Marku 13 - NOVO TESTAMENTO EM NDAU

Jesu unovereketa ngo kuphwanywa kwo themperi

¹ Echibuda kubva mu themperi umwe wo vajiji vake wakati kwaari: “Mujijisi, ringirayi kuseja kwo mapuwe aya, no kuseja kwo nyumba jakadari!”

² Jesu wakati kwaari: “Unovona here iji nyumba jakakura? Akuzosari buwe rimwe panyezuru pobuwe rimweni risikazowiswi pasi.”

Matambujiko no kuteverehwa

³ Naagara pa dundhu ro Maorivhe wakayita maringwa no themperi, Pedru na Jakobe na Johani na Andreu vakamubvunjisa vari vega, vakati:

⁴ “Tibvunjei kuti izvi zvinozoitika rini? Nokuti ngochapi chivoniso chinotatija kuti izvi zviro zvoda kuitika?”

⁵ Jesu wakatanga kuvabvunja, echiti: “Ngwaranyi kuti musazopaukiswa ngo mundhu pikija ndiyani.”

⁶ Ngokuti vazhinji vanozoviya ngo zina rangu, vechiti: “Ndini Kristu; navo vanozopaukisa vazhinji.

⁷ Naapo mwoozwa ngo imbi no marehwarehwa oimbi, musazokakaseka; izvi zvinosisira kuti zviyitike; asi magumo aasati aguma.

⁸ Ngokuti jinja rinozomukirana no jinja, no umambo hunozomukirana no umambo; kunozovapo kuzungunyika kwo nyika ku ndau jakaparajana; kunozovapo njara. Izvi zviri zvokutanga kwo matambujiko.

⁹ Asi jingwarirenyi imwimwi pachenyu ngokuti vanozomupira mubangano, nemwi munozorohwa mu nyumba jo kudira javo; munozoima pamberi po vatongi no majimambo ngo ndava yangu, kuyita chapupu kwavari.

¹⁰ No vhangeri rinozochumaihwa kutanga ku majinja ese:

¹¹ Naapo vanozomukweva, vechimupira mukutongwa, musazodembatemba ngo pamberi kuti munozovereketenyi, ngokuti kunozopuwa kwomuri ngo nguva iyo icho chomunozovereketa; ngokuti andimwipi munozovereketa, asi ndi Mweya Wakachena.

¹² Nyavanji vanozopira munukuna kuti aurawe, na baba unozopira mwana; no vana vanozomukira vabari, nokuyita kuti vaurawe.

¹³ Nemwi munozonyenywa ndivo vese ngo ndava yo zina rangu; asi iye unozoshingirira mbhera ku magumo unozoponeswa.”

Dambujiko guru

¹⁴ “Naapo mwoozovona chinyangajo chinoparaja chechiyima apo pochisikasisiri (uwo unojija ngaazwisise) avo vari mu Judhiya ngavatizire ku matundhu.

¹⁵ No uwo uri panyezuru po nyumba asazobzuka, nokuti kunghwina kutora chiro pikija chirichese mu nyumba mwake.

¹⁶ No uwo uri mu munda asazohwirira sure kootora jira rake.

¹⁷ Asi ikhombo kwavari vano mimba, naavo vanomwisa ngaao mazuva!

¹⁸ Nemwi kumbiranyi kuti zvisazoita ngo mukuvo wo shipepo.

¹⁹ Ngokuti ngaao mazuva kunozovapo kutambujika kukuru, ukwo kusikazivi kumbovapo kwakadaro kubvira kwo kutanga kwo kusikwa, kwaakasika Mwari, mbhera zvino, akuchatongozoitikizve kwakadaro.

²⁰ Kudari Mambo asikazivi kufupisa mazuva ao, akusaizova no nyama ingaponeswa; asi ngo ndava yaavo vakatsananguhwa ao mazuva anozofupiswa.

²¹ Naapo kudari aripo mundhu unozoti kwomuri: Vonanyi, Kristu uri pano, nokuti, ringiranyi, uri apo! Musazozvitenda.

²² Ngokuti vanozovapo vakristu vokunyepa, no vaprofeti vokunyepa, navo vanozoita zvivoniso no zvishamiso, kupaukisa vakatsananguhwa kudari zvichikwanisika.

²³ Asi ngwaranyi; vonanyi, ndamubvunja zvese ngo pamberi.”

Kuviya kwo Mwana wo Mundhu

²⁴ “Asi ngaao mazuva, ngosure kwo kutambujika ukwo, zuva rinozoita chidima, no mweji auzojeki,

²⁵ no ndhondo jinozowa kubva mu gore, no simba rese ro mu denga rinozozungunyiswa.

²⁶ Naapo vanozovona Mwana wo Mundhu echiviya mu makore uno simba guru no uthende.

²⁷ Naapo unozotuma ngirosi jake, unozounganija vakatsananguhwa vake kubva ku marutivi marongomuna, kubvira ku magumo onyika mbhera kuguma ku magumo odenga.”

Chijijo cho mukuyu

²⁸ “Jijanyi muezaniso wo mukuyu: Apo davi rawo ro vhikitira robudisa masakani aro, munoziva kuti chirimo chaa phedo.

²⁹ Nemwivo ngokudaro, apo mwoovona izvi zvechiitika, munozoziva kuti iye ari phedo, eya pa misuvo.

³⁰ Ngozvirokwazvo ndinoti kwomuri, kuti, uwu mubarihwana auzopindi izvi zvese zvisati zvaitika.

³¹ Denga no nyika zvinozopinda, asi mazwi angu aatongozopindi.”

Akuna unoziva zuva no nguva

³² “Asi ngo ndava yo zuva iro no nguva iyo, apana no umwe unozviziva, pikija ngirosi jo mu gore, asi ndi Baba ega.

³³ Ngwaranyi, murinde, ngokuti imwimwi amuzivi nguva iyo.

³⁴ Kwakadari ngo mundhu echida kufamba kuenda ku nyika imweni, iye wakasiya nyumba yake, wakapa varanda vake simba, kuna umwe na umwe mushando wake, wakapangazve murindi wo pamusuvo kuti arinde.

³⁵ Ndizvo rindanyi; ngokuti imwimwi amuzivi kuti muno wo nyumba unoguma rini, dangani zuva rabira nokuti pakati po usiku, nokuti ngo kurira kwo jongwe, nokuti mangwanani.

³⁶ Kuti pamweni echiguma ngo kukasira iye amuwane mwakavata.

³⁷ No icho chondinonanga kwomuri, ndinochinanga kwavari vese: Rindanyi.”