Marku 12 - NOVO TESTAMENTO EM NDAU

Muvhini no varimi

¹ Wakatanga kuvereketa kwavari ngo miezaniso, echiti: “Mundhu wakasima munda wo mivhini, wakaujivirira ngo rusosa, wakacha rindi ro kusvinira vhini, akavaka chitandara, wakaupa ku varimi, wakaenda ku nyika imweni.

² Ngo nguva yo kuibva kwo michero wakatuma muranda ku varimi kuti aashire michero yo muvhini kuno varimi.

³ Navo vakamubata, vakamurova, vakamuhwirija asina chiro.

⁴ Wakatumazve kwavari muranda umweni; no uwo naye vakamuremaja musoro wake, vakamupsheruja.

⁵ Naye wakatuma umweni; no uwo vakamuuraya; no vamweni vazhinji ngokudaro, vakarova vamweni, no vamweni vakavauraya.

⁶ Wakasara no umwe mwana unodikanwa; wakamutuma kwavari pakugumisira, echiti; vanozoreremeja mwana wangu.

⁷ Asi avo varimi vakati pakati pavo: Uwu ndiye unogara ndhaka; viyanyi, ngatimuuraye, no ndhaka inozoita yedu.

⁸ Vakamubata, vakamuuraya, vakamukhandira kunja kwo munda wo muvhini.

⁹ Mambo wo munda wo mivhini unozoitenyi? Unozoviya, auraye varimi avo, unozopa munda wo mivhini kuno vamweni.

¹⁰ Amuzivi kujija here aya matahwa, kuti: Buwe iro rakarambwa ngo vavaki, iri ndiro rakaitwa soro ro pakhona;

¹¹ ichi chakabva kuna Jehovha, chinoshamisa mukuvona kwo majiso edu.”

¹² Navo vakapshaka kuti vamubate; asi vakatya mbungano; ngokuti vakaziva kuti waivereketa muezaniso uwo ndivo; vakamusiya, vakaenda.

Kushaba shangu kuna Khesari

¹³ Vakatuma kwaari vamweni vo vafarisi, no vaHerodhi, kuti vamuparise ndava mukuvereketa kwake.

¹⁴ Vaguma, vakati kwaari: “Mujijisi, tinoziva kuti iwewe uri wo gwinyiso, auringiri ukuru hwo mundhu, ngokuti auringiri hope yo mundhu, asi ngo gwinyiso unojijisa njira ya Mwari. Kunotendehwa here kuripa mare yo shangu kuna Khesari, nokuti tisaripa?

¹⁵ Tinozomupa here nokuti tisamupa?” Asi iye echiziva kujiitisa kwavo, wakati kwavari: “Munondiejerenyi? Zisanyi kwendiri chiguhwa cho mare chinozwi dhenariyo, kuti ndichivone.”

¹⁶ Vakachizisa. Naye wakati kwavari: “Uwu muezaniso no uku kutahwa ngo kwaani?” Navo vakati kwaari: “Ngozva Khesari.”

¹⁷ Jesu wakati kwavari: “Ipanyi Khesari izvo zva Khesari, no kuna Mwari izvo zva Mwari.” Navo vakashamiswa kakurutu ndiye.

Ngo ndava yo kumuka kwo vakafa

¹⁸ Vakaviya kwaari vasadhusi, avo vanoti kuti akuna kumuka kwo vakafa; navo vakamubvunjisa vechiti:

¹⁹ “Mujijisi, Mosi wakatitarira kuti; kudari nyavanji wo mundhu akafa, wosiya mukaji, asina mwana, kuti munukuna wake ngaamurovore, amusijire jinja ranyavanji wake.

²⁰ Paiva no hama nomwe, yokutanga yakarovora mukaji asi yakafa isikazivi kusiya jinja;

²¹ no yo chipiri yakamurovora, nayo yakafa isikazivi kusiya jinja; no yochitatu ngo kudarovo.

²² Pa vanomwe vese vakafa, vechikazivi kusiya jinja. Ngosure kwavo vese mukaji wakazofavo.

²³ Mukumuka kwo vakafa, apo voozomuka, unozoyita mukaji wani kwavari? Ngokuti vanomwe vakamurovora.”

