Marku 14 - NOVO TESTAMENTO EM NDAU

Bangano ro kuuraya Jesu

¹ Kwayinga kwasara mazuva maviri kuti zuva ro Phasika no mushongano wo kuha zvimanda zvisina mumera rigume. No vapristi vakuru no vatari vakapshaka kuti vangamuita mabatirenyi ngo urimbwi, vamuuraye;

² ngokuti vakati: “Haiwa ngo pakati po mushongano wo kuha, ngokuti pamweni kungazoita bope pakati po vandhu.”

Jesu unozojwa mafuta mu Bhetani

³ Apo achiri mu Bhetani mu nyumba ya Simoni wayiva no mapere, naakagara panokuha, jimayi rayiva no chimujiyo cho aribhastera cho mafuta onardhi anodhura kakurutu; rakachiphwanya, roadururira mu musoro mwake.

⁴ Asi kwayivapo vamweni vakatikuti vakachamwa pakati pavo, vechiti: “Kwaitihwenyi uku kurashwa kwo mafuta?

⁵ Ngokuti aya mafuta aizotengeswa ngo madhenariyo anoita mazana matatu (300), apuwe varombo.” Vakarin'un'utira.

⁶ Asi Jesu wakati: “Riregerenyi; munoritambujirenyi? Raita mushando wakanaka kwendiri.

⁷ Ngokuti munavo varombo nguva jese, naapo mwechida mungayita zvakanaka kwavari; asi inini andizovi nemwi nguva jese.

⁸ Raita icho cheraikona; razoja muviri wangu usati wachihwa.

⁹ Ngozvirokwazvo ndinoti kwomuri, nokuti ngepari apo porinozochumihwa vhangeri mu nyika jese no ichi choraita iri jimayi chinozoteketeswa kuyita chicherechejiso kweriri.”

Kupira kwa Judhasi

¹⁰ Judhasi Isikariyoti umwe wevari gumi na vaviri, wakaenda ku vapristi vakuru, kuti amupire kwavari.

¹¹ Navo, apo vazwa vakadakara, vakagondisa kumupa mare. Naye wakapshaka nguva kwayo yokuti amupire.

Kuha kwo kugumisira kwa Jesu

¹² Ngo zuva rokutanga rokuha zvimanda zvisina mumera, apo vechibaira Phasika, vajiji vake vakati kwaari: “Unoda kuti tiende kwapi kwoonasirira kuti uhe Phasika?”

¹³ Naye wakatuma vaviri vo vajiji vake, wakati kwavari: Endanyi mu dhoropa, unozosongana nemwi mwanarume wakatwara mbende yo kumwa; muteverenyi;

¹⁴ naapo paanozonghwina munozoti kumune wo nyumba: Mujijisi unoti: “Ririkwapi berere rangu ro vaeni, apo pondinozoha Phasika no vajiji vangu?

¹⁵ Naye ambwine unozomutatijira berere guru ro muturika rakanasirihwa ndizvo zvese; naapo munozotinasirira.”

¹⁶ No vajiji avo vakabuda kuenda, vakaguma ku dhoropa, vakavona kudari ngozvaakananga kwavari, navo vakanasirira Phasika.

¹⁷ Kwakati kwooyita madekoni wakaguma nevanegumi na vaviri.

¹⁸ No vakagara pa thafura vechiha, Jesu wakati: “Ngozvirokwazvo ndinoti kwomuri kuti umwe wenyu unozondipira, uwo anoha neni.”

¹⁹ Navo vakatanga kutambujika, vechiti kwaari umwe nga umwe kuti: “Ndini here?”

²⁰ Wakati kwavari: Ndiumwe wo vari gumi na vaviri, uwo anoseva neni mundiro.

²¹ Ngokuti Mwana wo Mundhu unoenda kudari ngo zvozvakatahwa ndiye, asi ikhombo kwaari mundhuwo Mwana wo Mundhu waanozopihwa ndiye! Kwayiva kwakanaka kwaari mundhuwo kuti kudari asakabahwa.

²² Vachiha wakatora chimanda, wakabonga; wakachigura, akavapa, akati: “Toranyi, ichi muhe chiri muviri wangu.”

