvunjisa, echiti: “Iwewe uri mambo wo vajudha here?” Asi iye wakapingura, akati kwaari: “Watonanga.”

³ No vapristi vakuru vakamuitira ndava jakawanda.

⁴ Piratu wakamubvunjisazve, echiti: “Aupinguri chiro here? Ringira kuwanda kwo ndava jovanokuitira.”

⁵ Asi Jesu aazivi kuzopingurazve; kwokuti Piratu wakashamiswa.

Jesu unotongehwa kufa

⁶ Zvino ku mushongano wo kuha waindovasunungurira musungwa umwe uwo wo vaizokumbira.

⁷ Pakati po vasungwa paiva no umwe waizwi Bharabhasi uwo wakasungwa pamwepo naavo vayinga vakamukira, avo mukumukira kwavo vakauraya mundhu.

⁸ No mbungano yechikwireyo, yakatanga kukumbira kuti avaitire kudari ngo chirovejeso chake kwavari.

⁹ Piratu wakapingura kwavari, echiti: “Munoda here kuti ndimusunungurire mambo wo vajudha?”

¹⁰ Ngokuti wakaziva kuti vapristi vakuru vayinga vamupira ngo ndava yo ndurumwa.

¹¹ Asi vapristi vakuru vakakurumijira mbungano kuti avasunungurire Bharabhasi.

¹² Piratu wakapingurazve, akati kwavari: “Ndizvo ndinozoitenyi kwaari uwo womunoti, ndi Mambo wo vajudha?”

¹³ Navo vakamimazve, vechiti: “Mukohomere.”

¹⁴ Piratu wakati kwavari: “Ngenyi? Ichinyi chakashata chaakaita?” Asi vakamima zvikuru, vechiti: “Mukohomere.”

¹⁵ Na Piratu echida kudakajisa mbungano wakavasunungurira Bharabhasi, wakavapa Jesu, ambomurova, kuti akohomehwe.

Masocha anoita jee Jesu

¹⁶ Masocha, akamukweva kuenda mukati mwo dare, umwo muri mu ngome; akakoka pamwepo chikwata chese cho masocha.

¹⁷ Nao akamusimija jira rakapshuka, akapomba junguja ro minzwa, akaridira musoro mwake;

¹⁸ akatanga kumuchungamija, echiti: “Changamire, Mambo wo vajudha!”

¹⁹ Akamurova musoro ngo njanga, akamupfirira mata, akagwadama ngo makokobvi ao, akamudira.

²⁰ Naapo vamuyitira jee, vakakhumura kwaari jira rakapshuka, vakamusimija zvokusimira zvake. Navo vakamukweva kuenda naye kunja kwoomukohomera.

Kukohomehwa kwa Jesu

²¹ Navo vakavangijira umwe waipinda ngaapo Simoni wo Kureni, echibva mundharaunda, baba wa Arixandreu na Rufu, kuti atware muchinjiko wake.

²² Vakamutora kuenda naye ku ndau inozwi Gorogota, iyo inozwi ngo kukumuchwa, ndau yo Dendhenya.

²³ Navo vakamupa vhini rakavhengwa no mure, asi iye aazivi kuriashira.

²⁴ Vakamukohomera, vakapaurirana zvokusimira zvake pakati pavo, vechiringijira hakata kuvona kuti umwe ngaumwe ungatorenyi.

²⁵ Kwayiva nguva yochitatu, yo vakamukohomera.

²⁶ No tshamba yo ndava yake yakatahwa panyezuru, kuti: “MAMBO WO VAJUDHA.”

²⁷ Pamwepo naye kwakakohomehwa majongoni maviri, rimwe ngo kumuho, no rimweni ngo kuboshwe kwake.

²⁸ No matahwa akazarisika awo anoti: Wakaverengwa pamwepo no vapauki.

²⁹ Naavo vaipinda ngaapo vaimutuka, vechidungwaira musoro yavo, vechiti: “Ehee! Iwewe unoparaja themperi no kurivaka ngo mazuva matatu,

³⁰ jiponese, ubzuke kubva pa muchinjiko.”

³¹ Vakadarovo vapristi vakuru vechimuitira jee pakati pavo, no vatari, vechiti: “Wakaponesa vamweni, aangakoni kujiponesa.

³² Ngaabzuke kubva pa muchinjiko, Kristu Mambo wa Israeri kuti tivone, titende.” Naavo vakakohomehwa naye vakamutukavo.

Kufa kwa Jesu

³³ Kubvira ngo nguva yo chitandhatu kwayivapo chidima mu nyika yese, mbhera nguva yo chipfumbamwe.

³⁴ Ngo nguva yo chipfumbamwe, Jesu wakadanijira ngo izwi guru, echiti: “Eloi, Eloi lama sabakatani?” Ukwo kunoti ngo kukumuchwa, Mwari wangu, Mwari wangu, wandisiya ngenyi?

³⁵ Vamweni vakatikuti veavo vayimapo vechimuzwa, vakati: “Vonanyi, unodanija Erija.”

³⁶ Umwe wakagogoma, wakazaja shiponji ngo vhini inoshasha, wakaidira panyezuru po njanga, wakamupa kuti amwe, echiti: “Regeranyi, tivone kuti Erija unoviya here koomubzusa.”

³⁷ Jesu wakadanijira ngo izwi guru, wakafa.

³⁸ No jira ro mu themperi rakaparuka ngo pakati, kubvira ngo panyezuru mbhera pasi.

³⁹ Apo nduna yo zana iyo yayima ngo phedo pake, yavona kuti wafa ngo kudaro yakati: “Ngo gwinyiso uwu wayiva Mwana wa Mwari.”

⁴⁰ Zve kwayivapo majimayi, vairingira vari ngo ndhambo, pakati pavo vayivapo Mariya Magadhareni, na Mariya mayi wa Jakobe mudoko, na Jose, na Sarome.

⁴¹ Avo vakamutevera achiri mu Garire, vechimushandira; no majimayi amweni akawanda, ao vakakwira naye Jerusarema.

Kuvigwa kwa Jesu

⁴² Naapo kwooyita madekoni, ngokuti kwayiva kunasirira, ukwo kunoti, rayiva zuva rinotangira sabatha,

⁴³ Kwakaviya Josefa wo Arimatiya, gota raireremejwa, uwo naye ngokwake waigarira Umambo hwa Mwari, wakanghwina kuna Piratu ngo kushinga, wakakumbira kupuwa muviri wa Jesu.

⁴⁴ Piratu wakashamiswa kuti wayinga wafa, wakadanija kwaari nduna yo zana, wakaibvunjisa kuti watofa here?

⁴⁵ Naapo azwa ngo nduna yo zana kuti wafa, wakapa muviri wake kuna Josefa.

⁴⁶ Naye wakatenga jira ro kuchena, wakamubzusa pasi, wakamupukutira mujira ro kuchena wakamurajika mu guva rakatsetswa pa buwe; wakamburumbuja buwe pamusuvo wo guva.

⁴⁷ Na Mariya Magadhareni na Mariya mayi wa Jose vakavona apo paakarajikwa.