²⁴ Jesu wakati kwavari: “Andikwopi kupauka kwenyu here, ngokuti amuzivi zvakatahwa no kutizve simba ra Mwari?

²⁵ Ngokuti apo voomuka kubva kwo vakafa, avazorovori nokuti kurovojwa, asi vanozodari ngo ngirosi jiri mu gore.

²⁶ Asi ngo ndava yo vakafa, kuti vanomuka, amuzivi kujija here mu tshamba ya Mosi, pandau inovereketa ngo pfiba, kuti Mwari wakavereketa kwaari, echiti: Inini ndiri Mwari wa Abrahama, na Mwari wa Isaka, na Mwari wa Jakobe?

²⁷ Iye asipi Mwari wo vakafa akadi, asi ngo wo vanopona; munopauka kakurutu.”

Mupango mukuru

²⁸ Kwakaguma umwe wo vatari, wakavazwa vechibvunjisana pamwepo, naye echiziva kuti wakanasa kupingura kwavari, wakamubvunjisa, akati: “Ngowapi mupango wokutanga kwoiri yese?”

²⁹ Jesu wakapingura kuti: “Wokutanga unoti: Izwai, A, Israeri; Jehovha Mwari wedu ndi Mwari umwe;

³⁰ newe unozomuda Mambo Mwari wako ngo mwoyo wako wese, ngo mweya wako wese, ngokuziva kwako kwese, ngo simba rako rese.

³¹ No wochipiri ngo uwu, Unozomuda muvakihwana wako kudari ngo kujida kwako iwewe akuna mupango wakapinda kukura kuno iyi.”

³² No mutari wakati kwaari: “Wanasa kuvereketa Mujijisi, wavereketa gwinyiso kuti uripo Mwari umwe, akuna umwenizve ngo kunja kwake;

³³ no kumuda ngo mwoyo wese, ngo kuziva kwese, ngo simba rese, no kumuda muvakihwana wako kudari ngo kujida kwako iwewe kunopinda kakurutu midiro yo kupisa no mibairo yese.”

³⁴ Naapo Jesu avona kuti wapingura ngo kuziva, wakati kwaari: “Iwewe auripi ndhambo akadi kuno Umambo hwa Mwari.” Sure kwo izvi apana waishinga kumubvunjisazve chiro.

Kristu na Dhavhidha

³⁵ Jesu echijijisa mu themperi wakati: “Vatari vanonanga ngenyi kuti Kristu uri mwana wa Dhavhidha?

³⁶ Dhavhidha wambhwine ari mu mweya Wakachena wakati, Jehovha wakati kuna Mambo wangu, Gara ngo kumuho kwangu, mbhera ndiite vakorore vako chitambarariro cho tshoka jako.

³⁷ Dhavhidha wambhwine unomudanija kuti Mambo, ndizvo uri mwana wake ngo njirenyi?” No uzhinji hwo vandhu vakamuzwa ngo kudakara.

Jesu unopsheruja vajijisi vo mupango

³⁸ Mukujijisa kwake wakati: “Ngwaranyi vatari, avo vanodisisa kufamba vakasimira nguvo jakareba, no kuchungamijwa mundau jo musika,

³⁹ no zvigaro zvo pamberi mu nyumba jo kudira, no ndau jo pamberi mu madhiri.

⁴⁰ Avo vanochakata nyumba jo shirikaji, vechirebesa kukumbira ngo chakwenye vanozoashira kurashwa kwakanyanyisa kukura.”

Zvipo zvo shirikaji yaiva murombo

⁴¹ Wakagara pasi phedo po bhokisi ro zvipo, wakaringisisa mapiro ombungano mare mubhokisi ro zvipo; no vazhinji vayiva no pfuma vakadiremwo yakawanda.

⁴² Kwakaguma shirikaji yaiva murombo yakadira apo zviguhwa zviviri zvo mare, izvo zvinoita mupeni umwe.

⁴³ Wakadanija kwaari vajiji vake, wakati kwavari: “Ngozvirokwazvo ndinoti kwomuri, iyi shirikaji iri murombo yapa kupinda avo vese vapa mubhokisi ro zvipo.

⁴⁴ Ngokuti avo vese vapa ngo uwandu hwo pfuma yavo; asi iyo mukutama kwayo yapa zvese zvoyaiva nazvo, eya, zvese zvoinopona ndizvo.”