²³ Wakatora mukheyo naapo abonga, wakaupa kwavari, navo vakamwa vese ndiwo.

²⁴ Naye wakati kwavari: “Iyi iri ngazi yangu yo chitenderano chipsha, iyo inoparajwa ngo ndava yo vazhinji.

²⁵ Ngozvirokwazvo ndinoti kwomuri, kuti, andichazomwi michero yo mivhini mbhera kuzuva iro rondinozomwa ibza mu Umambo hwa Mwari.”

²⁶ Naapo vaimba nduyo vakabuda kuenda ku dundhu ro Maorivhe.

Jesu unozivisa Pedru

²⁷ Jesu wakati kwavari: Mwese munozopsheruka, ngokuti kwakatahwa, kuti: “Ndinozorova muhavisi, no mabvuta anozoparajika.

²⁸ Asi ngosure kwo kumuswa kwangu ndinozoenda pamberi penyu mu Garire.”

²⁹ Asi Pedru wakati kwaari: “Pikija vese vechizopsheruka, asi haiwa inini.”

³⁰ Jesu wakati kwaari: “Ngozvirokwazvo ndinoti kwouri, kuti: Iwewe nyamasi, ngo usiku uhwu jongwe risati rarira kaviri, unozondiramba katatu.”

³¹ Asi iye wakavereketa ngo simba guru, echiti: “Pikija ndechizofa newe, andizokurambi akadi.” Navo vese vakadarovo.

Jesu unokumbira mu Getsemani

³² Vakaguma ku ndau inozwi Getsemani, naye wakati ku vajiji vake: “Garanyi pano apo ndichakumbira.”

³³ Wakatora naye Pedru na Jakobe na Johani, wakatanga kukaruka no kutambujika kakurutu.

³⁴ Wakati kwavari: “Mweya wangu unotambujika kakurutu mbhera mukufa; garanyi pano, murinde.”

³⁵ Naye wakaenda mberi kadodoko, akawa pasi pamavhu, akakumbira kuti kudari zvingaitika kuti nguva iyi ipinde kubva kwaari.

³⁶ Wakati: “Abha, Baba, zvese zvinoitika kwouri; bvisa uwu mukheyo kubva kwendiri, asi kusaita kuda kwangu, asi kuda kwako.”

³⁷ Wakaviya, akavawana vakavata, wakati kuna Pedru: “Simoni, wavata here? Inga usikakoni here kuti urinde nguva imwe neni?

³⁸ Rindanyi mukumbire, kuti musanghwina mukuejwa; ngo gwinyiso mweya unotenda asi nyama aina simba.”

³⁹ Wakahwirirazve, akakumbira, echivereketa mazwi ndiwo-ndiwo.

⁴⁰ Naaviyazve wakawana vakavata, ngokuti majiso avo inga echirema, navo avazivi kuziva chokumupingura.

⁴¹ Wakaviya ngo kwo chitatu, akati kwavari: “Chivatanyi zvino, muzorore. Zvakwana; nguva yaguma, vonanyi; Mwana wo Mundhu unopihwa mu nyara jo vashaishi.

⁴² Mukanyi, tiende: Vonanyi uwo unondipira waa phedo.”

Kusungwa kwa Jesu

⁴³ Paripo, achivereketa, Judhasi wakaguma, umwe wo vari gumi na vaviri, ano mbungano naye, ine shoti no nduku, vechibva ku vapristi vakuru no vatari no vakuru.

⁴⁴ Zvino iye wayinga akavapa chitatijiro echiti: “Uwo wondinozochungamija ngo muromo, ndiye. Mubatenyi mumukweve ngo kungwaririka.”

⁴⁵ Naapo waguma, paripo wakaviya kwaari, akati: “Rabhi”, naye wakamuchungamija ngo muromo.

⁴⁶ Navo vakamubata ngo nyara javo vakamutora.

⁴⁷ Asi umwe wakatikuti wo avo vaiyima apo wakavhomora shoti yake, wakatema muranda wo mupristi mukuru akagura njeve yake.

⁴⁸ Jesu wakapingura, akati kwavari: “Mwabuda kundibata here kudari ngo vanoambana no jongoni, muno shoti no nduku?

⁴⁹ Ndayinga ndinemwi mazuva ese mu themperi ndechijijisa, nemwi amuzivi kundibata; asi ichi chinoitika kuti zvakatahwa zvizarisike.”

⁵⁰ Navo vese vakamusiya, vakatiza.

⁵¹ Jaha rakatikuti rakamutevera, rayiva no jira ro kuchena rakariti kupekupe pa muviri waro, rayiva mutitini: Navo vakaribata;

⁵² asi iro rakasiya jira ro kuchena, rikatiza mitu.

Jesu pamberi po mutongi wo vajudha

⁵³ Navo vakamukweva Jesu kuenda naye ku mupristi mukuru, Kwakaungana pamwepo vapristi vakuru vese, no vakuru no vatari.

⁵⁴ Pedru inga echimutevera ari ngo ndhambo, mbhera wakaguma mukati muruvanje mo mupristi mukuru; naye wakagara no vangwariri kukota muriro.

⁵⁵ Zvino vapristi vakuru no madhodha ese vakapshaka chapupu ndi Jesu kuti vamuuraye; avazivi kuchiwana.

⁵⁶ Ngokuti vazhinji vakavereketa chapupu cho kunyepa ndiye, no uchapupu hwavo ahuzivi kutenderana.

⁵⁷ Kwakamuka vamweni vakatikuti, vakayita chapupu cho kunyepa ndiye, vechiti:

⁵⁸ Takamuzwa echiti: Ndinozophwanya iri themperi rakavakiwa ngo nyara, na ngo mazuva matatu ndinozovaka rimweni risikavakwi ngo nyara jo vandhu.

⁵⁹ Pikija ngokudaro uchapupu hwavo ahuzivi kutenderana.

⁶⁰ No mupristi mukuru wakayima pakati pavo, wakamubvunjisa Jesu, echiti: “Aupinguri chiro here? Chinyi ichi cho vanopupura ava ndiwe?”

⁶¹ Asi iye wakanyarara, aazivi kupingura chiro. Mupristi mukuru wakamubvunjisazve echiti kwaari: “Iwewe uri Kristu here, Mwana wa Mwari wo Uwo Unomuchena?”

⁶² Jesu wakati: “Ndiri iye; nemwi munozovona Mwana wo Mundhu wakagara ngo kumuho kwo Unosimba, echiviya mu makore wo mu gore.”

⁶³ No mupristi mukuru wakamwesa machira ake, echiti: “Tichatamirenyi zvapupu?

⁶⁴ Mwazwa kutuka kwake; munoti kudini?” Navo vese vakagura kuti unosisira kufa.

⁶⁵ Vamweni vakatanga kumupfirira mata, no kufukija hope yake, no kumupambhaja, no kunanga kwaari, kuti: Profeta. No ndhumwa jakamuashira ngo kumupambhaja ngo nyara.

Pedru unokanija Jesu

⁶⁶ Naapo Pedru ari ngo pasi paruvanje, kwakaviya kwaari umwe wevasikana vo mupristi mukuru;

⁶⁷ naye echivona Pedru echikota muriro wakamuringira, wakati: “Iwewe newe wayiva na Jesu wo Nazaretha.”

⁶⁸ Asi iye wakakanija, echiti: “Andizivi, andizwisisi kuti unonangenyi.” Naye wakabuda kuenda kuruvanje pamusuvo, no jongwe rakarira.

⁶⁹ No musikana uwo wakamuvona, wakatangazve kuvereketa kuna avo vayimapo: “Uwu uri umwe wavo.”

⁷⁰ Asi iye wakakanijazve. Ngosure kwo chimukuvo avo vayimapo vakatizve kuna Pedru: “Ngo gwinyiso iwewe uri umwe wavo, ngokuti uri mu Garire.”

⁷¹ Asi iye wakatanga kutuka no kupika, echiti: “Andimuzivi uwu mundhu wo munovereketa ndiye.”

⁷² Paripo ngo kukasira jongwe rakarira ngo kwo chipiri. Na Pedru wakacherecheja izwi raakavereketa Jesu kwaari, rokuti: Jongwe risati rarira kaviri unozondikanija katatu. Naapo akarakaja ngo izvo, wakachema.